Битирувчилар бандлиги таъминланади

Мамлакатимизда кадрлар тайёрлашнинг муҳим бўғини — ўрта махсус, касб-ҳунар таълими тизими салоҳиятли кадрлар тайёрлаш ва янги иш ўринлари яратиш борасида ўзининг ноёб ва самарадорлиги билан муҳим ўрин тутади. Вояга етаётган ҳар бир йигит-қиз муайян касб-ҳунарга эга бўлишига эришиш, меҳнат бозори талаби асосида энг муносиб мутахассислар тайёрлаш — ушбу тизимнинг асосий вазифаларидан.

Жорий йилнинг 13-14 август кунлари Амударётуманидаги 7 та касб-ҳунар коллежларида битирувчиларнинг ўз бизнесларини бошлашлари ва тадбиркорлик фаолиятлари билан шуғулланишларига амалий ёрдам кўрсатиш мақсадида "Бир дарча” сайёр нуқтаси” лойиҳаси доирасида тадбирлар бўлиб ўтди.

– Мустақилликнинг дастлабки йилларидан бошлаб юртимизда аҳоли, хусусан, ёшларни иш билан таъминлаш масаласи энг муҳим вазифалардан бири сифатида кун тартибига қўйилди. Аввало, йигит-қизларнинг доимий меҳнат билан банд бўлишини кафолатлашнинг ҳуқуқий асослари яратилди, – дейди Манғит иқтисодиёт касб-ҳунар коллежи директори Зафар Отамуродов. – Истиқлол йилларида қабул қилинган Меҳнат кодекси, «Аҳолини иш билан таъминлаш тўғрисида»ги ва «Ўзбекистон Республикасида ёшларга оид давлат сиёсатининг асослари тўғрисида»ги қонунлар ва бошқа меъёрий ҳужжатлар ёшларнинг, айниқса, касб-ҳунар коллежлари битирувчиларининг ишли бўлишига мустаҳкам замин ҳозирлади. Битирувчиларни ишга жойлаштириш чора-тадбирлари эса улар ўқишни тугатишидан анча аввал кўрилаётгани муҳим аҳамият касб этмоқда. Бу борада сўз кетганда турли тармоқлардаги корхона ва ташкилотларнинг коллежларга бириктириб қўйилгани — «коллеж — корхона» ҳамкорлигини изчил амалга ошириш, бўш иш ўринлари ярмаркаларини тизимли ўтказиш, иш берувчи учун имтиёзлар жорий этиш, ёшларнинг ўз ишини ташкил этишига кўмаклашиш ва микрокредитлар ажратиш каби тадбирлар ижобий самара бераётганини алоҳида таъкидлаш жоиз. Хусусан, бугунги ўтказилаётган тадбир – "Бир дарча” сайёр нуқтаси” тақдимоти бу борада анча самарали экани ўзи исботини топди. Тадбирда ўқувчилар ва уларнинг ота-оналари фаол иштирок этиб, янги иш ўринлари ҳақида хабар олиш, банкдан кредит олиш, гаров таъминоти, тадбиркорлик объекти учун ер олиш, қурилишга рухсат олиш, мулкни баҳолаш ва суғурталаш каби ўнлаб хизматлардан "бир дарча” орқали фойдаланиш имкониятига эга бўлишди.

Жорий ўқув йилида Амударё туманидаги ўрта махсус касб-ҳунар коллежлари ва академик лицейларни 2600 зиёд ўғил-қиз тамомлади. Уларнинг 509 нафари хусусий тадбиркорлик билан шуғулланиш истагини билдирган. Мазкур лойиҳанинг тақдимоти бўлғуси ёш тадбиркорларга катта имкониятлар эшигини очиб берди. Лойиҳа доирасидаги тадбирларда 138 нафар коллеж битирувчиларига тижорат банкларидан имтиёзли кредит олиш учун сертификатлар берилди.

Ғ.ЕШНИЁЗОВ