«Хавфсиз ва соғлом юрт» ойлиги доирасида профилактик тадбирлар ўтказилмоқда
Мамлакатимизда аҳолининг тинч ва фаровон ҳаётини кафолатлаш, маҳаллаларда жиноятчиликнинг барвақт олдини олиш ҳамда хавфсиз муҳитни яратиш давлат сиёсатининг устувор йўналишларидан бири сифатида белгиланган. Хусусан, Ўзбекистон Республикаси Президентининг маҳаллаларда хавфсиз муҳитни яратиш ва ҳуқуқбузарликларнинг олдини олиш тизими самарадорлигини янада оширишга қаратилган қарори ижросини сўзсиз таъминлаш мақсадида жойларда тизимли ишлар амалга оширилмоқда.
Айни кунларда Қорақалпоғистон Республикаси Ички ишлар вазирлиги ҳузуридаги Қўриқлаш хизмати ходимлари томонидан «Хавфсиз ва соғлом юрт» номли кенг қамровли тезкор профилактик тадбири ўтказилмоқда. Ушбу тадбир доирасида республикамизнинг барча ҳудудларида, жумладан, чекка туманларда ҳам фуқаролар осойишталигини мустаҳкамлаш бўйича кенг кўламли амалий ишлар олиб бориляпти. «Хавфсиз ҳудуд», «Хавфсиз маҳалла» ҳамда «Сифат, ишонч ва хавфсизлик» шиорлари остида ташкил этилаётган мазкур тадбирлар аҳолининг давлат ҳимоясига бўлган ишончини янада мустаҳкамлашга хизмат қилмоқда.
Бу борада олиб борилаётган саъй-ҳаракатларнинг ёрқин амалий ифодасини Амударё тумани мисолида ҳам яққол кўриш мумкин. Туман Ички ишлар бўлими ҳузуридаги Қўриқлаш хизмати ходимлари, профилактика инспекторлари ҳамда маҳалла еттилиги вакиллари билан яқин ҳамкорликда ҳудудларни жиноятчиликдан бутунлай холи минтақага айлантириш мақсадида мақсадли тарғибот ишларини олиб бормоқда. Жумладан, мазкур профилактик тадбирларнинг дастлабки босқичи тумандаги Навоий маҳалласи ҳудудида юқори савияда ташкил этилди.
Учрашувлар давомида фуқароларга бугунги кунда ҳаётимизга ва турмуш тарзимизга кенг татбиқ этилаётган замонавий қўриқлаш сигнализация ускуналарининг афзалликлари, уларнинг ишлаш тартиби тушунтирилди. Шунингдек, аҳоли вакиллари тезкор ҳаракатланувчи махсус гуруҳ ходимларининг хизмат фаолияти билан яқиндан таништирилиб, барча турдаги хизмат кўрсатиш объектлари ва аҳоли хонадонларига замонавий сигнализация воситаларини ўрнатиш орқали ўғирлик ва бошқа турдаги тажовузларнинг олдини олиш мумкинлиги ҳаётий мисоллар ёрдамида кенг очиб берилди.
Аҳолининг ҳуқуқий саводхонлиги ва ҳушёрлигини оширишга қаратилган тарғибот-ташвиқот ишлари тумандаги Гулзар маҳалласи ҳудудида ҳам ўтказилди. Очиқ мулоқотлар мобайнида асосий эътибор маҳаллаларда хавфсизликни таъминлаш ва уларни жиноятчиликдан холи ҳудудга айлантиришга қаратилди. Мутасаддилар томонидан ҳудудда жойлашган тадбиркорлик субъектлари, турли хил савдо ва хизмат кўрсатиш объектлари ҳамда фуқароларнинг яшаш хонадонларини ишончли қўриққа олиш нақадар муҳим аҳамиятга эга эканлиги алоҳида таъкидланди. Фуқароларнинг шахсий мол-мулкларини дахлсиз сақлашда замонавий қўриқлаш хизматининг имкониятларидан фойдаланиш зарурлиги тушунтирилди.
Маълумот ўрнида аниқ рақамларга тўхталадиган бўлсак, бугунги кунда Амударё тумани Ички ишлар бўлими ҳузуридаги қўриқлаш хизматининг техник қўриқлаш маркази томонидан жами 610 та объект ва 470 та фуқаро хонадонларига юқори сифатли ва ишончли қўриқлаш хизмати кўрсатиб келинмоқда. Бу рақамлар аҳолининг ва тадбиркорларнинг тизимга бўлган ишончи тобора ортиб бораётганидан далолатдир. Жойларда ўтказилган самарали тушунтириш ишлари натижасида тадбир кунларининг ўзидаёқ кўплаб янги объектлар ва яшаш хонадонлари қўриққа олиниб, уларга кафолатланган ишончли хизмат кўрсатиш йўлга қўйилди.
Фуқароларнинг тинч ва осуда ҳаётини таъминлаш, уларнинг мол-мулкини турли хил жиноий тажовузлардан асрашга қаратилган бу каби кенг қамровли профилактик тадбирлар фақатгина маълум ҳудудлар билан чекланиб қолмайди. Асосий мақсад – ҳар бир овул ва маҳаллада қонун устуворлигини таъминлаш ва халқ осойишталигини мустаҳкамлашдир. Айни шу эзгу мақсад йўлида хавфсизликни таъминлаш борасидаги тарғибот ва амалий ишлар туманнинг барча ҳудудлари бўйлаб изчил давом эттирилмоқда.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
