XOʻJALIKLARARO AVTOMOBIL YOʻLLARI HOLATINI YaXShILASh VA OBODONLAShTIRIShNI TAShKIL ETIShGA DOIR MAXSUS-TAKTIK OʻQUV MAShQLARI OʻTKAZILMOQDA

Amudaryo tumanida Favqulodda vaziyatlar boʻlimi va boshqa tegishli tashkilotlar hamkorligida “Tuman hududidagi ichki xoʻjaliklararo avtomobil yoʻllari holatini yaxshilash va obodonlashtirish tashkil etish” mavzusida oʻn kun davom etadigan maxsus-taktik oʻquv mashgʻulotlari davom etmoqda.

Tuman hokimi – Fuqaro muhofazasi boshligʻining 2022-yil 30-sentyabr kungi tegishli buyrugʻiga asosan shu yil 1-oktyabr kuni Toʻlqin ovuli hududidan boshlangan ushbu maxsus-taktik oʻquv mashqiga Qoraqalpogʻiston Respublikasi Favqulodda vaziyatlar boshqarmasi boshligʻining birinchi oʻrinbosari, shtab boshligʻi Baxtiyor Oʻrazboyev rahbarlik qildi. Toʻlqin ovuli hududidagi ichki xoʻjaliklararo avtomobil yoʻllari holatini yaxshilash va obodonlashtirishni tashkil etish maqsadida oʻtkazilgan mazkur maxsus-taktik oʻquv mashqiga 37 nafar shaxsiy tarkib va 17 ta maxsus texnikalar jalb qilindi.

Oʻquv mashqi mashgʻulotlari saf koʻrigi bilan boshlandi. Unda tuman Favqulodda vaziyatlar davlat tuzilmasi quyi tizimi xizmatlari va fuqaro muhofazasi “Yigʻma komandasi”, jalb etilgan texnikalarning mashgʻulotlarga tayyorligi tekshiruvdan oʻtkazildi. Saf koʻrigi davomida mazkur tadbirning 1-oktyabrdan 10-oktyabrga qadar davom etishi, oʻquv mashqi davomida taʼmirlanishi kerak boʻlgan ichki yoʻllar xaritasi belgilab berilgani, hududda obodonlashtirish ishlari amalga oshirilishi lozimligi tushuntirildi.

Shundan soʻng, tegishli tashkilotlar xodimlari va maxsus texnikalarni obodonlashtirish ishlariga jalb etishga doir topshiriqlar berildi va oʻquv mashqining amaliy qismi mashgʻulotlari boshlab yuborildi.

Maʼlumki, tumanda 2022-yilda ijtimoiy-iqtisodiy muammolari eng koʻp boʻlgan Ayoqchi mahallasi hamda Toʻlqin ovuli hududlari “Obod qishloq” va “Obod mahalla” davlat dasturiga kiritilgan.

Dastur doirasida jami 20,7 mlrd. soʻm mablagʻ ajratilishi rejalashtirilgan. Shundan respublika byudjetidan 10,8 mlrd. soʻm, Qoraqalpogʻiston Respublikasi mahalliy byudjeti mablagʻlaridan 5,1 mlrd. soʻm, tarmoq korxonalaridan 1,1 mlrd. soʻm, aholi, tadbirkor va homiylar mablagʻlari hisobidan 3,8 mlrd. soʻm ajratilishi koʻzda tutilgan.

Hozirgi kunda Toʻlqin ovuli hududidagi 24-sonli maktabgacha taʼlim tashkiloti binosini 1 mlrd. 132 mln. soʻm mablagʻ evaziga mukammal taʼmirlash boʻyicha pudratchi tashkilot “Temir beton” masʼuliyati cheklangan jamiyati tomonidan 1 mlrd. 75,3 mln. soʻmlik, yaʼni 95 foiz qurilish ishlari bajarilib boʻlindi va qolgan qismi belgilangan muddatga qadar tugatilishi moʻljallangan.

Hududda 4,4 km. uzunlikdagi gaz quvurlarini, 19 ta gaz taqsimlash punktlarini taʼmirlash rejalashtirilgan boʻlib, bugungi kungacha 3 km. uzunlikdagi gaz quvurlari va 19 ta gaz taqsimlash punktlarini taʼmirlandi.

Shuningdek, 2 km. uzunlikdagi piyodalar yoʻlakchasini qurish ishlari “Sanjar diyor bilding” masʼuliyati cheklangan jamiyati tomonidan amalga oshirilmoqda. Undan tashqari, tuman hokimligi va prokuraturasining tashabbusi bilan ovulning mazkur dasturga kirmay qolgan koʻchalariga tosh-shagʻal aralashmasi yotqizilmoqda.

Oʻquv mashqi mashgʻulotlari davomida jamoat tartibini saqlash va yoʻl harakati xavfsizligini taʼminlash yuzasidan zarur choralar koʻrildi. Maxsus texnikalar uchun yoqilgʻi-moylash mahsulotlari oʻz vaqtida yetkazib berildi. Shu bilan bir qatorda oʻquv mashqiga jalb etilgan hasharchilarga dam olishi, ovqatlanishi uchun qulay shart-sharoitlar yaratildi.

O.Xudoyberganova.