Энергия ресурсларидан самарали фойдаланиш масаласида Прокуратура органлари томонидан ўрганишлар ўтказилмоқда

“Бўладиган ишга эгаси сабабчи”, дейишади. Мантиқан олиб қарайдиган бўлсак, ҳар кимнинг ҳаётида юз берадиган нохушликлар, аввало, эътиборсизлик, сусткашлик, қолаверса яшаш хонадонида ёритиш ва иссиқлик энергияси, ёқилғи ресурслари билан боғлиқ ускуналардан ҳамда ўз ихтиёридаги транспорт воситаларидан фойдаланишдаги хатоликлари туфайли содир бўлади. Айниқса, бу каби ҳолатлар куз-қиш мавсумида кўпроқ кузатилади.

Мамлакатимизнинг турли ҳудудларида, хусусан, Қашқадарё, Тошкент, Бухоро ва Фарғона вилоятларида табиий газ тармоғига тақиқланган ускуналар орқали уланиш, автомобилларга газ қуйиш шохобчаларида белгиланган техника хавфсизлиги қоидаларига амал қилмаслик оқибатида юз берган инсонлар ўлими билан боғлиқ фожиалар бу борада нафақат соҳа ходимлари, балки халқимизни ҳам ҳар лаҳзада огоҳ яшашга даъват этади.

Юқоридаги каби кўнгилсиз ҳодисаларга ўз вақтида барҳам бериш, қиш мавсумини беталафот ўтказиш, жисмоний ва юридик истеъмолчиларни ёқилғи-энергия ресурслари билан узлуксиз таъминлаш, энергия ресурсларини иқтисод қилиш ҳамда талон-торожликларнинг олдини олиш билан боғлиқ масалаларни ўрганиш мақсадида Қорақалпоғистон Республикаси прокурорининг ўринбосари Шерзод Мухаматов Амударё туманида бўлиб, айни кундаги вазият билан яқиндан танишди.

Хусусан, Шерзод Мухаматов раҳбарлигида соҳа мутахассислари томонидан “Ҳудудий электр тармоқлари” акциядорлик жамиятига қарашли Амударё туман электр таъминоти корхонаси ва “Ҳудудгаз Қорақалпоғистон” акциядорлик жамиятига қарашли “Амударё тумангаз” газ таъминоти бўлимининг диспетчерлик хизматлари, истеъмолчилар мурожаатларини қабул қилиш марказлари, автомобилларга сиқилган газ қуйиш компрессор шохобчаларига газ тарқатиш станцияси ҳамда табиий газ сақлаш захира омборининг ҳолати муфассал ўрганилди.

Ўрганишлар жараёнида энергия ресурсларидан ноқонуний фойдаланиш ҳолатларини, айниқса, йирик талон-тарожликларни барвақт аниқлаш ишларини янада кучайтириш бўйича топшириқлар ва зарур тавсиялар берилди.

Шунингдек, ўрганишлар жараёнида истеъмолчиларга табиий газ етказиб беришда йўқотишларнинг олдини олиш ҳамда ресурсларни муҳофаза қилишда, энг аввало, техник инфратузилмани доимий назорат қилиб бориш, хусусан, газ қувурларидан ҳар қандай газ сизиб чиқиш ҳолатини тезкор бартараф қилиш, эскирган ва занглаган газ қувурларини ўз вақтида алмаштириш зарурлиги эслатиб ўтилди.

Бугунги кунда ҳар бир хонадон ва корхонада замонавий газ ҳисоблагичлар ўрнатилган бўлиб, уларни доимий техник кўрикдан ўтказиб туриш ҳамда техник хизмат кўрсатиш, табиий газ тармоғига ноқонуний уланишларнинг олдини олишга қаратилган назорат тадбирларини мунтазам равишда ўтказиб бориш, ноқонуний уланиш ҳолатлари аниқланганда қоидабузарларга қатъий ҳуқуқий чоралар кўриш лозимлиги таъкидланди.

Бу борада аҳолининг хабардорлигини ошириш мақсадида табиий газ ва электр энергияси ресурсларидан хавфсиз ва самарали фойдаланиш, тармоқларга ноқонуний уланишнинг оқибатлари ҳақида зарур тушунчалар бериш, айниқса, қиш мавсумида бу борадаги тарғибот ишларини самарали ташкил этиш, истеъмолчилар учун ўқув машғулотлари ўтказиш зарурлиги қайд қилинди.

Ўрганишлар жараёнида соҳа мутахассисларига тежамкорликнинг аҳамияти, табиий ресурсларни муҳофаза қилиш мақсадида аҳолининг истеъмол маданиятини ошириш юзасидан ҳам тавсиялар ҳам берилди.

Робия Йўлдошева