Аҳолини ичимлик суви билан таъминлаш борасидаги ишлар янада жадаллашмоқда

Амударё туманида Ўзбекистон Республикаси Президентининг “Осиё тараққиёт банки иштирокида “Ўзбекистоннинг ғарбий қисмида ичимлик суви таъминоти тизимларини ривожлантириш” лойиҳасини амалга ошириш чора-тадбирлари тўғрисида”ги қарори ижросини таъминлаш борасидаги қурилиш-таъмирлаш ишлари жадал суръатларда олиб борилмоқда. Қарор асосида банк кредит маблағлари ҳисобидан Қорақалпоғистон Республикасининг Амударё, Беруний, Қораўзак, Қўнғирот, Нукус ва Мўйноқ туманларидаги аҳоли ва хўжалик юритувчи субъектларнинг сифатли ичимлик суви таъминотини янада яхшилаш чоралари кўрилмоқда.

Хусусан, Амударё туманида Озарбайжонлик Республикасидан келган пудратчи ташкилот “Archico Engineering company” томонидан 68,5 км магистраль ва 289,2 км ички сув тармоқларини тортиш ишлари жадал суръатларда давом этмоқда. 29 млн. АҚШ доллари миқдоридаги маблағ эвазига амалга оширилаётган қурилиш ишлари натижасида туман ҳудудида яшовчи 79 минга яқин аҳоли тоза ичимлик суви билан таъминланиши кўзда тутилаётган бўлиб, туманнинг Чойкўл, Тош ёп, Ўрта қалъа, Куюк кўпир, Бобур номли, Хитой, Бўз ёп ва Қиличбой овуллари, Босув, Арна бўйи, Жумур овул, Қизилчоли, Боғ, Хизр эли, Аёқчи маҳаллалари ҳамда Манғит шаҳридаги барча маҳаллалар ҳудудларидаги истеъмолчиларнинг тоза ичимлик суви таъминоти яхшиланади. Бугунги кунда қизғин паллада давом этаётган қурилиш ишлари ниҳоясига етгач, туман аҳолисининг тоза ичимлик суви билан таъминланганлик даражаси 80 фоизга етиши кўзда тутилган.

Ўзбекистон Республикаси Президентининг юқоридаги қарори асосида амалга оширилаётган қурилиш ишларига жами 100 нафарга яқин қурувчилар, шу жумладан маҳаллий ишчилар ҳамда 20 дан ортиқ техника жалб қилинган. Айни пайтгача ҳудудларда жами 5 км магистраль сув тармоқларини тортиш ишлари якунланган бўлиб, қурувчилар жадал суръатларда ишламоқдалар.

Таъкидлаш керакки, сўнгги йилларда мамлакатимизда сувдан оқилона фойдаланиш, унинг сифати ва хавфсизлигини таъминлаш, шунингдек, сув истеъмолини ҳисобга олишнинг замонавий инновацион тизимларини жорий этиш чоралари кўрилмоқда. Натижада сувдан фойдаланиш, шу жумладан, сув таъминоти ва оқова сув тизимида қатор самарали ислоҳотлар амалга оширилди. Бу ислоҳотларнинг барчаси халқ фаровонлигига, инсон манфаатларига хизмат қилаётгани билан аҳамиятлидир. Марказлашган ичимлик суви билан таъминланган ҳудудлар аҳолиси кўп йиллик орзуларининг ушалаётганини айтиб, давлатимиз ва ҳукуматимизга миннатдорчилик билдиришмоқда.

Халқимизда сув келтирган – элда азиз, деган нақл бор. Тириклик манбаи, поклик, мусаффолик рамзи бўлган сувни асраб-авайлаш, унинг ҳар томчисидан унумли ва тежамкор фойдаланиш барчамизнинг бурчимиздир. Зеро, соғлиғимиз ҳам, умримизнинг узоқ бўлиши ҳам, энг аввало, ичимлик сувининг сифатига боғлиқ. Мамлакатимизда аҳолини марказлаштирилган ичимлик суви билан таъминлаш, оқова сув хизматларини яхшилаш, ичимлик суви таъминоти ва оқова сув хизматлари қамровини ошириш бўйича амалга оширилаётган салмоқли ишлар шу мақсадларга хизмат қилиши билан аҳамиятлидир.

Чарос Арслонова, туман ҳокимлигининг Ахборот хизмати раҳбари.