“Olympia” МЧЖ билан ҳамкорликда “Кенгру – 2025” Халқаро математика танлови ўтказилди

Умумий ўрта таълим мактаблари ўқувчилари орасидан математика фанига қизиқувчи, интилувчан ва ижодкор ёшларни аниқлаш, уларнинг ижодий қобилиятларни рўёбга чиқаришга кўмаклашиш, қўллаб-қувватлаш ҳамда рағбатлантириш мақсадида Қорақалпоғистон Республикаси Мактабгача ва мактаб таълими вазирлиги томонидан “Olympia” МЧЖ билан ҳамкорликда Амударё туманидаги 30- ва 40-сонли мактабларда тумандаги умумий ўрта таълим мактабларининг 2-11-синф ўқувчилари ўртасида “Кенгуру – 2025” халқаро математика танлови ўтказилди.

25 март куни бўлиб ўтган танловга туманимиздаги 86 та умумий ўрта таълим мактабларининг Olympia.uz веб сайти орқали онлайн рўйхатдан ўтган 2-11-синф ўқувчиларидан 700 нафарга яқин математика фанига қизиқувчи, иқтидорли ёшлар қатнашдилар.

“Кенгуру – 2025” халқаро математика танловининг очилиш маросимида Қорақалпоғистон Республикаси Мактабгача ва мактаб таълими вазирлигининг фанлар олимпиадаси бўйича Иқтидорли болалар билан ишлаш сектори методисти Фазилат Зарифова, Амударё туман Мактабгача ва мактаб таълими бўлими бошлиғи Ялғашбой Шамуратов, бўлимнинг Мактаблар фаолиятини мувофиқлаштириш шўъбаси методисти Райҳон Якубова, 30-сонли мактаб директори Қувват Ниязов, 40-сонли мактаб директори Санобар Хўжамуратова ҳамда мактаблардан белгиланган малакали мутахассис кузатувчилар иштирок этдилар.

Танловнинг очилиш маросимида Амударё туман Мактабгача ва мактаб таълими бўлими бошлиғи Ялғашбой Шамуратов “Кенгуру – 2025” халқаро математика танлови ташкилоти ҳақида батафсил маълумот бериб ўтди.

Таъкидланганидек, “Olympia” МЧЖ 2017 йил ноябрь ойида ташкил этилган бўлиб, Ўзбекистондаги умумтаълим мактаблари ва мактабгача таълим муассасаларида халқаро, оммавий, таълим танловларини ўтказишни бошлаган биринчи ташкилот саналади. Бугунги кунга қадар ташкилот математика, инглиз тили, рус тили, табиатшунослик фанлари каби турли йўналишларда танловлар ўтказиб келмоқда. Хусусан, “Кенгуру” математика танловида бутун дунё бўйлаб 6 миллиондан ортиқ мактаб ўқувчилари иштирок этишади.

Тадбирда 40-сонли мактаб директори Санобар Хўжамуратова “Кенгуру – 2025” халқаро математика танловининг мақсад ва вазифалари ҳақида иштирокчиларга зарур тушунчалар тақдим этди. Танлови учун назорат материаллари “Кенгуру” танлови вакиллари томонидан тузилганлиги ва ташкилотнинг масъул ходими томонидан чоп этилиб, махфийлиги таъминланган ҳолда танлов ўтказиладиган куни жойларга махсус назорат материаллари солинган қопда етказиб берилиши, танлов қатъий назорат асосида, мутлақо шаффоф тарзда амалга оширилиши таъкидланди.

Танлов аввалида ўқувчилар сонига мос равишда синфларга жавоблар варақалари, ҳар бир синф учун тузилган саволлар китобчаси, иштирокчи ўқувчилар учун “Кенгуру” танлови томонидан эсдалик совғалар олиб келинди ҳамда иштирокчиларга тарқатилди.

Шундан сўнг ҳар бир мактаб учун белгиланган координатор ва кузатувчилар иштирокида тегишли хоналарда “Кенгуру” танловининг асосий жараёни бошланди.

2-4-синфлар учун 24 та, 5-11-синфлар учун 30 та математика ва мантиқий фикрлашга доир саволли тест китобчаси ҳамда жавоблар варақаси татарқатилди ва 1 соат 15 дақиқа вақт берилди.

Белгиланган вақтдан кейин кузатувчилар томонидан иштирокчиланинг жавоб варақалари Вазирлик маъсул ходимига тақдим қилиниб, алоҳида пакетга солинди ва муҳрланган ҳолда танлов вакилига етказилди. Танлов ёш математикларимизнинг фаоллиги асосида, ошкоралик ва жипслик руҳида ўтди.

Бу каби танловларнинг ўтказилиши таълим муассалари ўқувчилари орасидан математика фани бўйича билимли, интилувчан ва ижодкор ёшларни аниқлаш билан бирга, ўқувчиларда мантиқий фикрлашни ривожлантириш ва уларнинг билимларини объектив баҳолашга хизмат қилади.

Райҳон Якубова, Амударё туман ММТБнинг мактаблар фаолиятини мувофиқлаштириш шўъбаси методисти.