Daryoboʻyi va Uyshin mahallalari aholisi ishtirokida sayyor qabul boʻlib oʻtdi

Mamlakatimizda soʻnggi yillarda xalq bilan yaqindan muloqot qilish, insonlarning uzoq yillardan beri qiynab kelayotgan mummolarini oʻrganish va ularni bartaraf qilish maqsadida hududlarda davlat boshqaruv organlari masʼullarining sayyor qabullari tashkil etilishi yoʻlga qoʻyilgan. Amudaryo tumanida ham masʼul rahbarlarning hududlarda aholi vakillari hamda yoshlar bilan uchrashuvlari oʻtkazib kelinmoqda.

Rejaga asosan 24-fevral kuni Daryoboʻyi hamda Uyshin mahallalari aholisi ishtirokida tuman hokimligi masʼullarining sayyor qabuli boʻlib oʻtdi.

Sayyor qabulda tuman hokimining Yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Nodir Kamolov, tumandagi korxona-tashkilotlar masʼullari, Daryoboʻyi va Uyshin mahalla fuqarolar yigʻinlari raislari, xotin-qizlar faollari, yoshlar yetakchilari hamda aholi vakillari ishtirok etdilar.

Sayyor qabulda mazkur mahallalarda yashovchi fuqarolardan turli masalalar yuzasidan jami 26 ta murojaatlar kelib tushdi.

Xususan, Daryoboʻyi mahallasida yashovchi fuqaro yurak ishemik kasalligi bilan, turmush oʻrtogʻi esa qon bosimi kasalligi bilan kasallanganligi sababli moddiy yordam berishni, yana bir fuqaro yuragi kasalligi, turmush oʻrtogʻi vafot etganligi, hozirgi kunda jarrohlik amaliyoti oʻtashi uchun moddiy yordam soʻrab murojaat qilishdi. Shuningdek, fuqarolar “Amudaryo Agroservis” korxonasi balansidagi uyda ijarada yashayotganligi, oʻzlariga tegishli yer uchastkasiga uy qurish uchun imtiyozli kredit olishda amaliy yordam berishni, elektr energiyasining kuchlanishi pastligi sababli yangi oʻrnatilgan transformatorni ishga tushirish boʻyicha amaliy yordam soʻrab murojaat qildilar.

Qolaversa, fuqarolardan bir nafari “Ayollar daftari”ga kiritilganligi, tikuvchilik yoʻnalishi boʻyicha kasbga qayta oʻqiganligini maʼlum qilib, subsidiya asosida tikuv mashinasini olishda amaliy yordam berishni, 3 nafar fuqaro dehqon xoʻjaligini yuritish uchun yer maydoni ajratishda amaliy yordam berishni soʻrab tuman hokimligi masʼullariga murojaat qildilar. Masʼullar 2 nafar xotin-qizlarning goʻzallik salonini ochish uchun kasbga oʻqitishda, yana bir fuqaroning kredit olishda amaliy yordam soʻrab qilgan murojaatlarini ham atroflicha oʻrganib chiqdilar.

Shuningdek, sayyor qabul mobaynida fuqarolardan tadbirkorlik faoliyatini boshlash uchun kredit olish, oliy oʻquv yurtlarida oʻqish uchun shartnoma toʻlovlarini toʻlashda amaliy yordam berish kabi masalalarda ham murojaatlar kelib tushdi.

Murojaatlardagi masalalarning ayrimlari shu yerning oʻzida hal etilgan boʻlsa, qolganlarini bartaraf etish uchun tegishli tashkilotlar masʼullariga topshiriqlar berildi.

Charos Arslonova, tuman hokimligining Axborot xizmati.