Deputatlar ishtirokida tumanni ijtimoiy-iqtisodiy rivojlantirishga doir masalalar muhokama qilindi

2024-yil 9-avgust kuni Amudaryo tumani hokimligining majlislar zalida tumanni ijtimoiy-iqtisodiy rivojlantirishga doir masalalar yuzasidan yigʻilish va Xalq deputatlari tuman Kengashining navbatdagi sessiyasi oʻtkazildi.

Yigʻilishda Amudaryo tumani hokimi, sektor rahbarlari, Qoraqalpogʻiston Respublikasi Joʻqorgʻi Kengesi deputatlari, Xalq deputatlari tuman Kengashi deputatlari, siyosiy partiyalar tuman Kengashi rahbarlari, tuman tijorat banklari rahbarlari, “Mahalla yettiligi” aʼzolari hamda ommaviy axborot vositalari vakillari ishtirok etdi.

Yigʻilishda Qoraqalpogʻiston Respublikasi Joʻqorgʻi Kengesi deputati, Oʻzbekiston Respublikasi Oliy Majlisi Senati aʼzosi Ulugʻbek Jalmenov qatnashdi va nutq soʻzladi.

Maʼlumki, Oʻzbekiston Respublikasi Oliy Majlisi Senati tomonidan hududlar va tarmoqlarda iqtisodiy oʻsish surʼatlarini taʼminlash boʻyicha joriy yilning ikkinchi yarim yilligiga belgilangan ustuvor vazifalarning bajarilishi ustidan taʼsirchan parlament nazoratini amalga oshirish boʻyicha amaliy ishlar qilinmoqda. Shu maqsadda tumanga biriktirilgan Qoraqalpogʻiston Respublikasi Joʻqorgʻi Kengesi deputati, Oʻzbekiston Respublikasi Oliy Majlisi Senati aʼzosi Ulugʻbek Jalmenov tumanda iqtisodiy oʻsish surʼatlarini yanada tezlashtirish, aholi turmush darajasini oshirish, bandligini taʼminlash hamda ijtimoiy infratuzilmani yaxshilash boʻyicha Qoraqalpogʻiston Respublikasi Joʻqorgʻi Kengesi tomonidan belgilangan ustuvor vazifalar xususida toʻxtalib oʻtdi.

Kun tartibidagi masala boʻyicha Amudaryo tumani hokimi Sobir Xoʻjametov soʻzga chiqib, tumanda aholini ish bilan taʼminlash boʻyicha Prezidentimizning 2024-yil 9-yanvardagi qaroriga asosan joriy yilda jami 15 ming 836 ta yangi ish oʻrinlarini yaratish rejalashtirilganini, bu boʻyicha tizimli ishlar amalga oshirilayotganini taʼkidlab oʻtdi.

Oʻtgan 6 oy davomida tumanda Sayxunobod tajribasi boʻyicha yerdan yanada samarali foydalanish, dehqonlar uchun bozor topishga koʻmaklashish, tadbirkorlarni sifatli urugʻ va dori vositalari bilan taʼminlash, tadbirkorlarning eksportiga amaliy yordam berish maqsadida oilaviy tadbirkorlikni rivojlantirish orqali 2 ming 107 nafar fuqaroga 29,7 mlrd soʻmlik imtiyozli kredit mablagʻlari ajratilib, ularning tadbirkorlik faoliyatlari yoʻlga qoʻyilgan.

Uychi tajribasi asosida tuman hokimi tadbirkorlik va biznes bilan shugʻullanish istagidagi aholi bilan manzilli ishlash tizimini yoʻlga qoʻyib, aprel-iyun oylarida jami 8-marta uchrashuvlar oʻtkazgan hamda 60dan ortiq tadbirkorlarning muammo va takliflari tinglangan.

Uychi tajribasi asosida 18-30 yosh oraligʻidagi 38 ming 390 nafar yoshlar xatlovdan oʻtkazilib, ular orasidan ishsizlarining bandligini taʼminlash boʻyicha ham tizimli ishlar amalga oshirilmoqda.

Tuman hokimi joriy yilning ikkinchi yarmida ham barcha yoʻnalishlardagi ishlar uzluksiz davom ettirilib, tumanni ijtimoiy-iqtisodiy rivojlantirish boʻyicha samarali natijalarga erishilishi uchun zarur choralar koʻrilishini taʼkidladi.

Shundan soʻng Xalq deputatlari Amudaryo tuman Kengashining 78-sessiyasida tumanni ijtimoiy-iqtisodiy rivojlantirish boʻyicha dolzarb masalalar muhokama qilindi.

Dastlab Amudaryo tumani soliq inspektsiyasi boshligʻi Jahongir Rahimov Amudaryo tumanida 2024-yil 6 oy davomida byudjetga tushumlarni taʼminlash va “Mahallabay” ishlash boʻyicha amalga oshirilgan ishlar toʻgʻrisida hisobot berdi.

Hisobotda qayd qilinganidek, byudjetga tushumlarni taʼminlash boʻyicha 2024-yilning birinchi yarmi uchun 23 mlrd 221,3 mln. soʻm reja grafigi belgilangan boʻlib, amalda 23 mlrd 685 mln. soʻm, yaʼni rejaga nisbatan 102 foiz miqdorida, byudjetga qoʻshimcha 463,7 mln. soʻm ortigʻi bilan tushum taʼminlangan. Byudjet tushumlari 2023-yilning mos davriga solishtirganda 133,1 foizga oʻsgan.

Sessiya kun tartibidagi navbatdagi masala yuzasidan Majburiy ijro byurosi Amudaryo tumani boʻlimi boshligʻi, adliya kichik maslahatchisi Quvonch Yesenbekov byuro tomonidan joriy yilning oʻtgan 6 oyida amalga oshirilgan ishlar xususida, Kengashning Sud-huquq masalalari va korruptsiyaga qarshi kurashish boʻyicha doimiy komissiyasi raisi Muzaffar Yeshchanov Qoraqalpogʻiston Respublikasi Joʻqorgʻi Kengesiga saylov oʻtkazish boʻyicha Amudaryo tumanidagi okrug saylov komissiyalari aʼzoligiga nomzodlarni tavsiya qilish masalasida axborot berdi.

Amudaryo tumani hokimi oʻrinbosari, Oila va xotin-qizlar boʻlimi boshligʻi Goʻzal Saburova deputatlarga xotin-qizlarning tadbirkorligini yoʻlga qoʻyish va rivojlantirishni qoʻllab-quvvatlashga boʻyicha amalga oshirilayotgan ishlar haqida hisobot berib, “Ayollar maslahat kengashi”ga kelib tushgan xotin-qizlarning murojaatlariga asosan ijtimoiy himoyaga muhtoj 5 nafar xotin-qizlarni “Ayollar daftarining” 1-toifasiga kiritish boʻyicha taklif bildirdi.

Shuningdek, sessiyada Amudaryo tumani Iqtisodiyot va moliya boʻlimi boshligʻi Javlonbek Jumamurodov tuman mahalliy byudjeti parametrlarida koʻzda tutilgan xarajatlarga oʻzgartirishlar kiritish boʻyicha, tuman hokimligining moliya-iqtisodiyot va kambagʻallikni qisqartirish masalalari boʻyicha bosh mutaxassisi Jahongir Yoʻldoshov mahalliy byudjetning qoʻshimcha manbalari hisobidan mablagʻ ajratish masalalarida takliflar kiritdi.

Sessiya kun tartibiga kiritilgan barcha masalalar atroflicha muhokama qilinib, takliflar tinglandi hamda faol muhokamadan keyin xalq deputatlari tuman Kengashining tegishli qarorlari qabul qilindi.

Gʻ.Yeshniyozov