Амударё туманида тадбиркорлар билан очиқ мулоқот бўлиб ўтди
Мамлакатимизда иқтисодиётнинг асосий драйвери бўлган тадбиркорликни ривожлантириш, бизнес муҳитини янада яхшилаш, ишбилармон доира вакилларини ҳар томонлама қўллаб-қувватлаш ва уларнинг муаммоларини бевосита ўрганиш мақсадида давлат ва бизнес ўртасидаги мулоқот бутунлай янги босқичга кўтарилмоқда. Анъанавий равишда ўтказиб келинаётган Ўзбекистон Республикаси Президенти билан тадбиркорларнинг очиқ мулоқоти бунга яққол мисолдир. Яқин кунларда навбатдаги мулоқот ўтказилиши кутилмоқда. Ушбу нуфузли ва муҳим тадбирга ҳар томонлама тайёргарлик кўриш, жойлардаги ҳақиқий ҳолатни таҳлил қилиш ҳамда ишбилармонларнинг таклиф ва ташаббусларини тинглаш мақсадида республикамизнинг барча ҳудудлари бўйлаб турли вазирлик ва идоралар вакиллари иштирокида қатор учрашувлар ташкил этилмоқда.
Хусусан, Ўзбекистон Республикаси Саноат кооперацияси ва давлат харидлари агентлиги томонидан мамлакат бўйлаб тадбиркорлар билан юзма-юз, очиқ ва конструктив мулоқотлар мунтазам равишда ўтказиб келинмоқда. Бу каби тадбирлардан кўзланган асосий мақсад фақатгина муаммоларни қайд этиш эмас, балки уларнинг ечими бўйича шу жойнинг ўзида тезкор ва амалий чоралар кўриш, тизимли камчиликларни эса республика даражасида ҳал этиш учун умумлаштиришдан иборатдир.
Амударё туманида ҳам очиқ мулоқот форматида айнан мана шундай учрашув бўлиб ўтди. Маҳаллий тадбиркорлар, ишлаб чиқарувчилар ва бизнес вакилларини бир жойга жамлаган ушбу тадбирда қатор мутасадди раҳбарлар иштирок этди. Жумладан, учрашувга Ўзбекистон Республикаси Саноат кооперацияси ва давлат харидлари агентлиги директори ўринбосари Жаҳонгир Юнусов ҳамда Қорақалпоғистон Республикаси лойиҳа офиси раҳбари Алишер Аминов ташриф буюриб, амударёлик ишбилармонларининг дарду ташвишлари, келажакдаги режа ва мақсадлари билан яқиндан танишдилар.
Очиқ мулоқотни Амударё тумани ҳокимининг биринчи ўринбосари Фахриддин Юсупов кириш сўзи билан очди ва олиб борди. Тадбир давомида эркин ва самимий муҳит яратилиб, ҳар бир иштирокчига ўз фикрини баён этиш учун имконият берилди.
Учрашув мобайнида амударёлик тадбиркорларнинг турли йўналишлар ва ижтимоий-иқтисодий масалалар бўйича кўплаб мурожаатлари тингланди. Ишбилармонлар асосан ишлаб чиқариш ва хизмат кўрсатиш объектларини зарур инфратузилма билан таъминлаш, янги бизнес лойиҳаларни амалга ошириш учун ер майдонлари ажратиш, тижорат банкларидан имтиёзли кредит маблағларини олиш ва бошқа долзарб масалаларда мутасаддиларга юзландилар.
Мурожаатларнинг ҳар бири индивидуал тарзда кўриб чиқилиб, масъуллар томонидан аниқ, асосли ва ҳуқуқий жиҳатдан тўғри тушунтиришлар берилди. Эътиборлиси шундаки, кўтарилган қатор масалалар ва турли хилдаги муаммолар ваколатли идоралар вакиллари иштирокида шу ернинг ўзида, тезкорлик билан ижобий ҳал қилинди. Бу эса тадбиркорларнинг вақти ва маблағини тежашга, уларнинг эртанги кунга бўлган ишончини янада мустаҳкамлашга хизмат қилади.
Ўз навбатида, ечими маълум вақт талаб этадиган, қонунчиликка ўзгартириш киритишни тақозо қилувчи ёки кенг кўламли маблағларга эҳтиёж сезувчи тизимли муаммолар ва истиқболли таклифлар тўлиқ умумлаштирилди. Ушбу мурожаатлар тез кунларда бўлиб ўтиши кутилаётган Ўзбекистон Республикаси Президенти билан тадбиркорларнинг 6-Очиқ мулоқотига тайёргарлик кўрувчи махсус ишчи гуруҳга тақдим этиш учун рўйхатга олинди.
Бўлиб ўтган очиқ мулоқот давлат ва тадбиркор ўртасидаги ўзаро ишонч ва манфаатли ҳамкорликнинг ёрқин намунаси бўлди десак, муболаға бўлмайди. Бу каби юзма-юз учрашувлар жойлардаги ҳақиқий иқтисодий манзаранинг аниқ тасвирини яратишга ёрдам беради. Энг асосийси, амударёлик ишбилармонларининг овози, уларнинг муаммо ва таклифлари бевосита давлатимиз раҳбари даражасида эшитилиши учун мустаҳкам замин яратилди. Бу эса яқин келажакда ҳудудда янгидан-янги корхоналар қад рослашига, қўшимча иш ўринлари яратилишига ва халқимизнинг умумий фаровонлиги янада юксалишига хизмат қилиши шубҳасиз.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
