Bosuv mahallasida hokim sayyor qabuli boʻlib oʻtdi

Bugungi kunda mamlakatimizda aholi orasiga kirib borish, ular bilan yuzma-yuz muloqot qilish, murojaatlarni tinglash, muammolarni oʻrganish va fuqarolar tomonidan koʻtarilgan masalalarni hal etish turli darajadagi davlat hokimiyati va boshqaruv organlari rahbarlarning asosiy vazifasiga aylangan. Mazkur ustuvor vazifani amalga oshirishda sayyor qabul oʻtkazish tizimi muhim ahamiyat kasb etmoqda. Joylarda masʼullar tomonidan tashkil etilayotgan sayyor qabullar fuqarolarning muammolarini joyida oʻrganish va ijobiy hal etish, muhim maʼlumotlar va qonunchilikdagi yangiliklarni aholiga yetkazishga xizmat qilmoqda.

Amudaryo tumani hokimi, 1-sektor rahbari Sobir Xoʻjametov 6-fevral kuni Bosuv mahalla fuqarolar yigʻinida fuqarolar muammolarnini tinglash, ularni hal qilishga amaliy yordam berish maqsadida sayyor qabul oʻtkazdi.

26-sonli umumtaʼlim maktabi binosida tashkil etilgan sayyor qabulda tuman hokimining Yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Nodir Kamolov, korxona-tashkilotlar rahbarlari, ovul fuqarolar yigʻini raisi, xotin-qizlar faoli, yoshlar yetakchisi, bir guruh yoshlar hamda fuqarolar ishtirok etdilar.

Sayyor qabul mobaynida 2 nafar yoshlar haydovchilik guvohnomasi oʻquv kursi xarajatlarini qoplab berishda amaliy yordam, 5 nafar yoshlar oliy oʻquv yurtlarida oʻqish uchun toʻlov shartnoma pullarini toʻlashda amaliy yordam hamda 1 nafar yosh oʻzini oʻzi band qilish uchun subsidiya asosida motokultivator olishda amaliy yordam soʻrab masʼullarga murojaat qildilar. Murojaatlar tuman hokimi va tegishliligi boʻyicha idora va tashkilotlar rahbarlari tomonidan birma-bir qabul qilinib, murojaat egalari bilan yuzma-yuz muloqot oʻtkazildi. Fuqarolar murojaatlari tinglanib, qayd etib borildi.

Shu oʻrinda taʼkidlash kerakki, soʻnggi yillarda mamlakatimizda davlat organlari bilan aholi oʻrtasida ochiq muloqotni yoʻlga qoʻyish, dolzarb muammolarni aniqlash, davlat organlari va boshqa tashkilotlar tomonidan murojaatlarning koʻrib chiqilishini taʼminlashga alohida eʼtibor qaratilmoqda. Hududlarda tashkil etilayotgan sayyor qabullar aholini yillar davomida qiynab kelgan muammolarning aniqlanishiga, ularning aksariyati joyida hal etilishiga zamin yaratmoqda.

Aholi farovonligini taʼminlash, yashash sharoitlarini yaxshilash, yangi ish oʻrinlari yaratish, mahallalardagi obodonlashtirish, qurilish, taʼmirlash ishlari, ichimlik suvi, elektr va gaz taʼminoti, yoʻl qurilishi va shu kabi fuqarolarni qiynab kelayotgan muammolarni bartaraf etishda, tumanda infratuzilmani rivojlantirish va aholi turmush sifatini yaxshilashda joylarda hokim va sektorlar rahbarlari tomonidan oʻtkazilayotgan sayyor qabullar muhim vosita boʻlmoqda.

Mazkur sayyor qabulda ham hokim fuqarolar bilan yuzma-yuz suhbatlashib, ularni qiynayotgan turli masalalar boʻyicha muammolarini tingladi. Fuqarolar tomonidan bildirilgan muammolar, turli yoʻnalishlardagi masalalar boʻyicha hokim oʻrinbosarlari va boshqa tegishli tashkilotlar mutasaddilari ishtirokida zarur choralar koʻrilishi alohida qayd etildi. Ayrim murojaatlar shu kunning oʻzidayoq hal qilingan boʻlsa, boshqa murojaatlarda koʻrsatilgan muammolarni hal etish yuzasidan tegishli idoralarning mutassadilariga aniq topshiriq va koʻrsatmalar berildi.

Qabul mobaynida ayniqsa mahalla yoshlari har xil sohalarda oʻzlarini qiziqtirgan turli savollar bilan masʼullarga murojaat qildilar. Masʼullar savollarga tegishlicha javoblar berib, yoshlarning hayotda oʻz oʻrniga ega boʻlishlari, oʻqib, bilim olishlari, kelajakda yurtimizga nafi tegadigan komil insonlar boʻlib yetishishlariga tilakdosh boʻldilar.

Charos Arslonova, tuman hokimligining Axborot xizmati rahbari.