Куз-қиш мавсумига тайёргарлик кўриш юзасидан амалга оширилган ишлар таҳлил қилинди
Аввал хабар берганимиздек, куз-қиш мавсуми олдидан овул ва маҳаллаларда, ижтимоий соҳа объектларида ҳамда бир қатор корхона-ташкилотларда мавсумга тайёргарлик кўриш юзасидан чора-тадбирлар, тарғибот-тушунтириш ишлари, энерготежамкор ускуналар тақдимоти ташкил этиляпти. Амударё тумани ҳокимлиги биноси олдида ўтказилган шу каби йиғилишда ҳам куз-қиш мавсумига тайёргарликни янада кучайтириш, фуқароларнинг энерготежамкор ускуналардан фойдаланишларини йўлга қўйиш, аҳолининг мавсумни беталафот ўтказиши учун зарурий чораларни кўриш юзасидан олиб борилаётган ишлар муҳокама қилинди.
Тадбирда туман ҳоким Собир Хўжаметов, секторлар раҳбарлари, ҳоким ўринбосарлари, жойлардаги “Маҳалла еттилиги” аъзолари, тегишли корхона-ташкилотлар масъуллари иштирок этишди.
Туман ҳокими – фуқаро муҳофазаси бошлиғи Собир Хўжаметов ўз нутқида куз-қиш мавсумига тайёргарлик кўриш ишларини режали амалга ошириш, мавсумни беталафот ўтказиш ва энергия ресурсларини иқтисод қилиш, ўрганишлар давомида аниқланган камчиликларни жойида бартараф этиш зарурлиги, бу жараёнларда ҳар бир соҳа ходими ўз ишини янада масъулият билан бажариши лозимлиги тўғрисида фикр-мулоҳазалар билдирилиб, масъулларга тегишли топшириқ ва тавсиялар берди.
Таъкидланганидек, куз-қиш мавсуми олдидан ҳар бир корхона ва ташкилот, ижтимоий соҳа объектлари ва хонадонларнинг коммунал тармоқлари кўздан кечирилиб, тайёргарлик ишлари қизғин паллага кирган. Хусусан, аҳоли хонадонлари ҳамда саноат корхоналарини сифатли ва барқарор электр энергияси билан таъминлаш, мавсумни беталафот ўтказиш, юзага келиши мумкин бўлган фавқулодда ҳолатларнинг олдини олиш юзасидан тизимли ишлар олиб борилмоқда.
Келтирилган маълумотларга кўра, мавсум олдидан 4814та аҳоли яшаш ҳовли-уйлари ўрганиб чиқилган. Шундан 1901та хонадоннинг иситиш қозони уй ичкарисида жойлашганлиги, 2458та хонадонда эса иситиш қозони уй ташқарисида эканлиги маълум бўлган. Бундан ташқари, кўп қаватли уйлардаги 40та хонадонда иситиш қозонлари уй ичкарисида ўрнатилгани аниқланган. Ўтказилган тадбирлар давомида хонадонлардаги 108та иситиш қозонларининг дудбуронлари тозаланган. Хусусан, 29 август куни Янгиобод маҳалласи ҳудудидаги 34та хонадоннинг иситиш қозонлари ва дудбуронлари тозаланиб, мавжуд камчиликлар бартараф этилган.
Маълумки, иситиш қозонлари ва дудбуронларни ўз вақтида тозалаш орқали табиий ва ис газидан заҳарланиш ҳамда ёнғин келиб чиқиши каби нохуш ҳолатларининг олди олинади. Табиий ва ис газининг ажралиши ностандарт ва носоз газ ускуналаридан фойдаланиш, талабга жавоб бермайдиган дудбуронларни ўрнатиш ёки уларни нотўғри ўрнатиш, иситиш қозонлари ва дудбуронларни ўз вақтида тозаламаслик оқибатида содир бўлади.
Шуни ҳам алоҳида қайд этиш жоизки, табиий ва ис газидан заҳарланиш ҳамда ёнғин билан боғлиқ кўнгилсиз ҳодисаларнинг асосий қисми иситиш қозонлари ва дудбуронларига, шунингдек, газ ускуналарига нисбатан эътиборсизлик ортидан келиб чиқмоқда.
Тадбир якунида ижтимоий соҳа объектлари, айниқса, мактаб, мактабгача таълим ташкилотлари ва тиббиёт муассасалари ҳамда аҳоли хонадонларининг куз-қиш мавсумига тайёрлигини ярада кучайтириш, аниқланган камчиликларни жойида бартараф этиш бўйича муҳим вазифалар белгиланди.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
