Ташландиқ ер ўрнида сунъий қопламали мини футбол майдончаси барпо қилинди

Жорий йилнинг 26 май куни Холимбег овулида янги сунъий қопламали мини футбол майдончасининг очилиш маросими бўлиб ўтди. Маросимда туман ҳокими Собир Хўжаметов, туман прокурори Азиз Рўзметов, Спорт мактаби, ОФЙ масъуллари, спортчи ёшлар ва маҳалла фаоллари иштирок этдилар.

Маросимда туман ҳокими сўзга чиқиб, Холимбег овули аҳлини янги спорт иншооти иш бошлагани билан табриклади ва спортчиларга зафарлар тилади. Туман ҳокими ўз сўзида амударёлик спортчиларининг катта мусобақаларда қўлга киритаётган ютуқлари, юксак натижалари мақтовга лойиқ эканлигини, бунда холимбеглик спортчи ёшларнинг ҳам ҳиссаси юқори эканлигини, овул ёшларининг спорт ва жисмоний тарбияга бўлган қизиқишларини янада оширишда мазкур спорт майдончаси муҳим аҳамият касб этишини таъкидлаб ўтди.

Шунингдек, ташландиқ, қаровсиз ҳолатдаги ер майдонида шундай замонавий имкониятларга эга спорт майдончасини қуриб, хайрли ишга қўл урган тадбиркор – “Дурдона-Эъзоза-Асалой” МЧЖ раҳбари Амина Тажимуратованинг келгусидаги ишларида муваффақият тилади.

Маълумот ўрнида айтиш керакки, мазкур сунъий қопламали мини футбол майдончаси ўрни олдин қаровсиз ҳолдаги ташландиқ ер бўлган. Тадбиркор Амина Тажимуратованинг ташаббуси билан ташландиқ ер обод қилинди. Тадбиркор жами 300 млн сўм, шундан 33 млн сўми банк кредити, қолгани ўз маблағи ҳисобига мазкур сунъий қопламали мини футбол майдончасини бунёд қилди. Эндиликда мазкур мини футбол майдончаси орқали холимбеглик ёшларнинг бўш вақтларини мазмунли ўтказиш, овул ёшларининг саломатликларини мустаҳкамлаш ва уларни янада катта ютуқ ҳамда марраларга ундаш мақсад қилинган.

Таъкидлаш керакки, Холимбег овулининг мини футболчи қизлар жамоаси кўп йиллардан буён республика миқёсида чемпионликни ва фахрли ўринларни эгаллаб келишмоқда.

Жумладан, 2018 йилнинг март ойида Қашақадарё вилояти Қарши шаҳрида мини футбол бўйича бўлиб ўтган Ўзбекистон чемпионатида 14 ёшгача қизлар ўртасидаги мусобақаларда холимбеглик қизлар фахрли 2-ўринни, 2020 йил Тошкент шаҳрида бўлиб ўтган Ўзбекистон кубоги мусобақаларида 15 ёшгача қизлар ўртасида овул қизлари жамоаси фахрли 2-ўринни эгалладилар.

Шунингдек, 2019 йилда Тошкент шаҳрида футбол бўйича Ўзбекистон чемпионатида 17 ёшгача қизлар бўлган холимбеглик қизлар жамоаси 3-ўринни, 2021 йилда 14 ёшгача бўлган қизлар Ўзбекистон чемпионатида ҳудудий босқичда фахрли 1-ўринни, 2022 йилда эса Ўзбекистон кубоги мусобақаларида фахрли 2-ўринни эгалладилар.

2023 йилда ташкил этилган Қорақалпоғистон Республикасининг “Арал W” профессионал футбол жамоаси таркибида 8 нафар амударёлик қизлар тўп сураётган бўлса, шуларнинг 5 нафари холимбеглик қизлардир. Мазкур жамоанинг бош мураббийи Руфат Бабажанов, ёрдамчи мураббий Байрам Эшимовлар ҳам Холимбег овулининг фарзандлари ҳисобланди.

2023 йилда “Арал W” жамоаси профессионал футбол жамоаси 14 ёшлилар ўртасида Ўзбекистон чемпоинатида фахрли 2-ўринни, Давлат хавфсизлик хизмати кубоги мусобақаларида мини футбол бўйича Қорақалпоғистон Республикасида фахрли 1-ўринни эгаллаб, чемпионликни қўлга киритдилар.

Холимбег овули қизлар жамоаси жорий йилда ҳам футбол бўйича ДХХ кубоги мусобақаларида туманда фахрли 1-ўринни эгаллаб, республика босқичига йўлланмасига эга бўлди.

21-26 май кунлари Қирғизистон Республикаси Бишкек шаҳрида 15 ёшгача бўлган қизлар ўртасида ўтказилган футбол бўйича Осиё чемпионатида Ўзбекистон терма жамоаси фахрли 2-ўринни эгаллади. Чемпионатда “Арал W” қизлар футбол жамоаси аъзолари Ўзбекистон шаънини ҳимоя қилди.

Эндиликда холимбеглик мини футбол ва футбол билан шуғулланувчи ёшлар машғулотларни бошқа ҳудудларда эмас, ўз маҳаллалардаги майдончада олиб боришади. Ушбу янги майдончада тўп сурадиган спортчи ёшларнинг келгусида ҳам улкан ютуқларга эришишига тилакдошмиз!

Чарос Арслонова, туман ҳокимлигининг Ахборот хизмати раҳбари.