ЙИЛ ЯКУНЛАРИ ВА ЯНГИ РЕЖАЛАР

Шу йилнинг  15 январь куни туман ҳокимлигининг катта мажлислар залида туманда оналик ва болаликни муҳофаза қилиш, хотин-қизлар ва вояга етмаганлар билан ишлашиш бўйича 2015 йил давомида олиб борилган ишлар ва 2016 йил – "Соғлом она ва бола” йилидаги вазифаларга бағишланган кенгайтирилган йиғилиш бўлиб ўтди.

Йиғилишда туман ҳокимлиги мутахассислари, тиббиёт бирлашмаси ходимлари, умумтаълим мактаблари директорлари, академик лицей ҳамда касб-ҳунар коллежларининг маънавият ва маърифат ишлари бўйича директор ўринбосарлари, тумандаги ОФЙ ва МФЙларнинг диний маърифат ва маънавий-ахлоқий тарбия масалалари бўйича маслаҳатчилари, ҳуқуқни муҳофаза қилиш органлари ходимлари, жамоат ташкилотлари раҳбарлари, диний идора вакиллари ва оммавий ахборот воситалари ходимлари иштирок этдилар.

Йиғилишни туман ҳокимининг биринчи ўринбосари Б.Эрназаров очди ва олиб борди.

Йиғилиш кун тартибига бешта муҳим масала ҳавола этилди.

Кун тартибидаги "Ўзбекистон Республикаси Президентининг 2014 йил 1 августдаги "2014-2018 йилларда Ўзбекистонда аҳолининг репродуктив саломатлигини янада мустаҳкамлаш, оналар, болалар ва ўсмирлар соғлигини муҳофаза қилиш борасидаги Давлат дастури тўғрисида”ги ПҚ-2221-сонли қарори ижросини таъминлаш бўйича 2015 йилда туманда олиб борилган ишлар ҳамда 1 ёшгача бўлган гўдаклар ва 14 ёшгача бўлган болалар ўлими ҳолати таҳлили, 2016 йилдаги вазифалар тўғрисида”ги масала бўйича туман тиббиёт бирлашмаси бошлиғи О.Ҳалимов, мактабгача ва мактаб ёшидаги болаларни чуқурлаштирилган тиббий кўрикка тўлиқ жалб этиш, болаларни, айниқса, қиз болаларни жисмоний тарбия ва спортга жалб этишнинг  бугунги ҳолати ва бу борада таълим муассасалари ходимлари олдида турган вазифалар, мактаб ўқувчи-ёшлари давомати, улар ўртасида ҳуқуқбузарлик ва жиноятчиликнинг олдини олиш борасида олиб борилаётган ишлар ҳамда ИИБ хизмат хонаси ва милиция таянч пунктлари томонидан олиб келинган болалар билан амалга оширилган ишлар ҳақида туман ХТМФМТТЭБ мудири А.Қўшаев, касб-ҳунар коллежлари ўқувчи-ёшларининг давоматини яхшилаш, улар ўртасида ҳуқуқбузарлик ва жиноятчиликнинг, турли ёт оқимлар ва ахборот хуружларига берилиб кетишнинг олдини олиш борасида мутасадди ташкилотлар ва маҳалла фаолларининг ҳамкорликдаги  вазифалари тўғрисида "Маҳалла” хайрия жамоат фонди туман бўлинмаси раиси Р.Рўзметов, туманда 2015 йил давомида оналик ва болаликни муҳофаза қилиш, хотин-қизлар ва вояга етмаганлар билан ишлашиш борасида олиб борилган ишлар таҳлили, 2016 йилдаги вазифалар, аҳолининг тиббий маданиятини ошириш, айниқса, ҳомиладор аёлларнинг соғлигини, оилада уларга бўлган муносабат масаласига алоҳида эътибор қаратган ҳолда назоратга олиш, бу борада тиббиёт ходимлари билан биргаликда таълим муассасалари, жамоат ташкилотлари, айниқса, овул ва маҳалла фаоллари ҳамкорлигини янада яхшилаш борасидаги долзарб вазифалар тўғрисида туман ҳокими ўринбосари, хотин-қизлар қўмитаси раиси М.Аҳмедовалар маъруза қилди ҳамда йиғилиш кун тартибидаги масалалар бўйича атрофлича тўхталиб, йил давомида эришилган ютуқлар билан бирга йўл қўйилган хато ва камчиликлар, ечимини кутаётган муаммолар юзасидан қимматли фикрлар билдиришиб, йўл-йўриқлар кўрсатдилар.

Шунингдек йиғилишда яна бир муҳим масала – Ўзбекистон Республикаси Вазирлар Маҳкамасининг соғликни сақлаш, экология ва атроф-муҳитни муҳофаза қилиш масалалари бўйича комиссиясининг 2015 йил 25 декабрдаги 14-15-8-сонли хати иловаси билан юборилган  "Ўз жонига қасд қилиш сабаблари ва унинг олдини олишга қаратилган идоралараро комплекслар чора-тадбирлар режаси” ижросини таъминлаш бўйича  тиббиёт, таълим, жамоат ташкилотлари, маҳалла фаоллари ва диний ташкилотлар олдида турган вазифалар тўғрисида туман ҳокими ўринбосари, хотин-қизлар қўмитаси раиси М.Аҳмедованинг маърузаси ҳам тингланди.

Кун тартибидаги масалалар юзасидан музокараларда туман ИИБ вояга етмаганлар ўртасида ҳуқуқбузарлик ва жиноятчилик, назоратсизлик профилактикаси инспектори, майор Ж.Холмуродов, "Юсуф Эшон бобо” жомеъ масжиди имом-хатиби А.Матсафоевлар иштирок қилдилар ҳамда кўрилган масалалар бўйича ўз фикр-мулоҳазаларини билдирдилар.

Йиғилиш якунида кўрилган барча масалалар бўйича тегишли қарорлар қабул қилинди.

Туман ҳокимлигининг ахборот хизмати.