Соғлом овқатланиш маданияти

Инсон организми деярли барча зарур моддаларни озиқ-овқат ва сув орқали олади. Озиқ-овқат маҳсулотларининг таркиби ва уларнинг хусусиятлари саломатлик, жисмоний ривожланиш, меҳнат қобилияти ҳамда умр кўриш давомийлиги ва сифатига бевосита таъсир қилади. Шунинг учун биз, катталар, ўзимиз ва фарзандларимиз маънан ҳам, жисмонан ҳам соғлом тарзда вояга етиши учун тўғри овқатланиш тамойилларига риоя қилишимиз зарур. Халқимизда: «Соғ танда — соғлом ақл», деган нақл бежиз айтилмаган.

Ўқувчи ёшларнинг бўш вақтини унумли ва мароқли ўтказиш мақсадида туманимиздаги 1-сонли ўрта таълим мактабида 4 июн куни «Тўғри овқатланиш маданияти» мавзусида давра суҳбати бўлиб ўтди. Семинарни табиий фан ўқитувчилари — Матякупова Барно, Уразбоева Дилфуза, Қодирова Дилноза, Рустамова Ирода, Ибрагимова Инобат, Ҳожибоева Умида ва Ўразбоева Дилафруз опалар олиб борди. Унда 5–8-синф ўқувчилари иштирок этди.

Мактаб ўқитувчиларининг мақсади соғлом овқатланишнинг инсон организмига қай даражада фойдали эканини тушунтириш, ўқувчи ёшларга ушбу мавзу бўйича тўғри ва етарлича тушунча бериш, шу орқали уларнинг билим ва малакасини бойитишдан иборат эди.

Семинарда Матякупова Барно opa айниқса ёз ойларида тавсия этиладиган маҳсулотлар ҳақида ўз билимларини ўқувчиларга улушди. Хусусан, янги узилган мевалар ва сабзавотлар, қуритилган ёнғоқ, парранда гўшти (таркибида A, B, E витаминлари мавжудлиги учун), сут маҳсулотлари ва кўпроқ асал истеъмол қилиш тавсия этилди. Шу билан бирга, организмда ёғ тўпланишига олиб келадиган маҳсулотларни овқатланиш рационларидан қисқартириш кераклиги таъкидланди.

Булар қаторига турли хил чипслар, попкорнлар, тузланган ёнғоқ, фастфудлар, ҳар қандай ярим тайёр маҳсулотлар, айниқса шакар миқдори юқори бўлган ширинликлар, дудланган гўшт ва колбасалар инсон саломатлигига зарарли экани қайд этилди.

Семинар якунида ўқувчиларнинг онгида соғлом овқатланишнинг тартиб-қоидалари анча мустаҳкам шаклланди ва тадбир фойдали ҳамда мазмунли тарзда якунланди.

Мутаҳассисларнинг фикрича, инсоннинг қанча умр кўриши 60–70 фоиз ҳолатда тўғри ва тартибли таомланишга боғлиқ экан. Шунинг учун умримизни узайтириш учун соғлигимизга эътиборли бўлишимиз шарт. Донo халқимиз бежизга «Тан саломати — жон роҳати» деб таъкидламайди.

Инобат Одилбоева, 1-сонли мактабнинг она тили ва адабиёт ўқитувчиси