“BADIIY GIMNASTIKA – GOʻZALLIK VA BARKAMOLLIK SPORTI” OChIQ BIRINChILIK MUSOBAQALARI OʻTKAZILDI

Mamlakatimizda bolalar sportini rivojlantirishga qaratilayotgan eʼtibor va ragʻbat tufayli turli yosh toifasidagi bolalar va oʻsmirlar, ayniqsa, oʻsmir qizlar oʻrtasida sportning olimpiya turlari boʻyicha shugʻullanuvchilar, hatto jahon sport arenalarida Oʻzbekiston sharafini muvaffaqiyatli himoya qilishga qodir umidli sportchilar yetishib chiqmoqda.

Ayniqsa, goʻzallik va nafosat, barkamollik ramzi boʻlgan badiiy gimnastika sporti bilan shugʻullanuvchi qizaloqlar safi oshib bormoqda. Mazkur sport turi eng chekka hududlardagi qishloqlarda istiqomat qiluvchi ota-onalar oʻrtasida ham katta qiziqish uygʻotib, oʻz qizlarining badiiy gimnastika toʻgaraklarida shugʻullanishlari uchun sharoit yaratib berishayotgani eʼtiborga munosib.

Bu borada Amudaryo tumani sport maktabi huzuridagi badiiy gimnastika toʻgaragi faoliyati tahsinga munosib. Ushbu toʻgarakda ayni paytda turli yosh toifasidagi 80 nafardan ziyod oʻsmir yoshdagi qizlar shugʻullanishadi. Ularga Shahodat Rajabova, Oydin Matrizayeva hamda Diyora Yodgorovalar badiiy gimnastika sporti sir-asrorlarini oʻrgatiladi. Tumanning eng chekka qishloqlarida istiqomat qiluvchi sportsevar qizaloqlar orasida turli darajadagi gimnastika sporti musobaqalari gʻoliblari, Oʻzbekiston chempionatlari, Qoraqalpogʻiston Respublikasi chempionatlari gʻolib va sovrindorlari bor.

Joriy yilning 27-fevral sanasida Amudaryo tumani sport maktabi sport zalida sport maktabining ochiq birinchiligi musobaqalarida ham badiiy gimnastika sporti toʻgaragi aʼzolaridan iborat sportchi qizlar gʻoliblik uchun kurash olib bordilar. “Badiiy gimnastika – goʻzallik va barkamollik sporti” shiori ostida oʻtkazilgan musobaqada Xorazm viloyatining Urganch shahri, Yangibozor tumanlari hamda Qoraqalpogʻiston Respublikasining Ellikqalʼa va Amudaryo tumani badiiy gimnastika sporti jamoalari oʻzaro kuch sinashdilar.

Musobaqa shartlariga koʻra, sportchilarning qoʻyilgan talablarni bajarishlarida sportchi madaniyati, shartlarni chaqqonlik va uddaburonlik bilan amalga oshirishdagi oʻziga xos uslubi, sport liboslarini tanlash mahoratlariga ham alohida eʼtibor qaratildi.

Qizgʻin va qiziqarli bahslarga boy oʻtgan musobaqada eng kuchli, epchil va oʻziga xos uslubiga ega sportchilar jamoalari gʻoliblikni qoʻlga kiritishdi.

Shunisi eʼtiborliki, amudaryolik gimnastikachi qizlar garchi yosh toifalariga koʻra, ancha yosh boʻlsalar-da oʻzlarining irodali, ahil va jips jamoa ekanliklarini amalda namoyon etdilar. Oʻz mahoratlari bilan mehmon jamoa aʼzolarini ortda qoldirgan Amudaryo tumani sport maktabining badiiy gimnastika toʻgaragi aʼzolari mutlaq gʻoliblikni qoʻlga kiritishdi.

Musobaqa yakunida 1-oʻrinni Amudaryo tumani sport maktabining badiiy gimnastika toʻgaragi jamoasi, 2-oʻrinni esa Urganch shahar sport maktabi huzuridagi badiiy gimnastika toʻgaragi aʼzolari egallashdi. Uchinchi oʻrin uchun boʻlgan qizgʻin bellashuvlarning badiiy gimnastika esa Ellikqalʼa tumani sport maktabining badiiy gimnastika toʻgaragi qizlariga nasib etdi.

“Badiiy gimnastika – goʻzallik va barkamollik sporti” shiori ostida oʻtkazilgan musobaqa yakunida gʻolib jamoalar Amudaryo tumani hokimi va Amudaryo sport maktabi maʼmuriyati tomonidan medallar, Diplom va esdalik sovgʻalari bilan taqdirlandilar.

Robiya Yoʻldosheva.