Davlat bayrogʻi qabul qilingan kun munosabati bilan tadbir oʻtkazildi

Mamlakatimizning davlat ramzi boʻlgan bayrogʻimiz qabul qilingan 18-noyabr sanasi har yili bayram sifatida keng nishonlanib kelinadi. Sana munosabati bilan taʼlim-tarbiya maskanlarida oʻquvchi yoshlarimizni istiqlolning qadriga yetishga daʼvat qilish, yoshlar ongida davlat razmlariga nisbatan hurmat tuygʻusini shakllantirish, ularni milliy va umuminsoniy qadriyatlarga hurmat ruhida tarbiyalashga yoʻnaltirilgan turli tadbirlar tashkil qilinadi.

17-noyabr kuni Ixtisoslashtirilgan taʼlim muassasalari agentligi tizimidagi Amudaryo tumani ixtisoslashtirilgan maktabida Oʻzbekiston Respublikasi davlat bayrogʻi qabul qilinganining 32 yilligi munosabati bilan “Muqaddasdir Vatan bayrogʻi” shiori ostida maʼnaviy-maʼrifiy tadbir boʻlib oʻtdi.

Tadbirda ixtisoslashtirilgan maktabning oʻqituvchi va murabbiylari hamda oʻquvchilar ishtirok etdi.

Davlat bayrogʻi yurtimizning milliy timsoli hisoblanadi. Bayrogʻimiz xalqimizning shonli tarixi va ezgu intilishlarini oʻzida mujassam etib, tinch va osoyishta, erkin hayotimiz, yorugʻ kelajagimizga boʻlgan ishonchimizning mayogʻidir.

Tadbir avvalida Ixtisoslashtirilgan taʼlim muassasalari agentligi tizimidagi Amudaryo tumani ixtisoslashtirilgan maktabi direktorining oʻquv ishlari boʻyicha oʻrinbosari Ravshan Xolmurodov oʻquvchilarni mamlakatimiz bayrogʻi qabul qilinganining 32 yilligi bilan muborakbod etdi.

Taʼkidlanganidek, davlat bayrogʻi millatning birligi, mustaqillik timsoli sifatida oʻsha xalqning orzu-istaklarini, umidlarini, kelajakka boʻlgan ishonchini oʻzida ifoda etadi. Mamlakatimizning barcha hududida keng nishonlanayotgan davlatimiz bayrogʻi qabul qilingan kun mustaqilligimizni mustahkamlashda, oʻz taraqqiyot yoʻlimizni tanlashda muhim sana boʻlishi bilan birga, ota-bobolarimizning erkin va ozod, baxtli va farovon hayotni taʼminlashdagi asriy orzu-umidlari, armonlari ushalgan, buyuk kelajak sari yetaklagan kun sifatida tarixga muhrlangan.

Tadbir davomida ushbu muhim sananing tarixi hamda bayrogʻimizda milliy-tarixiy anʼanalarimiz, uzoq oʻtmishga borib taqaladigan boy madaniyatimiz, poklik begʻuborlik, yaxshilik, donishmandlik va sadoqat kabi buyuk fazilatlarimiz oʻz ifodasini topgani xususida soʻz yuritildi.

“Muqaddasdir Vatan bayrogʻi” deya nomlangan mazkur tadbirda maktabning 6-7-8-sinflar oʻquvchilari faol ishtirok etdilar. Oʻquvchilar tomonidan davlat ramzlari, mustaqillik, Vatan haqida ajoyib sheʼrlar aytildi. 5-sinf oʻquvchilari oʻrtasida rasmlar tanlovi oʻtkazildi. Unda oʻquvchilar oʻzlarining isteʼdod va qobiliyatlarini sinovdan oʻtkazdilar.

Tadbirda tarix fani oʻqituvchisi Begzod Toʻraboyev Oʻzbekiston Respublikasining davlat bayrogʻi faqatgina davlat ramzi emas, u shu yurtda tugʻilib, shu zaminda yashayotgan barcha millat va elatlarning gʻururi, tinchlik va ahillik timsoli ekanligi, qalblarni qalblarga yaqinlashtiradigan, dillarni dillarga ulaydigan vositaga aylanganligi, dunyoning qaysi burchagida boʻlmang, bu bayroq qadrdon ona Vatanni yodga solishi alohida taʼkidlandi.

Mamlakat va jamiyat taraqqiyoti hamda uning barqarorligida davlat ramzlarining alohida oʻrni bor. Shu maʼnoda, milliy bayrogʻimiz davlat va jamiyat hayoti, uning jahon hamjamiyatidagi oʻrni hamda rolini koʻrsatishda muhim ahamiyatga ega boʻlib, har birimiz uchun iftixor timsoli hisoblanadi.

Qadim-qadimdan xalqimiz uchun mustaqillik, hurlik, tinchlik va barqarorlik timsoli boʻlib kelgan, ajdodlarimiz ham muqaddas bilib, koʻz qorachigʻidek asragan Vatan bayrogʻi kelgusi avlodlar uchun ham qadrli va aziz boʻlib qolaveradi.

Tuman hokimligi Axborot xizmati