ОБОДЛИК САРИ ЭЗГУ ҚАДАМЛАР

- Қудратимизга шубҳа қилганлар биз қурган иморатларни келиб кўрсин, - деган эди Соҳибқирон Амир Темур бобомиз.

Ҳа, иморатлар халқнинг маънавиятини, салоҳиятини ўзида акс эттирувчи кўзгудир. Муҳташам бинолар кўрган кўзни қувонтиради, кишига завқ бағишлайди, гўзалликка интилиш туйғусини уйғотади.

Истиқлол йилларида туманимизда кенг миқёсда кўркам ва чиройли маданий-маиший бинолар барпо этиш, кўчалар бўйларида қад ростлаб турган бинолар атрофларини ободонлаштириш, кўкаламзорлаштириш ишлари амалга оширилди ва бу иш бугунги кунда ҳам асосий вазифаларимиздан бири бўлиб турибди.

Жорий йилда туманимизда 130 миллиард сўмдан ортиқ қурилиш, капитал реконструкция, капитал таъмирлаш ва ободонлаштириш ишларини амалга ошириш режалаштирилгани фикримизнинг яққол исботидир. Шундан 100 миллиард сўмдан ортиқ иш ҳажми давлат ва маҳаллий бюджет маблағлари, 30 миллиард сўм атрофидаги ишлар эса аҳолининг ўз маблағлари ҳисобидан амалга оширилади. Бу қурилиш материаллари – ғишт, оҳак, труба, плита, брусчаткаларга эҳтиёж катта бўлишидан далолатдир. Яъни, туманимизда «Обод турмуш йили» улкан бунёдкорликларгина эмас, балки қурилиш материалларини ишлаб чиқаришда жадал суръатларга эришиладиган давр ҳам бўлади.

2013 йил учун тасдиқланган Дастурга мувофиқ, 5 та янги қуриладиган, 5 та реконструкция ва 2 та капитал таъмирлаш объектларига 9 417,9 миллион сўм, канал ва насос станциялари реконструкциясига  келгусида 43,8 миллиард сўм, ичимлик суви тармоғи қурилишига 3761,8 миллион сўм, намунавий уй-жойларнинг сув тармоқлари қурилишига 164 миллион сўм, намунавий лойиҳа асосида қуриладиган 70 та уй-жойларга 8991,4 миллион сўм, Урганч-Манғит шаҳарлари – Туркманистон Республикаси чегараси давлат аҳамиятидаги автомобиль йўлини таъмирлашга 4,270 миллиард сўм, ички тошли йўлларни қора қопламага ўтказишга 426,9 миллион сўм, туман ободонлаштириш бошқармаси балансидаги умумфойдаланишдаги хўжаликлараро ички йўлларни жорий таъмирлашга 320,48 миллион сўм, табиий газ қувурлари реконструкциясига 79 миллион сўмлик маблағлар ажратилди ва мазкур объектларда ишлар жадал суръатларда олиб борилмоқда.

Шунингдек, овул ва маҳаллаларда электр энергияси таъминотини яхшилаш учун 8 та янги трансформаторлар ўрнатилади ва давлат, маҳаллий аҳамиятдаги ички хўжаликлараро йўлларда таъмирлаш ва кенг миқёсда ободонлаштириш ишлари амалга оширилади. Амалга оширилаётган  режалар туманимиз аҳолисининг турмуши юксалишига, обод ва фаровон бўлишига хизмат қилади.

А.МАДРАИМОВ,

туман архитектура ва қурилиш бўлими биринчи тоифали мутахассиси.