“Соғломлаштириш ойлиги” тадбири доирасида аҳолига тиббий хизматлар янада яқинлашмоқда

Соғлом миллат — тараққиёт кафолати, деган ҳақиқат бугун ҳар қачонгидан ҳам долзарб аҳамият касб этмоқда. Айниқса, аҳолининг саломатлигини асраш, профилактика ишларини кучайтириш, касалликларни эрта аниқлаш ва малакали даволаш хизматини жойларда ташкил этиш — бугунги ислоҳотларнинг устувор йўналишидир. Чунки соғлом халқ — барқарор тараққиётнинг пойдеворидир.

Шу мақсадда, Соғлиқни сақлаш вазирлиги ташаббуси билан мамлакатимиз бўйлаб “Соғломлаштириш ойлиги” ўтказилаётгани соҳадаги ислоҳотларнинг яна бир амалий тасдиғидир. Ушбу тадбир доирасида тиббий хизматни ҳар бир хонадонга яқинлаштириш, касалликларни эрта аниқлаш ва уларни ўз вақтида даволашга қаратилган комплекс чора-тадбирлар амалга оширилмоқда.

Бугунги кунда жаҳонда кечаётган глобал ўзгаришлар ва янги хавф-хатарлар фонида ҳар бир давлат ўз салоҳиятини соғлом инсон капитали орқали мустаҳкамламоқда. Шу боис, Ўзбекистонда соғлиқни сақлаш тизимини замон талаблари асосида такомиллаштириш, тиббий хизмат сифатини жаҳон стандартларига мослаштиришга алоҳида эътибор қаратиляпти. Бу борада жойларда ўтказилаётган профилактик тадбирларнинг ўрни алоҳида.

Қорақалпоғистон Республикаси Соғлиқни сақлаш вазирлиги ҳамда Амударё туман тиббиёт бирлашмаси ҳамкорлигида туманда “Соғломлаштириш ойлиги” самарали ташкил этилди. Айниқса, эҳтиёжманд ва ижтимоий ҳимояга муҳтож аҳолини тиббий кўриклар билан қамраб олишга алоҳида эътибор қаратилди.

Тадбир доирасида терапевт, педиатр, невропатолог, кардиолог, офтальмолог, уролог, акушер-гинеколог ва онколог каби соҳанинг малакали мутахассислари иштирокида кенг қамровли тиббий кўриклар ўтказилди. Шунингдек, УТТ, рентген, ЭКГ ва қон таҳлиллари каби лаборатория текширувлари амалга оширилди. Яқинда ташкил этилган тадбирда 268 нафар фуқаро тиббий кўрикдан ўтказилиб, шундан 265 нафари амбулатор, 3 нафари эса стационар даволанишга йўналтирилди.

Алоҳида таъкидлаш жоизки, кўриклар давомида аниқланган касалликлар орасида юрак-қон томир, қандли диабет ва неврологик хасталиклар устунлик қилди. Бу аҳоли орасида ушбу касалликлар профилактикасига янада катта эътибор қаратиш зарурлигини кўрсатмоқда. Айниқса, ёшлар ва меҳнатга лаёқатли аҳоли ўртасида соғлом турмуш тарзини тарғиб қилиш, жисмоний фаолликни ошириш каби чора-тадбирлар кун тартибига чиқмоқда.

Кўриклар натижасида аниқланган хасталиклар “Д” ҳисобга олиниб, зарур муолажалар белгиланди ва беморлар мунтазам назоратга олинди. Бу эса фуқароларнинг соғлиғини эрта босқичда тиклаш имконини яратди.

Тадбир доирасида аҳоли ўртасида соғлом турмуш тарзи, тўғри овқатланиш, жисмоний фаоллик ва зарарли одатларнинг саломатликка салбий таъсири ҳақида кенг қамровли тарғибот-ташвиқот ишлари олиб борилди. Бу юзасидан буклет ва эсдалик материаллари тарқатилди. Натижада кўпчиликда ўз саломатлигига масъулиятли ёндашув шакллана бошлади. Айниқса, аёллар ва кексалар ўртасида ўтказилган скрининг кўриклари орқали эрта аниқланган касалликларни даволаш имконияти яратилди.

Таъкидлаш жоизки, “Соғломлаштириш ойлиги” каби тадбирлар нафақат аҳоли саломатлигини мустаҳкамлаш, балки жамиятда тиббий маданиятни ошириш, касалликларни эрта аниқлаш ва самарали даволашга хизмат қилмоқда. Бундай ташаббусларнинг доимий асосда ташкил этилиши ҳар бир фуқаронинг ҳаёт сифатини оширишга, мамлакат тараққиёти ва инсон капиталининг юксалишига замин яратади. Чунки соғлом ва баркамол инсонларгина юрт равнақига муносиб ҳисса қўша олади.

Шоҳзод Қурбонбоев.