“Тарғибот поезди”нинг тарғибот гуруҳи аъзолари 40-мактабга ташриф буюрди

Ҳар қандай замон ва маконда инсон қадри улуғ, унинг ҳақ-ҳуқуқлари ҳар недан устун. Одамзод дунёга келар экан, у билан биргаликда ҳуқуқлари ҳам туғилади, ўзи билан ҳамнафас яшайди. Шубҳасиз, Ўзбекистон Республикасининг янги таҳрирдаги Конституциясининг ҳақиқий муаллифи халқнинг ўзидир. Фуқароларнинг хоҳиш-иродаси эса ислоҳотларнинг манбаи ва ҳаракатлантирувчи кучи ҳисобланади. Мамлакатимизда 2023 йил 30 апрель куни ўтказилган умумхалқ референдумида ўзи ва юрт тақдирига бефарқ бўлмаган, шу юртнинг бугуни ва эртасига дахлдорлик ҳисси билан яшайдиган ҳар бир юртдошимиз фаол иштирок этиб, уларнинг 90,21 фоизи янги таҳрирдаги Конституциямизни ёқлаб овоз бергани ҳам фикримиз далилидир.

Сир эмаски, Бош қомусимизда халқимизнинг Янги Ўзбекистонни барпо этиш бўйича орзу-умидлари ва интилишлари ўз аксини топган. Конституция мамлакатнинг бутун ҳудудида олий юридик кучга эга ва тўғридан-тўғри амал қилади. Янги таҳрирдаги Конституциямиз 6 бўлим, 27 боб ва 155 та моддадан иборат. Жорий йилда бош қомусимиз 32 ёшга тўлади. Шу муносабат билан юртимизнинг деярли барча ҳудудларида, маҳаллаларда, идора ва ташкилотларда, таълим масканларида байрам кечалари, турли хил заковат ўйинлари, тарғибот тадбирлари ўтказилади.

Ўзбекистон Республикаси Конституцияси қабул қилинганлигининг 32 йиллиги муносабати билан “Конституция – халқчил давлат, барқарор тараққиёт ва фаровон ҳаёт асоси!” шиори остида ташкил этилган “Тарғибот поезди” лойиҳасининг тарғибот гуруҳи аъзолари Амударё туманидаги 40-сонли мактабга ташриф буюрди.

Тадбирда Тошкент давлат юридик университети Жиноят-процессуал ҳуқуқи кафедраси мудири ўринбосари, гуруҳ раҳбари Бахрам Худайбергенов, университетнинг жиноий одил судлов факультети талабалари Алланазар Жанабаев, Кобейсин Зарипбаев, Сабрина Шамуратова ҳамда Халқаро ҳуқуқ ва қиёсий ҳуқуқшунослик факультети талабаси Айсулу Муратбаева, туман Адлия бўлими бошлиғи Мансур Садиков, Қорақалпоғистон Республикаси Жўқорғи Кенгеси депутати, 40-сонли мактаб директори Санобар Хўжамуратова ва ўқувчи ёшлар иштирок этди.

“Тарғибот поезди” лойиҳасининг мақсади янги таҳрирдаги Конституциямизнинг мазмун-моҳиятини ёшларга англатиш, фуқароларнинг ҳуқуқий саводхонлигини оширишдан иборат.

Тадбирда тарғибот гуруҳи аъзолари ўқувчиларга янги таҳрирдаги Конституциянинг мазмуни, унга киритилган янги моддалар, ҳуқуқий нормалар моҳияти, инсон ўз ҳақ-ҳуқуқларини билиши ва амалда қўллай олишининг аҳамияти ҳақида тўхталдилар. Конституция, қонун, инсон ҳуқуқ ва эркинлиги, қонун устуворлиги каби тушунчаларга алоҳида урғу берилди.

Шундан сўнг, ўқувчиларнинг ҳуқуқий саводхонлигини синовдан ўтказиш мақсадида “Заковат” ўйини ўтказилди. Унда ўқувчилар гуруҳларга бўлиниб, ўз билим ва салоҳиятини намоён қилдилар. Ўйин сўнгида фаол иштирок этган ўқувчиларга Тошкент давлат юридик университети томонидан тайёрланган эсдалик совғалари топширилди. Бу каби тадбирлар тарғибот гуруҳи томонидан Қорақалпоғистоннинг бошқа туманларида ҳам ўтказилмоқда.

 Сўзимиз аввалида ҳуқуқини билган ва амалда қўллай олган инсон хор бўлмайди, деган эдик. Дарҳақиқат, бизга ҳаётда тўғри ёзиш, рақамларни тўғри ҳисоб-китоб қилиш, одам ва унинг саломатлиги каби йўналишлар қанчалик зарур бўлса, ҳуқуқий саводхонликка ҳам шунчалар эҳтиёжимиз бор. Зеро, у тўғри ёзиш ёки тўғри ҳисоблашни ўргатмаса-да, фуқароларга тўғри яшашни ўргатади.

Азиза Мадраҳимова