Божхона қўмитаси Раиси Қорақалпоғистон Республикаси тадбиркорлари билан очиқ мулоқот ўтказди

Сўнгги йилларда Қорақалпоғистон Республикаси иқтисодиётида кузатилаётган шиддатли ўзгаришлар ва тадбиркорлик муҳитидаги фаоллик бугунги кунда минтақанинг экспорт салоҳиятини янги босқичга олиб чиқмоқда. Бу жараёнда давлат ва бизнес вакиллари ўртасидаги тўғридан-тўғри мулоқотлар муҳим аҳамият касб этиб, тадбиркорларни ўйлантираётган муаммоларга жойида ечим топиш имконини бермоқда. Хусусан, Ўзбекистон Республикаси Божхона қўмитаси раиси Акмалхўжа Мавлонов ҳудудда фаолият юритаётган ишбилармонлар билан бевосита учрашиш ҳамда улар билан самимий мулоқот ўрнатиш мақсадида Нукус шаҳридаги “Оқ қуш” мажмуасида кенгайтирилган очиқ мулоқот ўтказди. Учрашувда Қорақалпоғистон Республикаси Жўқорғи Кенгеси Раиси Аманбай Оринбаев, тегишли вазирлик ва идоралар раҳбарлари, шунингдек, минтақа иқтисодиётининг асосий ҳаракатлантирувчи кучи бўлган кўплаб тадбиркорлар иштирок этди.

Тадбир аввалида Божхона қўмитаси раиси бу каби юзма-юз учрашувлар бутун Ўзбекистон бўйлаб тизимли равишда ўтказилаётганини таъкидлаб, бу галги мақсад Қорақалпоғистон ҳудудида тадбиркорлик соҳасида юзага келаётган масалаларни чуқур ўрганиш, уларни ҳал қилиш чораларини кўриш ҳамда ташқи савдо фаолиятини янада такомиллаштириш бўйича илгари сурилган таклифларни эшитиш эканлигини билдирди.

Мулоқот давомида қорақалпоқ халқининг меҳнаткашлиги ва тадбиркорлиги натижасида ҳудуд иқтисодиётида улкан ютуқларга эришилаётгани алоҳида эътироф этилди. Рақамларга эътибор қаратадиган бўлсак, бундан 8 йил олдин саноат маҳсулотларининг бор-йўғи 4 фоизи экспортга йўналтирилган бўлса, ҳозирги кунга келиб ушбу кўрсаткич 30 фоизга етган. Умумий экспорт ҳажми ҳам 3,5 карра ошиб, 2,1 млрд долларни ташкил қилгани соҳадаги ислоҳотларнинг амалий натижасидир. Келгуси 5 йил ичида эса саноат ва хизматлар соҳасида умумий қиймати 7,2 млрд долларга тенг бўлган йирик лойиҳаларни амалга ошириш режалаштирилган.

Эслатиб ўтиш жоизки, давлатимиз раҳбарининг жорий йил февраль ойида бўлиб ўтган йиғилишида барча имкониятларни ишга солган ҳолда Қорақалпоғистон бўйича саноат, хизматлар ва туризм экспортини 900 млн долларга етказиш муҳимлиги, бу кўрсаткич 2025 йилда 435 млн долларни ташкил этиши кутилаётгани таъкидланган эди. Шунингдек, ушбу ҳудудга киритилаётган тўғридан-тўғри хорижий инвестициялар ҳажмини 2,5 баробарга ошириш, яъни 2025 йилда 2,5 млрд долларга етказиш зарурлиги қайд этилган.

Яратилган бундай кенг имкониятлар ва қулай шарт-шароитлар туфайли ўтган йилнинг ўзида Қорақалпоғистоннинг товарлар ташқи савдо айланмаси 737 млн долларни ташкил этди. Минтақадаги чегара божхона постлари орқали эса 163 мингдан ортиқ транспорт воситалари ва 1,5 млн атрофидаги фуқароларнинг ҳаракатланиши таъминланди.

Тадбирда ташқи иқтисодий фаолият иштирокчилари, йирик экспортёрлар ва маҳаллий ишлаб чиқарувчиларнинг фаолияти давомида юзага келаётган тўсиқлар ва янги таклифлар қизғин муҳокама қилинди. Очиқ ва конструктив руҳда ўтган мулоқот давомида тадбиркорлар томонидан божхона расмийлаштируви жараёнларини соддалаштириш, экспорт-импорт операцияларини жадаллаштириш, логистика хизматларини яхшилаш, инфратузилмани ривожлантириш ҳамда ҳудуддаги ишбилармонлик муҳитини янада такомиллаштиришга қаратилган кўплаб мурожаатлар ўртага ташланди. Мутасадди раҳбарлар ҳар бир мурожаатни атрофлича ва чуқур кўриб чиқиб, уларнинг аксарияти юзасидан шу ернинг ўзида амалий ечимлар белгиладилар. Айрим масалалар жойида ўз ечимини топган бўлса, қўшимча вақт ва ўрганиш талаб этувчи мурожаатлар бўйича тегишли масъул ташкилотларга аниқ вазифалар юклатилди.

Тадбир доирасида товарлар ташқи савдосини амалга ошириш йўналишида 2025 йилнинг якунлари бўйича энг юқори кўрсаткичларга эришган ва минтақа иқтисодиётига муносиб ҳисса қўшган бир гуруҳ илғор тадбиркорлар Божхона қўмитаси раиси томонидан турли номинациялар бўйича тантанали равишда тақдирланди. Жумладан, энг яхши экспортёр номинацияси бўйича “Қўнғирот сода заводи” қўшма корхонаси раҳбари Шуҳратжан Шамуратов, “Божхона ҳудудида энг яхши қайта ишловчи” йўналишида “Хўжайли ун” корхонаси раҳбари Юсуфбек Каримов, энг интизомли ташқи иқтисодий фаолият иштирокчиси сифатида “Lan Extrakt” масъулияти чекланган жамияти раҳбари Мурат Гаиповлар тақдирланди.

Шунингдек, “Энг яхши аёл тадбиркор” номинациясида “Nukus kun qurilish” корхонаси раҳбари Айимхан Сапарова эътироф этилган бўлса, “Энг яхши божхона тўловлари тўловчиси” сифатида “Uz-Kor Gas Chemical” жамияти раҳбари Умиджан Исраилов тақдирланди. Бундан ташқари, тадбир давомида “Atiyaj-Gulzar” масъулияти чекланган жамиятига Божхона қўмитаси томонидан “Ваколатли иқтисодий оператор” мақоми берилганлиги муносабати билан махсус гувоҳнома топширилди.

Тадбиркорлар билан бундай очиқ ва самимий мулоқотларни мунтазам равишда ташкил этиш, уларни қийнаётган муаммоларни тезкорлик билан ҳал қилиш ва бизнес юритиш учун янада қулай шарт-шароитлар яратиш бутун мамлакат иқтисодиётини ривожлантиришнинг энг муҳим ва стратегик омилларидан бири ҳисобланади. Бўлиб ўтган ушбу учрашув якунида бизнес вакиллари томонидан билдирилган барча таклиф ва ташаббусларни ҳаётга татбиқ этиш бўйича истиқболли чора-тадбирлар дастури белгилаб олинди.