Nukusda Britaniya tajribasi orqali yer unumdorligini tiklash yoʻllari muhokama etildi
Orolboʻyi mintaqasida yerlarning degradatsiyasi va choʻllanish muammosi keskin tus olayotgan bir paytda Qoraqalpogʻiston Respublikasida tuproq unumdorligini qayta tiklash va suv resurslaridan oqilona foydalanish yoʻllarini izlash muhim ustuvor vazifaga aylanmoqda. Qoraqalpogʻiston qishloq xoʻjaligi va agrotexnologiyalar institutida ayni shu dolzarb mavzuga bagʻishlangan muhim ilmiy-amaliy tadbir – “Olti dyuym tuproq” nomli hujjatli film taqdimoti boʻlib oʻtdi.
Tadbirda Buyuk Britaniyaning Toshkentdagi elchixonasi vakillari, Qoraqalpogʻiston Respublikasi Vazirlar Kengashining Tashqi begʻaraz koʻmak mablagʻlarini jalb etish va donorlar bilan ishlash boʻlimi masʼullari, Qishloq xoʻjaligi vazirligi xodimlari, sohaviy ilmiy-tadqiqot institutlari mutaxassislari, shuningdek, institutning professor-oʻqituvchilari, doktorantlar va faol talaba-yoshlar ishtirok etdi. Xalqaro hamkorlik doirasidagi bunday muloqotlar mintaqadagi ekologik xavfsizlikni taʼminlashga qaratilgan yagona yondashuvni shakllantirishda muhim ahamiyatga kasb etdi.
Mazkur taqdimotdan koʻzlangan asosiy maqsad — degradatsiyaga uchragan yerlarning unumdor qatlamini qayta tiklash boʻyicha Buyuk Britaniyaning ilgʻor, innovatsion tajribasini chuqur oʻrganish hamda uni Qoraqalpogʻistonning shoʻrlangan va qurgʻoqchil sharoitida qoʻllash imkoniyatlarini atroflicha muhokama qilishdan iboratdir. “Olti dyuym tuproq” filmi aynan tuproqning hayotiy ahamiyati va uni saqlash usullariga bagʻishlangan boʻlib, u global iqlim oʻzgarishlari fonida mahalliy agrar sektorni barqaror rivojlantirishga undaydi.
Tadbir davomida ishtirokchilar ekologik muammolar, tuproq resurslarining samarali boshqaruvi, barqaror qishloq xoʻjaligi amaliyotlari hamda xalqaro hamkorlik istiqbollari haqida faol fikr almashishdi. Olimlar va mutaxassislar Orolboʻyi mintaqasidagi tuproq shoʻrlanishi va choʻllanish jarayonlariga qarshi kurashishda xorijiy innovatsiyalarni qoʻllashning ahamiyatini alohida qayd etib, buning uchun fan va amaliyot oʻrtasidagi integratsiyani kuchaytirish lozimligini taʼkidlashdi.
Filmda yoritilgan ilgʻor tajribalar va innovatsion yondashuvlar institut olimlari va talabalarida katta qiziqish uygʻotdi. Institut rektori Berdiyar Jollibekov boshchiligida oʻtkazilgan muhokamada ishtirokchilar bu tajribani Qoraqalpogʻistonning tuproq-iqlim sharoitida qanday qilib muvaffaqiyatli joriy etish mumkinligi haqida oʻz fikr-mulohazalarini bildirdilar.
Xususan, asosiy eʼtibor qurgʻoqchilikka chidamli, kam suv talab qiladigan navlarni joriy etish, suvni tejovchi agrotexnologiyalarni keng qoʻllash va tuproqni himoya qilishning organik usullarini rivojlantirishga qaratildi. Bu kabi ochiq muloqotlar yosh olimlar va talabalarni global muammolarga mahalliy yechim topishga undashi bilan birga, kelgusidagi ilmiy-tadqiqot ishlari uchun yangi, amaliyotga yoʻnaltirilgan mavzular va yoʻnalishlar ochib berishi bilan ham ahamiyatlidir.
Tadbir yakunlangandan soʻng, institut rektori Berdiyar Jollibekov Buyuk Britaniyaning Toshkentdagi elchixonasi vakillarini institutdagi yangi, zamonaviy laboratoriyalar bilan tanishtirdi. Ushbu laboratoriyalar tuproq tarkibini aniq tahlil qilish va ilmiy hamkorlik uchun mustahkam poydevor boʻlib xizmat qilishi taʼkidlandi.
Qoraqalpogʻiston qishloq xoʻjaligi va agrotexnologiyalar institutida oʻtkazilgan ushbu tadbir Qoraqalpogʻistonning ekologik va qishloq xoʻjaligi sohasidagi xalqaro hamkorlik aloqalarini yanada mustahkamlab, mintaqaning yashil iqtisodiyotga oʻtishini yanada jadallashtirish va bu jarayonda ilmiy asoslangan tajribalarni amaliyotga keng joriy etishga xizmat qiladi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
