«Xavfsiz va sogʻlom yurt» oyligi doirasida profilaktik tadbirlar oʻtkazilmoqda

Mamlakatimizda aholining tinch va farovon hayotini kafolatlash, mahallalarda jinoyatchilikning barvaqt oldini olish hamda xavfsiz muhitni yaratish davlat siyosatining ustuvor yoʻnalishlaridan biri sifatida belgilangan. Xususan, Oʻzbekiston Respublikasi Prezidentining mahallalarda xavfsiz muhitni yaratish va huquqbuzarliklarning oldini olish tizimi samaradorligini yanada oshirishga qaratilgan qarori ijrosini soʻzsiz taʼminlash maqsadida joylarda tizimli ishlar amalga oshirilmoqda.

Ayni kunlarda Qoraqalpogʻiston Respublikasi Ichki ishlar vazirligi huzuridagi Qoʻriqlash xizmati xodimlari tomonidan «Xavfsiz va sogʻlom yurt» nomli keng qamrovli tezkor profilaktik tadbiri oʻtkazilmoqda. Ushbu tadbir doirasida respublikamizning barcha hududlarida, jumladan, chekka tumanlarda ham fuqarolar osoyishtaligini mustahkamlash boʻyicha keng koʻlamli amaliy ishlar olib borilyapti. «Xavfsiz hudud», «Xavfsiz mahalla» hamda «Sifat, ishonch va xavfsizlik» shiorlari ostida tashkil etilayotgan mazkur tadbirlar aholining davlat himoyasiga boʻlgan ishonchini yanada mustahkamlashga xizmat qilmoqda.

Bu borada olib borilayotgan saʼy-harakatlarning yorqin amaliy ifodasini Amudaryo tumani misolida ham yaqqol koʻrish mumkin. Tuman Ichki ishlar boʻlimi huzuridagi Qoʻriqlash xizmati xodimlari, profilaktika inspektorlari hamda mahalla yettiligi vakillari bilan yaqin hamkorlikda hududlarni jinoyatchilikdan butunlay xoli mintaqaga aylantirish maqsadida maqsadli targʻibot ishlarini olib bormoqda. Jumladan, mazkur profilaktik tadbirlarning dastlabki bosqichi tumandagi Navoiy mahallasi hududida yuqori saviyada tashkil etildi.

Uchrashuvlar davomida fuqarolarga bugungi kunda hayotimizga va turmush tarzimizga keng tatbiq etilayotgan zamonaviy qoʻriqlash signalizatsiya uskunalarining afzalliklari, ularning ishlash tartibi tushuntirildi. Shuningdek, aholi vakillari tezkor harakatlanuvchi maxsus guruh xodimlarining xizmat faoliyati bilan yaqindan tanishtirilib, barcha turdagi xizmat koʻrsatish obʼektlari va aholi xonadonlariga zamonaviy signalizatsiya vositalarini oʻrnatish orqali oʻgʻirlik va boshqa turdagi tajovuzlarning oldini olish mumkinligi hayotiy misollar yordamida keng ochib berildi.

Aholining huquqiy savodxonligi va hushyorligini oshirishga qaratilgan targʻibot-tashviqot ishlari tumandagi Gulzar mahallasi hududida ham oʻtkazildi. Ochiq muloqotlar mobaynida asosiy eʼtibor mahallalarda xavfsizlikni taʼminlash va ularni jinoyatchilikdan xoli hududga aylantirishga qaratildi. Mutasaddilar tomonidan hududda joylashgan tadbirkorlik subʼektlari, turli xil savdo va xizmat koʻrsatish obʼektlari hamda fuqarolarning yashash xonadonlarini ishonchli qoʻriqqa olish naqadar muhim ahamiyatga ega ekanligi alohida taʼkidlandi. Fuqarolarning shaxsiy mol-mulklarini daxlsiz saqlashda zamonaviy qoʻriqlash xizmatining imkoniyatlaridan foydalanish zarurligi tushuntirildi.

Maʼlumot oʻrnida aniq raqamlarga toʻxtaladigan boʻlsak, bugungi kunda Amudaryo tumani Ichki ishlar boʻlimi huzuridagi qoʻriqlash xizmatining texnik qoʻriqlash markazi tomonidan jami 610 ta obʼekt va 470 ta fuqaro xonadonlariga yuqori sifatli va ishonchli qoʻriqlash xizmati koʻrsatib kelinmoqda. Bu raqamlar aholining va tadbirkorlarning tizimga boʻlgan ishonchi tobora ortib borayotganidan dalolatdir. Joylarda oʻtkazilgan samarali tushuntirish ishlari natijasida tadbir kunlarining oʻzidayoq koʻplab yangi obʼektlar va yashash xonadonlari qoʻriqqa olinib, ularga kafolatlangan ishonchli xizmat koʻrsatish yoʻlga qoʻyildi.

Fuqarolarning tinch va osuda hayotini taʼminlash, ularning mol-mulkini turli xil jinoiy tajovuzlardan asrashga qaratilgan bu kabi keng qamrovli profilaktik tadbirlar faqatgina maʼlum hududlar bilan cheklanib qolmaydi. Asosiy maqsad – har bir ovul va mahallada qonun ustuvorligini taʼminlash va xalq osoyishtaligini mustahkamlashdir. Ayni shu ezgu maqsad yoʻlida xavfsizlikni taʼminlash borasidagi targʻibot va amaliy ishlar tumanning barcha hududlari boʻylab izchil davom ettirilmoqda.