МЕҲНАТИДАН КЕЛГАН ДАРОМАД ТУРМУШИНИ БЕЗАДИ
Икром ҳунарга эрта қизиқди. Ҳали болалик чоғларидаёқ бобоси, Манғитда таниқли ҳунарманд, раҳматлик Ҳайдар бобо Камолов устахонада нимаики иш қилса, ёнида ҳамроҳ бўлиб юрар, бобосининг ишларини зимдан кузатар, енгил-елпи ишларига кўмаклашарди. Бобосининг ҳунарини отаси давом эттирган чоғларида у ҳам анча устачиликнинг ҳадисини олиб қўйган эди. Отаси янги туғилган чақалоқлар учун бешиклар ясар, болалар аравачаси, хамир ёзиш учун оштахта, ўқлов, чакич каби кўплаб уй-рўзғор буюмларини Икром билан биргаликда ишлар, ўғлини ҳар бир ишни пишиқ-пухта, меҳр билан ишлашга, нақшларини эринмай маромига етказиб ясашга, кўнгилга яқин ранглар билан безатишга ўргатар, "болам, молингни олган одам бир умр сени дуо қилиб эслаб юргудай қилиб ишлаш керак”, дея уқтирарди. Бобоси, ота-сининг ўгитлари бекор кетмади.
Бугунги кунда Икромнинг қўлидан чиққан уй-рўзғор буюмларига, нақшларига нафақат Манғит, балки, Нукус шаҳри ва бошқа туманлар бозорларида ҳам мижозлар бор. Икром Камолов эл корига яраётган моҳир уста бўлиб етишди. "Ҳунарманд” уюшмаси туман бўлими аъзоси, якка тадбиркор сифатида фаолият юритиб, кўпгина шогирдлар ҳам етиштириб чиқарди. Уста-шогирд анъаналари асосида ундан иш ўрганган Манғитнинг ўнлаб йигитлари бугунги кунда моҳир ҳунарманд бўлиб етишиб, мустақил иш юритмоқда.
- Менинг Икром акадан ҳунар ўргана бошлаганимга 16 йил бўлди. Аввал шунчаки ҳавас билан келган бўлсам, устозимнинг оддий тахта, тол ходаларидан ажойиб уй-рўзғор буюмлари ясашига қойил қолиб, ҳунармандликни касб қилиб олдим, - дейди Жасурбек Қобулов.
Ҳа, ҳунарманднинг иқтидори, касбига меҳри туфайли оддий ёғочларга ҳам худди жон киргандай жозиба касб этади. Устанинг усталиги ҳам шунда. Уларнинг фидойи хизматлари боис, бозорларимизда уй-рўзғор буюмлари сероб, ҳар бири ўзига хос қунт билан ишланган, жило берилган буюмларни танлаб харид қилиш имкониятимиз бор.
- Мустақиллик йилларида ҳунармандларга кенг имкониятлар яратилгани бунинг асосий са-бабидир, - дейди Икром Камолов биз билан суҳбатда. – "Ҳунарманд” уюшмасига аъзо бўлиб, якка тадбиркор сифатида бор куч билан ишлаяпман. Ўзим яшайдиган Беруний маҳалласи ёшларига устоз-шогирд анъанаси асосида билганларимни ўргатаяпман. Ҳунармандлик машаққатли, тинимсиз меҳнатни талаб қиладиган иш. Бироқ кўнглида иштиёқи бор одам бу машаққатлардан ҳам роҳат олади. Мен ҳам ишлаган буюмларимга қараб ўтириб чарчоғимни чиқараман.
Икром Камоловга касби нафақат ўз меҳнатидан завқланиш ҳисси-ни беради, балки, онаси Гуландом Янгибоева айтганларидай, ота, бобо ҳунарини ерда қолдирмай давом эттириш бахтини ҳам берди. Оиласи иқтисодини юксалтирди, меҳнатидан келган даромади турмушини безади.
Хонадонларимизни зарур уй-рўзғор буюмлари, бемалол хорижники билан рақобатлаша оладиган қулай ва чиройли мебеллар билан таъминлаб келаётган иқтидорли, тадбиркор ҳунармандларимиз омон бўлишсин! Икром Камолов каби ўз меҳнатлари туфайли элда ҳурмат-обрў қозонишсин.
Ойгул РАЖАБОВА,
Маҳмуджон ШОМУРОДОВ,
газетанинг махсус мухбирлари.
Мақола Ўзбекистон Республикаси Олий Мажлиси ҳузуридаги
Нодавлат нотижорат ташкилотларини ва фуқаролик жамиятининг бошқа институтларини
қўллаб-қувватлаш жамоат фонди томонидан молиялаштирилган лойиҳа доирасида тайёрланди.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
