Tashlandiq yer oʻrnida sunʼiy qoplamali mini futbol maydonchasi barpo qilindi

Joriy yilning 26-may kuni Xolimbeg ovulida yangi sunʼiy qoplamali mini futbol maydonchasining ochilish marosimi boʻlib oʻtdi. Marosimda tuman hokimi Sobir Xoʻjametov, tuman prokurori Aziz Roʻzmetov, Sport maktabi, OFY masʼullari, sportchi yoshlar va mahalla faollari ishtirok etdilar.

Marosimda tuman hokimi soʻzga chiqib, Xolimbeg ovuli ahlini yangi sport inshooti ish boshlagani bilan tabrikladi va sportchilarga zafarlar tiladi. Tuman hokimi oʻz soʻzida amudaryolik sportchilarining katta musobaqalarda qoʻlga kiritayotgan yutuqlari, yuksak natijalari maqtovga loyiq ekanligini, bunda xolimbeglik sportchi yoshlarning ham hissasi yuqori ekanligini, ovul yoshlarining sport va jismoniy tarbiyaga boʻlgan qiziqishlarini yanada oshirishda mazkur sport maydonchasi muhim ahamiyat kasb etishini taʼkidlab oʻtdi.

Shuningdek, tashlandiq, qarovsiz holatdagi yer maydonida shunday zamonaviy imkoniyatlarga ega sport maydonchasini qurib, xayrli ishga qoʻl urgan tadbirkor – “Durdona-Eʼzoza-Asaloy” MChJ rahbari Amina Tajimuratovaning kelgusidagi ishlarida muvaffaqiyat tiladi.

Maʼlumot oʻrnida aytish kerakki, mazkur sunʼiy qoplamali mini futbol maydonchasi oʻrni oldin qarovsiz holdagi tashlandiq yer boʻlgan. Tadbirkor Amina Tajimuratovaning tashabbusi bilan tashlandiq yer obod qilindi. Tadbirkor jami 300 mln soʻm, shundan 33 mln soʻmi bank krediti, qolgani oʻz mablagʻi hisobiga mazkur sunʼiy qoplamali mini futbol maydonchasini bunyod qildi. Endilikda mazkur mini futbol maydonchasi orqali xolimbeglik yoshlarning boʻsh vaqtlarini mazmunli oʻtkazish, ovul yoshlarining salomatliklarini mustahkamlash va ularni yanada katta yutuq hamda marralarga undash maqsad qilingan.

Taʼkidlash kerakki, Xolimbeg ovulining mini futbolchi qizlar jamoasi koʻp yillardan buyon respublika miqyosida chempionlikni va faxrli oʻrinlarni egallab kelishmoqda.

Jumladan, 2018-yilning mart oyida Qashaqadaryo viloyati Qarshi shahrida mini futbol boʻyicha boʻlib oʻtgan Oʻzbekiston chempionatida 14 yoshgacha qizlar oʻrtasidagi musobaqalarda xolimbeglik qizlar faxrli 2-oʻrinni, 2020-yil Toshkent shahrida boʻlib oʻtgan Oʻzbekiston kubogi musobaqalarida 15 yoshgacha qizlar oʻrtasida ovul qizlari jamoasi faxrli 2-oʻrinni egalladilar.

Shuningdek, 2019-yilda Toshkent shahrida futbol boʻyicha Oʻzbekiston chempionatida 17 yoshgacha qizlar boʻlgan xolimbeglik qizlar jamoasi 3-oʻrinni, 2021-yilda 14 yoshgacha boʻlgan qizlar Oʻzbekiston chempionatida hududiy bosqichda faxrli 1-oʻrinni, 2022-yilda esa Oʻzbekiston kubogi musobaqalarida faxrli 2-oʻrinni egalladilar.

2023-yilda tashkil etilgan Qoraqalpogʻiston Respublikasining “Aral W” professional futbol jamoasi tarkibida 8 nafar amudaryolik qizlar toʻp surayotgan boʻlsa, shularning 5 nafari xolimbeglik qizlardir. Mazkur jamoaning bosh murabbiyi Rufat Babajanov, yordamchi murabbiy Bayram Eshimovlar ham Xolimbeg ovulining farzandlari hisoblandi.

2023-yilda “Aral W” jamoasi professional futbol jamoasi 14 yoshlilar oʻrtasida Oʻzbekiston chempoinatida faxrli 2-oʻrinni, Davlat xavfsizlik xizmati kubogi musobaqalarida mini futbol boʻyicha Qoraqalpogʻiston Respublikasida faxrli 1-oʻrinni egallab, chempionlikni qoʻlga kiritdilar.

Xolimbeg ovuli qizlar jamoasi joriy yilda ham futbol boʻyicha DXX kubogi musobaqalarida tumanda faxrli 1-oʻrinni egallab, respublika bosqichiga yoʻllanmasiga ega boʻldi.

21-26-may kunlari Qirgʻiziston Respublikasi Bishkek shahrida 15 yoshgacha boʻlgan qizlar oʻrtasida oʻtkazilgan futbol boʻyicha Osiyo chempionatida Oʻzbekiston terma jamoasi faxrli 2-oʻrinni egalladi. Chempionatda “Aral W” qizlar futbol jamoasi aʼzolari Oʻzbekiston shaʼnini himoya qildi.

Endilikda xolimbeglik mini futbol va futbol bilan shugʻullanuvchi yoshlar mashgʻulotlarni boshqa hududlarda emas, oʻz mahallalardagi maydonchada olib borishadi. Ushbu yangi maydonchada toʻp suradigan sportchi yoshlarning kelgusida ham ulkan yutuqlarga erishishiga tilakdoshmiz!

Charos Arslonova, tuman hokimligining Axborot xizmati rahbari.