Тадбиркорлар ва солиқ мутасаддилари ўртасида очиқ мулоқот бўлиб ўтди
Мамлакатимизда хусусий секторни қўллаб-қувватлаш, ишбилармонлик муҳитини янада ривожлантириш ва тадбиркорларнинг эркин фаолият юритиши учун кенг имкониятлар яратиш давлат иқтисодий сиёсатининг энг устувор йўналишларидан бирига айланган. Бугунги кунда жойларда давлат идоралари мутасаддилари ва бизнес субъектлари ўртасида ўтказилаётган юзма-юз учрашувлар ҳамда очиқ мулоқотлар айнан мана шу эзгу мақсадга хизмат қилмоқда. Амударё туманида ҳам бу борада тизимли ва самарали ишлар амалга ошириб келинмоқда. Ҳудудлардаги ривожланиш суръатларини бевосита белгилаб берувчи бундай амалий тадбирлар ишбилармон қатлам билан мулоқотнинг энг шаффоф усули сифатида ўзини тўла оқламоқда.
Яқинда Амударё туманида маҳаллий ишбилармонлар, хусусий сектор вакиллари ҳамда масъул раҳбарлар иштирокида ана шундай муҳим ва конструктив руҳдаги очиқ мулоқот ташкил этилди. Мазкур тадбирда Қорақалпоғистон Республикаси солиқ бошқармаси бошлиғининг биринчи ўринбосари Имаматдин Оразбаев ҳамда Амударё тумани ҳокимининг ўринбосари Ҳамза Ҳайтимбетовлар иштирок этиб, ҳудуддаги тадбиркорлик субъектлари вакиллари билан бевосита ва самимий суҳбат қурдилар. Ушбу учрашувнинг асосий мақсади фақатгина қонунчиликдаги янгиликларни етказиш эмас, балки тадбиркорларни қийнаётган долзарб масалаларни жойида ўрганиш ва уларга тезкор амалий кўмак беришдан иборат бўлди.
Учрашув давомида Қорақалпоғистон Республикаси солиқ бошқармаси бошлиғининг биринчи ўринбосари амударёлик тадбиркорларга солиқ соҳасида амалга оширилаётган сўнгги ўзгаришлар, хусусан, Ўзбекистон Республикаси Президентининг 2026 йил 26 майдаги “Кичик бизнес субъектларининг ўсиши учун янада қулай иқтисодий ва маъмурий шарт-шароитлар яратиш тўғрисида”ги Фармони мазмун-моҳияти ҳақида атрофлича маълумот берди.
Мазкур ҳужжат асосида ҳудудларда ишбилармонлик муҳитини тубдан яхшилаш, солиқ маъмуриятчилигини соддалаштириш бўйича қатор янгиликлар жорий қилиниб, тадбиркорлик субъектларига берилаётган янги имкониятлар кўлами тобора кенгайиб бораётгани алоҳида таъкидланди. Мулоқот жараёнида тадбиркорлар сафини янада кенгайтириш, уларни ҳар томонлама қўллаб-қувватлаш, яратилаётган шарт-шароитлардан самарали ҳамда мақсадли фойдаланишни таъминлаш юзасидан ўзаро фикр алмашилди. Шунингдек, солиқ қонунчилигига киритилган сўнгги янгиликлар ҳақида батафсил сўз юритилиб, хусусий сектор вакилларининг бу борадаги ҳуқуқий саводхонлигини оширишга жиддий эътибор қаратилди.
Очиқ мулоқот форматида, қизғин баҳс-мунозараларга бой тарзда ўтган тадбирда ишбилармонлар ўзларини ўйлантираётган мавжуд муаммолар, фаолиятдаги тўсиқлар ва соҳани янада ривожлантиришга оид таклифларини эркин баён этиш имконига эга бўлдилар. Хусусан, тадбиркорларнинг солиқ имтиёзларини амалиётда тўғри қўллаш, нотурар жой объектларига мол-мулк солиғини ҳисоблашнинг ўзига хос жиҳатлари, қўшилган қиймат солиғини қайтариш жараёнларини тезлаштириш ҳамда солиқ ҳисоботларини ўз вақтида, хатосиз топшириш билан боғлиқ кўплаб мурожаатлари диққат билан тингланди. Энг муҳими, мутасаддилар томонидан кўтарилган ҳар бир мурожаат алоҳида назоратга олиниб, уларни жойида ва ижобий ҳал этиш бўйича тезкор чора-тадбирлар белгиланди.
Солиқ идоралари масъуллари ва хусусий сектор вакиллари ўртасидаги бу каби шаффоф ҳамда амалий мулоқотлар тадбиркорларнинг эртанги кунга бўлган ишончини янада мустаҳкамлашга хизмат қилади. Давлат ва бизнес ўртасидаги ўзаро ишонч ва манфаатли ҳамкорлик асосида қурилган бундай муносабатлар нафақат Амударё туманининг, балки бутун Қорақалпоғистон Республикасининг иқтисодий салоҳиятини юксалтиришга, янги иш ўринларини яратишга ва пировард натижада халқимиз фаровонлигини оширишга улкан ҳисса қўшади. Бу йўлда давлат томонидан яратилаётган ҳар бир имконият ўзининг юксак самарасини бериши шубҳасиздир.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
