Ўқувчилар ҳарбий қисмга ташриф буюриб, ҳарбийларнинг яшаш шароити билан яқиндан танишди
Мамлакатимизда ёшларни ватанпарварлик руҳида тарбиялаш масаласига алоҳида эътибор қаратилмоқда. Бу йўналишда амалга оширилаётган ишларнинг бир қисми сифатида, ёшларнинг миллий Армияга бўлган ҳурматини ва муҳаббатини оширишга қаратилган турли тадбирлар, шу жумладан, ҳарбий қисмларга ташрифларни мисол сифатида келтириш мумкин. Шундай тадбирлардан бири 2024 йил 27 декабрь куни Амударё туманидаги ҳарбий қисмда бўлиб ўтди.
Ўзбекистон Республикаси Президентининг 2024 йил 12 декабрдаги Фармойшига мувофиқ, мамлакатимизда Қуролли кучларимизнинг 33 йиллиги ҳамда “Ватан химоячилари куни” байрамини юқори савияда нишонлаш мақсадида турли тадбирлар ўтказиш режалаштирилган. Бу тадбирлар ёшларни ҳарбий хизматга тайёрлашда муҳим аҳамиятга эга бўлиб, уларнинг Ватанга муҳаббатини кучайтиришга хизмат қилади.
Фармойиш ижросини таъминлаш мақсадида ҳарбий қисм маъмурияти тумандаги 80-сонли, 32-сонли ва 33-сонли умумтаълим мактаблари билан ҳамкорликда ишлаб чиққан иш режага асосан ушбу мактаблар ўқувчиларининг Манғит шаҳридаги 9202-сонли ҳарбий қисмга ташрифи кўзда тутилган.
Янги йил байрами арафасида уюштирилган ташрифнинг асосий мақсади – ўқувчиларни ҳарбий қисмдаги қурол-яроғ ва техникалар, ҳарбий хизматчиларнинг кун тартиби ва яшаш шароити билан таништиришдан иборат бўлди. Ташриф давомида ёшлар ҳарбий техника ва қурол-аслаҳалар, ҳарбийларнинг чиқишлари ва машқлари билан яқиндан танишиб, уларнинг фаолияти ҳақида маълумотларга эга бўлдилар.
Амударё тумани Мактабгача ва мактаб таълими бўлимига қарашли 80-, 32- ва 33-сонли умумтаълим мактаблари ўқувчи ёшлари ҳамда ушбу мактаблардаги “Ватан таянчи” отряди аъзолари ҳарбийлар билан суҳбатлар қуриб, уларнинг кундалик ҳаёти ва хизмат шартлари ҳақида маълумотга эга бўлдилар. Ёшларга ҳарбий хизматни ўташ, Ватанга хизмат қилиш қанчалик шарафли ва масъулиятли вазифа эканлиги ҳаётий мисоллар орқали тушунтирилди. Бу маълумотлар ва ҳарбий қисмга ташриф таассуротлари уларнинг Ватанга бўлган муҳаббати ҳамда юрт тақдирига дахлдорлик ҳиссини янада кучайтиришга хизмат қилиши шубҳасиз.
Ёшлар, шунингдек, ҳарбий қисмда ҳарбий хизматчилар учун яратилган шарт-шароитлар, уларнинг кундалик ҳаёти билан ҳам яқиндан танишдилар. Кутубхона, маънавият хоналарида бўлиб, ҳарбий хизматчи учун нафақат жисмоний куч, балки билим ва дунёқараш ҳам қанчалик муҳимлигини англаб етдилар.
Ушбу ташрифдан кейин иштирокчилар бошқа тенгдошларининг ҳам ҳарбий хизматга бўлган қизиқишини янада ошириб, уларни Ватанга хизмат қилишга чорласа ажаб эмас. Бу эса келгусида ёшлар орасидан кўплаб Ватан ҳимоячилари етишиб чиқишига, мамлакатимизнинг келажакдаги ҳарбий қудратини мустаҳкамлашга ва ёшлар ўртасида Миллий Армияга бўлган ишончнинг ортишига хизмат қилади.
Ташрифдан кейин ҳарбий қисмда Янги йил байрами муносабати билан катта тадбир ўтказилди. Байрамда ҳарбий хизматчилар ва уларнинг оила аъзолари иштирок этди. Ҳарбийларга меҳнатлари учун ташаккур изҳор қилиш ва уларнинг оила аъзолари доимий эътиборда эканини намойиш қилиш мақсадида ташкил этилган байрам тадбирида ҳарбий хизматчиларнинг фарзандлари ҳам иштирок этди. Ҳарбийларнинг фарзандлари учун тайёрланган совғалар уларнинг Янги йилни хурсандчилик ва мамнунлик билан ўтказишларига хизмат қилиши шубҳасиз. Айниқса, Қорбобо ва Қорқиздан совға олган болажлонларнинг қувончи тадбир иштирокчилари ва ташкилотчиларини ҳам тўлқинлантирди. Бу каби тадбирларнинг ўтказилиши ҳарбийлар орасида бирдамлик муҳитини кучайтиришга ҳам хизмат қилади.
Ғ.Ешниёзов
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
