МУТОЛАА – ҲАЁТИМИЗГА ЗАВҚ ВА ФАЙЗ БАҒИШЛАЙДИ
Инсоннинг етук шахс сифатида камол топишида бадиий адабиётнинг аҳамияти жуда катта. Истиқлол шароитида ўзбек халқи учун ўзлигини англаш, миллий қадриятларни тиклаш жараёнида мумтоз адабиётимиз тараққиётига улкан ҳисса қўшган, асарлари жаҳон маданияти хазинасидан муносиб ўрин эгаллаган ижодкорлар билан биргаликда замондош шоир ва ёзувчиларнинг бадиий тафаккур ривожида ўзига хос ўрин тутган асарларидан баҳраманд бўлиш халққа хизмат қилиш бурчини англаган ҳар бир киши учун муҳимдир, чунки адабиёт ҳаёт дарси саналади. Мана шуларни ҳисобга олган ҳолда "Жайхун илҳомлари” Нодавлат нотижорат ташкилотида муҳим тадбирлар қаторида туманимиз ёшларини жаҳон ва миллий мумтоз адабиётимизнинг нодир намуналаридан, ҳозирги даврда ўзбек ва бошқа тилларда яратилаётган асарлардан баҳраманд қилиш режалаштирилиб, амалий ишлар олиб борилмоқда.
"Жайхун илҳомлари” ННТга Ўзбекистон Республикаси Олий Мажлиси ҳузуридаги нодавлат нотижорат ташкилотлари ва фуқаролик жамиятининг бошқа институтларини қўллаб-қувватлаш жамоат фонди томонидан "Юксак маънавиятли авлод – юрт келажаги” номли лойиҳасини бажариш учун 25 млн. сўм грант маблағлари берилган эди. Биз ташкилотимиз иш фаолиятини режалаштиришда туманимиз ёшларининг маънавиятини юксалтиришга, дунёқарашини кенгайтиришга мўлжалланган ҳар турли тадбирлар билан биргаликда кутубхона ташкил қилиб, уни миллий ва жаҳон адабиётининг сара асарлари билан бойитишга ҳаракат қилдик. Шу мақсадда дастлаб Тошкентдаги нашриётлардан 842 та китоб олиб келинди. Ҳозирги даврда кутубхонамизда ҳомий ташкилотлар ёрдамида 2874 та китоб тўпланган. Туман ёшлари, мактаб, коллеж ва лицей ўқувчиларини кутубхонамиздан унумли фойдаланишга жалб қилиш мақсадида ўтган йил мобайнида бошқа турли тадбирлар қаторида ўқув ўринларида, шу жумладан олис қишлоқларда ҳам, китоб сайиллари уюштирилди, кўчма кутубхона ташкил қилинди. Шу тадбирларда фаол қатнашган ижодкор ёшлардан 42 нафарининг сара шеърларидан "Жайхун жилғалари” номли тўплам грант маблағи ҳисобидан нашр қилиниб, туман аҳолисига тарқатилди. Кутубхона фондининг бойишида фаол китобхонлар ташаббус кўрсатиб, китоб совға қилиш анъанасини бошлаб бердилар. Масалан: "Янгиобод” маҳалла фуқаролар йиғини раиси Зебо Ражабова 110 та бадиий китоб совға қилди. Беш-ўн донадан китоб совға қилаётганлар ҳам анчагина. Мен ҳам ўзимнинг шахсий кутубхонамдан ўзбек ва рус тиллардаги миллий ҳамда чет эл адабиётига мансуб бадиий, илмий китоблардан 325 тасини кутубхонага топширдим. Кўзлаган мақсадларимизга эришувимизда булар ҳали етарли эмас.
Муҳтарам Президентимизнинг шу йил 12 январдаги "Китоб маҳсулотларини чоп этиш ва тарқатиш тизимини ривожлантириш, китоб мутолааси ва китобхонлик маданиятини ошириш ҳамда тарғибот қилиш бўйича комиссия тузиш тўғрисида”ги фармойиши китоб мутолаасини кенг тарғиб қилишда муҳим аҳамиятга эгадир.
Бу – ижодкорлар, ноширлар, китоб тарқатувчилар учун қулайлик яратган бўлса, китобхонлар учун янги асарларни ўқиб, завқланишлари учун катта имконият демакдир. Биз ҳам бу фармойишдан руҳланган ҳолда ёшларнинг маънавиятини юксалтириб, интеллектуал салоҳиятини оширишга қаратилган тадбирларни ўз вақтида ўтказиб, бу соҳада кўзланган мақсадларга эришамиз. Бунинг учун эса кутубхона фондини бойитиб, китоблар сонини 5000 тага етказамиз, шу билан бирга китоб мутолаасига тарғиб қилиш ишларини ҳам фаол равишда олиб борамиз.
"Аргументы и факты” газетасининг ўтган йилги 48-сонида дунёдаги бир қанча олимларнинг тадқиқот натижаларига таяниб ёзишича, қоғозга босилган китобларни мутолаа қилиш инсоннинг руҳий зўриқишларини 68 фоизга юмшатиб, барвақт вафот этиш хавфини 23 фоизга камайтирар экан.
Бу маълумотлар яна бир марта инсон замонавий технология воситалари билан алаҳсиб қолавермай, бадиий адабиёт намуналари мутолааси билан мунтазам равишда шуғулланиб борса, бу унга ҳар томонлама фойдали эканлигини исботлайди. Демак, ҳаётмизни тобора завқли ва файзли қилиб бориш ўз қўлимизда экан.
Аҳмад НАФАСОВ,
"Жайхун илҳомлари” ННТ раиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
