“Ватанпарварлик” ойлиги доирасида ташкил этилаётган тадбирлар ёшларни ҳарбий-ватанпарварлик руҳида тарбиялашга хизмат қилади
13 январь куни Қиличбой овулидаги Чегарани қўриқлаш взводида “Ватанпарварлик” ойлиги доирасида “Очиқ эшиклар куни” тадбири бўлиб ўтди. Тадбирда туман Мудофаа ишлари бўлими бошлиғи майор Шуҳрат Маматов, Қуролли кучлар ишчи хизматчиси Қуролбой Ҳайтбоев, взводнинг тарбиявий ва маънавий ишлар бўйича йўриқчиси, сержант Рустам Ваҳобов, муддатли ҳарбий хизматчилар ва 69-, 70-, 83-сонли умумтаълим мактабларининг 9-, 11-синф ўқувчилари фаол иштирок этди.
Тадбирнинг асосий мақсади – ёшлар қалбида она-Ватанга бўлган муҳаббат ва садоқат туйғусини мустаҳкамлаш, йигитларнинг келажакда ҳарбий хизматни танлашга бўлган қизиқишини оширишга хизмат қилишдир.
Тадбирни туман Мудофаа ишлари бўлими бошлиғи майор Шуҳрат Маматов очиб берди. У ўз нутқида миллий армиянинг куч-қудрати, унинг жамиятимиз ҳаётидаги ўрни ва аҳамияти ҳақида тўхталиб ўтди. Шу билан бирга, йигитлар ҳаётида ҳарбий хизматнинг ўрни, мардлик ва ватанпарварликнинг инсон шахсияти шаклланишидаги аҳамияти тўғрисида сўз юритди.
Сержант Рустам Ваҳобов эса ёшларни чақирувга қадар бошланғич тайёргарлик фанидан олган билимларини бойитишга чақирди ва ҳарбий тайёргарликни замонавий талаблар асосида кучайтириш зарурлигини таъкидлади.
Тадбир давомида ўқувчилар ҳарбий қурол-яроғлар билан танишиш имкониятига эга бўлишди. Майор Шуҳрат Маматов ёшларни қурол-яроғларнинг ишлаш тартиби, уларнинг имкониятлари ва ҳарбий вазиятларда қўлланилиш жараёнлари билан яқиндан таништирди. Ўқувчилар, шунингдек, қуролларнинг техник хусусиятлари ва улардан фойдаланиш қоидалари бўйича саволларга жавоб беришди, бу эса уларнинг ҳарбий хизматга бўлган қизиқишини янада оширди. Ўқувчиларнинг техник билимлари синовдан ўтказилди ва улар, ўз навбатида, мураккаб саволларга аниқ жавоб беришди.
Шундан сўнг, ўқувчилар учун махсус кўргазма ташкил қилинди. Ҳарбий мутахассислар томонидан ҳарбий қурол-яроғлар, мудофаа техникалари ва уларнинг техник имкониятлари ҳақида батафсил тушунтириш берилди.
Тадбир давомида ўқувчиларга ҳақиқий ҳарбий ҳаёт ҳиссини бериш мақсадида махсус амалий машғулотлар ташкил этилди. Ёшлар ҳарбий отларга миниб, ўзларини ёш аскарлардай ҳис қилиш имкониятига эга бўлишди. Бундан ташқари, “Квадрацикл” ҳарбий машиналаридан фойдаланиш имконияти яратилди. Қизиқарли тарзда ташкил этилган тадбир ёшларда жуда катта таъсурот қолдирди. Ўқувчилар, айниқса, ҳарбий машиналарни бошқаришни ўрганганларидан мамнун бўлишди ва бу тадбирнинг ёшларни ҳарбий ҳаётга янада қизиқтирганлигини таъкидлашди.
Тадбир якунида 69-сонли мактабнинг ўқувчиси Фурқат Тоҳиров барча иштирокчилар номидан ҳарбийларни Ватан ҳимоячилари куни билан табриклаб, улар томонидан ташкил этилган тадбир учун чин дилдан миннатдорчилик билдирди.
“Очиқ эшиклар куни” тадбири ёшлар қалбида она-Ватанга бўлган муҳаббатни кучайтириш, Миллий Армиямиз қудрати ва ҳарбий хизматнинг аҳамиятини кенг тарғиб қилишда муҳим аҳамият касб этди. Бу каби тадбирлар ёш авлодни ҳарбий-ватанпарварлик руҳида тарбиялашда, уларнинг маънавий ва жисмоний салоҳиятини оширишда, шунингдек, мамлакатимиз хавфсизлигини таъминлаш йўлида жонбозлик кўрсатишга тайёр шахсларни шакллантиришда муҳим ўрин тутади.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
