Oʻqituvchilar ishtirokida Kasaba uyushmasi kubogi uchun sport musobaqalari oʻtkazildi

29-aprel kuni Amudaryo tumanidagi 16-sonli umumtaʼlim maktabida va minifutbol maydonchasida “Besh tashabbus olimpiadasi” doirasida Maktabgacha va maktab taʼlimi vazirligi tizimidagi taʼlim muassasalari xodimlari oʻrtasida “Sogʻlom tanda – sifatli taʼlim” shiori ostida Kasaba uyushmasi kubogi uchun 2-bosqich sport musobaqalari boʻlib oʻtdi.

Maʼlumki, oʻqituvchilarning jismoniy va ruhiy salomatligini yaxshilash, stressni kamaytirish va ijodiy potentsialni oshirish maqsadida ularni sportga ommaviy jalb qilish masalasiga doimiy ravishda eʼtibor qaratib kelinadi. Sport bilan muntazam shugʻullanish nafaqat tanani chiniqtiradi, balki oʻqituvchilarning ish samaradorligini ham oshiradi.

Shuningdek, sport jamoaviy ishlash koʻnikmalarini rivojlantirishga yordam beradi, bu esa oʻqituvchilar orasida hamkorlik va oʻzaro tushunishni mustahkamlaydi. Sport musobaqalarida ishtirok etish shuningdek, oʻqituvchilarning oʻz sogʻligʻiga boʻlgan masʼuliyatini yanada oshiradi va ularga oʻzlarining shaxsiy va kasbiy hayotlarida muvozanatni saqlashga yordam beradi. Bundan tashqari, sport musobaqalari oʻqituvchilarga oʻz maktablari va jamoalari bilan yanada chuqurroq bogʻlanish imkonini beradi, bu esa maktablarda ijtimoiy-maʼnaviy muhitning yaxshilanishiga ijobiy taʼsir koʻrsatadi.

“Besh tashabbus olimpiadasi” doirasida maktablar oʻqituvchilaridan iborat jamoalar ishtirokida Kasaba uyushmasi kubogi uchun oʻtkazilgan sport musobaqalari murosasiz bahslarga boy boʻldi.

Keskin raqobat muhitida oʻtgan musobaqalar yakunlariga koʻra sportning shaxmat turi boʻyicha ayollar oʻrtasida faxrli 1-oʻrinni 32-sonli umumtaʼlim maktabi oʻqituvchisi Navbahor Shamshatova, erkaklar oʻrtasida esa faxrli 1-oʻrinni 67-sonli maktab oʻqituvchisi Oybek Boltabayev egalladi.

Sportning shashka turi boʻyicha esa gʻoliblik ayollar oʻrtasida 76-sonli maktab oʻqituvchisi Roza Xidirovaga, erkaklar oʻrtasida 44-sonli maktab oʻqituvchisi Aminboy Eshimbetovlarga nasib qildi.

Stol tennisi musobaqalari yakunlariga koʻra ayollar oʻrtasida faxrli 1-oʻrinni 36-sonli umumtaʼlim maktabi oʻqituvchisi Eʼtibor Bobojonova egallagan boʻlsa, erkaklar oʻrtasida gʻoliblik 40-sonli maktab oʻqituvchisi Doniyor Yuldashevga nasib qildi.

Voleybol musobaqalari ham juda qiziqarli va hayajonli oʻtdi. Barcha bosqichlar yakunlariga koʻra 28-sonli maktab jamoasi ayollar oʻrtasida faxrli 1-oʻrinni egalladi. Ayollar oʻrtasida oʻtkazilgan minifutbol musobaqalarida esa 7-sonli maktab jamoasiga teng keladigani topilmadi.

Gʻolib ishtirokchilar va jamoalar musobaqalarning 3-bosqichida ishtirok qilish huquqiga ega boʻldilar. Shuningdek, gʻoliblar va faol ishtirokchilar taʼlim va fan xodimlari kasaba uyushmasi Amudaryo tuman boʻlinmasi kengashi tomonidan diplomlar va esdalik sovgʻalari bilan taqdirlandi.

Musobaqalarning tantanali yopilish va gʻoliblarni taqdirlash marosimida taʼkidlanganidek, sport bilan muntazam shugʻullanish oʻqituvchilarga oʻquvchilar bilan yangi va samarali muloqot qilish usullarini topishga yordam beradi, bu esa taʼlim sifatini oshirish, maktablarda ijtimoiy-maʼnaviy muhitni sogʻlomlashtirishga xizmat qiladi. Oʻtkazilgan ushbu musobaqalar ham ishtirokchi oʻqituvchilarga jamiyatning faol aʼzolari safida boʻlishga imkon yaratib, ularning jismoniy faolligini oshirishga yordam berishi shubhasiz.

Ulugʻbek Abduraxmanov, Oʻzbekiston taʼlim va fan xodimlari kasaba uyushmasi Amudaryo tuman boʻlinmasi kengashi raisi