“Sogʻlomlashtirish oyligi” tadbiri doirasida aholiga tibbiy xizmatlar yanada yaqinlashmoqda

Sogʻlom millat — taraqqiyot kafolati, degan haqiqat bugun har qachongidan ham dolzarb ahamiyat kasb etmoqda. Ayniqsa, aholining salomatligini asrash, profilaktika ishlarini kuchaytirish, kasalliklarni erta aniqlash va malakali davolash xizmatini joylarda tashkil etish — bugungi islohotlarning ustuvor yoʻnalishidir. Chunki sogʻlom xalq — barqaror taraqqiyotning poydevoridir.

Shu maqsadda, Sogʻliqni saqlash vazirligi tashabbusi bilan mamlakatimiz boʻylab “Sogʻlomlashtirish oyligi” oʻtkazilayotgani sohadagi islohotlarning yana bir amaliy tasdigʻidir. Ushbu tadbir doirasida tibbiy xizmatni har bir xonadonga yaqinlashtirish, kasalliklarni erta aniqlash va ularni oʻz vaqtida davolashga qaratilgan kompleks chora-tadbirlar amalga oshirilmoqda.

Bugungi kunda jahonda kechayotgan global oʻzgarishlar va yangi xavf-xatarlar fonida har bir davlat oʻz salohiyatini sogʻlom inson kapitali orqali mustahkamlamoqda. Shu bois, Oʻzbekistonda sogʻliqni saqlash tizimini zamon talablari asosida takomillashtirish, tibbiy xizmat sifatini jahon standartlariga moslashtirishga alohida eʼtibor qaratilyapti. Bu borada joylarda oʻtkazilayotgan profilaktik tadbirlarning oʻrni alohida.

Qoraqalpogʻiston Respublikasi Sogʻliqni saqlash vazirligi hamda Amudaryo tuman tibbiyot birlashmasi hamkorligida tumanda “Sogʻlomlashtirish oyligi” samarali tashkil etildi. Ayniqsa, ehtiyojmand va ijtimoiy himoyaga muhtoj aholini tibbiy koʻriklar bilan qamrab olishga alohida eʼtibor qaratildi.

Tadbir doirasida terapevt, pediatr, nevropatolog, kardiolog, oftalmolog, urolog, akusher-ginekolog va onkolog kabi sohaning malakali mutaxassislari ishtirokida keng qamrovli tibbiy koʻriklar oʻtkazildi. Shuningdek, UTT, rentgen, EKG va qon tahlillari kabi laboratoriya tekshiruvlari amalga oshirildi. Yaqinda tashkil etilgan tadbirda 268 nafar fuqaro tibbiy koʻrikdan oʻtkazilib, shundan 265 nafari ambulator, 3 nafari esa statsionar davolanishga yoʻnaltirildi.

Alohida taʼkidlash joizki, koʻriklar davomida aniqlangan kasalliklar orasida yurak-qon tomir, qandli diabet va nevrologik xastaliklar ustunlik qildi. Bu aholi orasida ushbu kasalliklar profilaktikasiga yanada katta eʼtibor qaratish zarurligini koʻrsatmoqda. Ayniqsa, yoshlar va mehnatga layoqatli aholi oʻrtasida sogʻlom turmush tarzini targʻib qilish, jismoniy faollikni oshirish kabi chora-tadbirlar kun tartibiga chiqmoqda.

Koʻriklar natijasida aniqlangan xastaliklar “D” hisobga olinib, zarur muolajalar belgilandi va bemorlar muntazam nazoratga olindi. Bu esa fuqarolarning sogʻligʻini erta bosqichda tiklash imkonini yaratdi.

Tadbir doirasida aholi oʻrtasida sogʻlom turmush tarzi, toʻgʻri ovqatlanish, jismoniy faollik va zararli odatlarning salomatlikka salbiy taʼsiri haqida keng qamrovli targʻibot-tashviqot ishlari olib borildi. Bu yuzasidan buklet va esdalik materiallari tarqatildi. Natijada koʻpchilikda oʻz salomatligiga masʼuliyatli yondashuv shakllana boshladi. Ayniqsa, ayollar va keksalar oʻrtasida oʻtkazilgan skrining koʻriklari orqali erta aniqlangan kasalliklarni davolash imkoniyati yaratildi.

Taʼkidlash joizki, “Sogʻlomlashtirish oyligi” kabi tadbirlar nafaqat aholi salomatligini mustahkamlash, balki jamiyatda tibbiy madaniyatni oshirish, kasalliklarni erta aniqlash va samarali davolashga xizmat qilmoqda. Bunday tashabbuslarning doimiy asosda tashkil etilishi har bir fuqaroning hayot sifatini oshirishga, mamlakat taraqqiyoti va inson kapitalining yuksalishiga zamin yaratadi. Chunki sogʻlom va barkamol insonlargina yurt ravnaqiga munosib hissa qoʻsha oladi.

Shohzod Qurbonboyev.