“Olympia” MChJ bilan hamkorlikda “Kengru – 2025” Xalqaro matematika tanlovi oʻtkazildi

Umumiy oʻrta taʼlim maktablari oʻquvchilari orasidan matematika faniga qiziquvchi, intiluvchan va ijodkor yoshlarni aniqlash, ularning ijodiy qobiliyatlarni roʻyobga chiqarishga koʻmaklashish, qoʻllab-quvvatlash hamda ragʻbatlantirish maqsadida Qoraqalpogʻiston Respublikasi Maktabgacha va maktab taʼlimi vazirligi tomonidan “Olympia” MChJ bilan hamkorlikda Amudaryo tumanidagi 30- va 40-sonli maktablarda tumandagi umumiy oʻrta taʼlim maktablarining 2-11-sinf oʻquvchilari oʻrtasida “Kenguru – 2025” xalqaro matematika tanlovi oʻtkazildi.

25-mart kuni boʻlib oʻtgan tanlovga tumanimizdagi 86 ta umumiy oʻrta taʼlim maktablarining Olympia.uz veb sayti orqali onlayn roʻyxatdan oʻtgan 2-11-sinf oʻquvchilaridan 700 nafarga yaqin matematika faniga qiziquvchi, iqtidorli yoshlar qatnashdilar.

“Kenguru – 2025” xalqaro matematika tanlovining ochilish marosimida Qoraqalpogʻiston Respublikasi Maktabgacha va maktab taʼlimi vazirligining fanlar olimpiadasi boʻyicha Iqtidorli bolalar bilan ishlash sektori metodisti Fazilat Zarifova, Amudaryo tuman Maktabgacha va maktab taʼlimi boʻlimi boshligʻi Yalgʻashboy Shamuratov, boʻlimning Maktablar faoliyatini muvofiqlashtirish shoʻʼbasi metodisti Rayhon Yakubova, 30-sonli maktab direktori Quvvat Niyazov, 40-sonli maktab direktori Sanobar Xoʻjamuratova hamda maktablardan belgilangan malakali mutaxassis kuzatuvchilar ishtirok etdilar.

Tanlovning ochilish marosimida Amudaryo tuman Maktabgacha va maktab taʼlimi boʻlimi boshligʻi Yalgʻashboy Shamuratov “Kenguru – 2025” xalqaro matematika tanlovi tashkiloti haqida batafsil maʼlumot berib oʻtdi.

Taʼkidlanganidek, “Olympia” MChJ 2017-yil noyabr oyida tashkil etilgan boʻlib, Oʻzbekistondagi umumtaʼlim maktablari va maktabgacha taʼlim muassasalarida xalqaro, ommaviy, taʼlim tanlovlarini oʻtkazishni boshlagan birinchi tashkilot sanaladi. Bugungi kunga qadar tashkilot matematika, ingliz tili, rus tili, tabiatshunoslik fanlari kabi turli yoʻnalishlarda tanlovlar oʻtkazib kelmoqda. Xususan, “Kenguru” matematika tanlovida butun dunyo boʻylab 6 milliondan ortiq maktab oʻquvchilari ishtirok etishadi.

Tadbirda 40-sonli maktab direktori Sanobar Xoʻjamuratova “Kenguru – 2025” xalqaro matematika tanlovining maqsad va vazifalari haqida ishtirokchilarga zarur tushunchalar taqdim etdi. Tanlovi uchun nazorat materiallari “Kenguru” tanlovi vakillari tomonidan tuzilganligi va tashkilotning masʼul xodimi tomonidan chop etilib, maxfiyligi taʼminlangan holda tanlov oʻtkaziladigan kuni joylarga maxsus nazorat materiallari solingan qopda yetkazib berilishi, tanlov qatʼiy nazorat asosida, mutlaqo shaffof tarzda amalga oshirilishi taʼkidlandi.

Tanlov avvalida oʻquvchilar soniga mos ravishda sinflarga javoblar varaqalari, har bir sinf uchun tuzilgan savollar kitobchasi, ishtirokchi oʻquvchilar uchun “Kenguru” tanlovi tomonidan esdalik sovgʻalar olib kelindi hamda ishtirokchilarga tarqatildi.

Shundan soʻng har bir maktab uchun belgilangan koordinator va kuzatuvchilar ishtirokida tegishli xonalarda “Kenguru” tanlovining asosiy jarayoni boshlandi.

2-4-sinflar uchun 24 ta, 5-11-sinflar uchun 30 ta matematika va mantiqiy fikrlashga doir savolli test kitobchasi hamda javoblar varaqasi tatarqatildi va 1 soat 15 daqiqa vaqt berildi.

Belgilangan vaqtdan keyin kuzatuvchilar tomonidan ishtirokchilaning javob varaqalari Vazirlik maʼsul xodimiga taqdim qilinib, alohida paketga solindi va muhrlangan holda tanlov vakiliga yetkazildi. Tanlov yosh matematiklarimizning faolligi asosida, oshkoralik va jipslik ruhida oʻtdi.

Bu kabi tanlovlarning oʻtkazilishi taʼlim muassalari oʻquvchilari orasidan matematika fani boʻyicha bilimli, intiluvchan va ijodkor yoshlarni aniqlash bilan birga, oʻquvchilarda mantiqiy fikrlashni rivojlantirish va ularning bilimlarini obʼektiv baholashga xizmat qiladi.

Rayhon Yakubova, Amudaryo tuman MMTBning maktablar faoliyatini muvofiqlashtirish shoʻʼbasi metodisti.