“Обод ва файзли маҳалла – юрт кўрки” шиори остида умумхалқ хайрия ҳашари ўтказилмоқда

Ҳашар – асрлар давомида авлоддан авлодга ўтиб келаётган умрбоқий анъана, халқимизга хос бўлган бирдамлик, саховат ва фидойиликнинг ёрқин кўринишидир. Халқимиз айниқса, байрамлар, тўй-томошалар олдидан ҳамжиҳатликда ҳашарлар ташкил қилиб, ҳовли-жойлари, кўча-гузарлар, овул ва маҳаллалар ҳамда шаҳар-у қишлоқларни обод қилишга одатланган. 22-23 август кунлари бутун мамлакатимиз бўйлаб “Обод ва файзли маҳалла – юрт кўрки” шиори остида ўтказилаётган умумхалқ хайрия ҳашари ҳам ушбу асрий анъаналарнинг амалий ифодасидир.

Мустақиллик байрами олдидан ташкил қилинган умумхалқ хайрия ҳашари Вазирлар Маҳкамасининг махсус фармойиши асосида ўтказилаётган бўлиб, унда фуқаролар, корхона ва ташкилотлар жамоалари фаол иштирок этмоқда.

Амударё туманида ҳам умумхалқ хайрия ҳашари кенг кўламда ўтказилиб, туман аҳолиси ва ташкилотлари бу эзгу ишда бир ёқадан бош чиқариб қатнашмоқда. Айниқса, туман Санитария-эпидемиологик осойишталик ва жамоат саломатлиги бўлими ходимлари ҳашарда ҳаммадан фаол иштирок этишмоқда. Сабаби, тоза ва озода, саранжом ва саришта ҳовлида санитария ҳолати, шу билан бирга бу ерда яшовчи одамларнинг саломатлиги ҳам аъло даражада бўлади.

Ҳашар доирасида амалга оширилаётган ишлар кенг қамров касб этмоқда. Ҳашарчилар нафақат кўча ва ҳовлиларни тозалаш, балки кўп қаватли уйлар атрофини, хиёбонлар, зиёратгоҳлар ва қабристонларни тартибга келтириш, ариқ ва зовурларни тозалаш каби ишларда ҳам фаоллик кўрсатмоқдалар. Бундан ташқари, дарахтларни оқлаш ва буташ ишлари ҳам амалга оширилмоқда. Айниқса, ушбу тадбирнинг ижтимоий жиҳати алоҳида эътиборга лойиқ. Ҳашар давомида ижтимоий ҳимояга муҳтож, боқувчисини йўқотган кексалар ва ногиронлиги бўлган фуқароларнинг уй-жой шароитларини яхшилашга ёрдам берилмоқда. Бу эса жамиятда меҳр-оқибат туйғуларини қарор топтиришда муҳим восита саналади.

Амударё тумани Тиббиёт бирлашмаси жамоаси ҳам ҳудуд ободлигига ўз ҳиссаларини қўшмоқдалар. Уларнинг бу иштироки аҳоли саломатлигини муҳофаза қилиш билан бирга, она Ватанимизга бўлган юксак меҳрларини ҳам намойиш этади.

Бу тадбирнинг муҳим жиҳати шундаки, ҳашар жараёнида мажбурий меҳнатга йўл қўйилмайди. Бу “Ўзбекистон Республикасида мажбурий меҳнатга барҳам беришга доир қўшимча чора-тадбирлар тўғрисида”ги ҳукумат қарори билан қатъий белгилаб қўйилган. Ҳар бир фуқаро ҳашарда ўз истаги билан, ихтиёрий асосда иштирок этмоқда. Бу ўз навбатида, тадбирнинг маънавий қийматини оширади, чунки инсонлар ўз юрти ободлиги учун чин юракдан, ихлос билан меҳнат қилса, натижа ҳам шунга яраша гўзал бўлади.

“Обод ва файзли маҳалла – юрт кўрки” шиори остидаги умумхалқ хайрия ҳашари – бу фақатгина тозалик ва ободонлаштириш ишларидан иборат эмас. Бу тадбир халқимизнинг маънавий бирдамлигини, меҳнатсеварлигини ва бир-бирига бўлган меҳр-мурувватини намоён этадиган улкан ижтимоий-сиёсий тадбир бўлди. Ҳар бир сарфланган куч, ҳар бир терилган чиқинди ва оқланган дарахт бизнинг келажак авлодларга тоза, обод ва файзли Ватан қолдиришга бўлган интилишимизнинг амалий исботидир.