Таълим соҳаси илғорлари “VETERAN” фахрий байналмилал жангчилар Уюшмаси томонидан мукофотланди
Ўсиб келаётган ёш авлодни ватанпарварлик, мустақиллик ғоялари асосида тарбиялаш, улар онгида миллий-маънавий иммунитетни шакллантиришда нафақат ўқитувчи ва мураббийлар, балки барча соҳаларда фаолият олиб бораётган, устоз-шогирд анъаналари асосида ёшларнинг ўз соҳалари бўйича етук мутахассислар бўлиб камолга етишишларида фидойилик билан меҳнат қилаётган барча касб эгаларининг хизматлари катта. Айниқса, захирадаги ҳарбий зобитлар, таълим-тарбия соҳаси раҳбарлари, собиқ байналмилал жангчилар, кутубхоначиларнинг ёш авлод таълим-тарбиясига қўшаётган ҳиссалари алоҳида эътибор ва эътирофга муносиб.
Ўқитувчи ва мураббийлар куни – умумхалқ байрами муносабати билан Амударё туманининг турли соҳаларида ишлаётган, ўз меҳнат фаолиятлари давомида ёшларни ҳар томонлама етук ва баркамол инсонлар қилиб тарбиялашдек масъулиятли вазифани адо этишга муносиб ҳиссаларини қўшаётган фидойи инсонлардан бир гуруҳи Ўзбекистон Республикаси “VETERAN” фахрий байналмилал жангчилар Уюшмаси томонидан тақдирландилар. Мазкур Уюшма томонидан тақдирланганлар орасида Амударё тумани Мактабгача ва мактаб таълими бўлими бошлиғи Ялғашбой Шомуродов ҳамда ушбу бўлим тасарруфидаги 12-сонли мактаб кутубхоначиси Муборак Маҳмудовалар ҳам бор.
Яқинда Ўзбекистон Республикаси “VETERAN” фахрий байналмилал жангчилар Уюшмасининг Қорақалпоғистон Республикаси Амударё туман бўлими раҳбари Баҳодир Жуманиёзов ҳамда уюшма аъзоси Ҳамро Сафарбоевлар мукофотларни ўз эгаларига топширдилар.
Тақдирлаш маросимида бир гуруҳ собиқ фахрий байналмилалчи жангчилар ҳам иштирок этишиб, Ялғашбой Шомуродовнинг ёшларни ватанпарварлик руҳида тарбиялаш борасида амалга ошираётган катта хизматларини мамнуният билан эътироф этишди ва унга “VETERAN” фахрий байналмилал жангчилар Уюшмаси олдидаги шарафли хизматлари учун “VETERAN” медалини топширишди.
Шунингдек, 12-сонли умумтаълим мактабининг кутубхоначиси Муборак Маҳмудовага ҳам Уюшма томонидан “Ёшларни ватанпарварлик руҳида тарбиялаш учун” медали топширилди.
Дарвоқе, инсон қайси соҳада ишлашидан қатъий назар, ўсиб келаётган ёш авлод таълим-тарбиясига масъулият билан ёндашиб, ўзлари танлаган йўналишлар бўйича зарур кўникмаларга эга бўлишлари учун ўз билим ва тажрибаларини ўргатса, уларнинг эл-юрт фидойилари сафидан жой олишларига яқин кўмакдош бўлса у ҳақиқий устоздир.
Шу боис, Ўқитувчи ва мураббийлар куни – умумхалқ байрами муносабати билан ўз соҳаларининг билимдонлари ва ёшларни ватанпарварлик, истиқлол ғояларига садоқат руҳида, ўз касбининг фидойилари қилиб тарбиялашга қўшган ҳиссалари учун барча соҳаларнинг фидойиларига шогирдлари ва давлатимиз томонидан алоҳида ҳурмат ва эҳтиром кўрсатилади.
Ялғашбой Шомуродов ва Муборак Маҳмудовалар ана шундай ҳурмат, эътибор ва эҳтиромга муносиб кўрилгани мамлакатимизда устозлик эътибор ва эъзозга, юксак эҳтиромга муносиб кўрилганининг яққол исботидир.
Робия Йўлдошева.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
