Unutilmas xotiralar

Uyga kelsam mehmonlar kelgan ekan. Keyinchalik bilsam, ular "Amudaryo haqiqati” gazetasi muharriri Sobir aka Yusupov, muharrir oʻrinbosari Nurulla aka Xudoyorov, gazetaning masʼul kotibi Sobir aka Qutlimurodov, suratchi Safarboy Shomurodov va Tursunboy aka Davlatboyevlar ekan. Ular qoʻllaridagi gazetani oʻqib suhbatlashar, quvonchdan dillari yayrab oʻtirardilar. Bu 1965-yilning yoz fasli, "Amudaryo haqiqati” gazetasi va 4-bosmaxona qayta tashkil qilingan davr edi. "Ochil, oʻgʻling nimaga qiziqadi”, deb akam (otamni biz aka deb atardik)dan soʻrashganlarida u kishi mening adabiyotga va surat olishga qiziqishimni, fototoʻgarakda fotoapparat bilan suratga olishni oʻrganganligimni aytdi. Shunda Nurulla aka Xudoyorov menga "ertaga tahririyatga bor, Safarboy akangga yordamchi boʻlasan”, deb tayinladi.

Tahririyatda Nurulla aka Xudoyorov va Sobir aka Qutlimurodovlar gazetaga xabar yozishga qiziqish uygʻotdi. Koʻp oʻtmay "Sinfimiz aʼlochilari” deb nomlangan birinchimaqolam chiqdi. Keyinchalik gazetada xabar, lavha, hikoya, hajviya, sheʼrlarim bilan qatnashib turdim. Maktabni bitirgach, mustaqil hayotga ilk qadamimni 4-bosmaxonada shogird boʻlib ishlashdan boshladim. Nukus poligrafkombinatida linotipchilar tayyorlash oʻquv kursida oʻqidim. Linotip mashinasida harf terish va uni sozlashni oʻrgandim. 1969-yil 4-bosmaxonaga linotip mashinasi keldi va uni menga linotipda harf terish va sozlashni oʻrgatgan ustozim Kenjaboy aka Yerniyazov bilan qurib, ishga tushirdik.

Tumanimizda 4-bosmaxonada birinchi linotipda harf tergan Umida opa Mambetova boʻldi va menga oq fotihasini berdi. Bosmaxonada gazetaga linotipda harf terish boshlandi. Serqirra ijodkorlarning yozganlarini birinchi oʻqish va harflarda terish zavqli ish, qiyin, masʼuliyatli vazifa edi. Yosh ishchilarga oʻzlarining tajribalarini oʻrgatib, ishga havas uygʻotgan ustozlar Gulbiy opa Davletmurodova, Kunjarqin opa Otamurodova, gazeta sahifalovchi Momojon opa Abdullayevalar bizlardek yoshlarni bosiq, chidamli, vazmin boʻlib ishlashimizga undardi. Harf terish igna bilan quduq qazishdek gap. Gazetani chop qiluvchi Rajab aka Abdullayev, Saʼdulla aka Qurolov ishlarini Oyimjon opa Niyozova, Jumagul Sobirova, Bibirobiya Omonovalar davom qildirdilar. Qishloq qizi Jumagul Erdosheva Mangʻitga turmushga chiqqach, ish faoliyatini bosmaxonada harf teruvchilikdan boshlab, gazetani chop qilishni ham mukammal oʻrgandi. Linotipda harf terishda ilk mehnat faoliyati bosmaxonada ishlashdan boshlangan Jumaboy Abdullayev koʻplab shogirdlar chiqardi. Jumagul Erdosheva, Gulandom Yangiboyeva, Dilbar Jumamurodova, Ulboʻsin Obdolova, Norgul Yusupova oliy maʼlumotli muhandis-texnolog Gulbahor Ibrohimova kabi yoshlarga linotipda harf terishni Maryam Begaliyeva bilan oʻrgatdilar.

Qoraqalpogʻiston Respublikasi tumanlariaro raqobatlashuvda 4-bosmaxona mehnat jamoasi gohida gʻolib, gohida yuqori oʻrinlarni olib keldi.

Vaqt oʻtgach, shogirdlikdan usta darajasiga yetib ishladim.

Gazetani chop qilishda fidokorlik koʻrsatib uzoq yillar ishlagan Jumaboy Boltaboyevning hissasi katta.

Joriy yilda gazeta tashkil qilinganligining 80 yilligi nishonlandi. Ha, oʻz mehnatlari tufayli elga tanilgan 4-bosmaxona sobiq ishchilaridan tortib, hozirgi kunda mehnat qilayotgan matbaachilarning gazeta bosmadan chiqishida salmoqli hissalari bor, albatta. Buni aslo unutib boʻlmaydi.

Davlatboy Ochilov,

mehnat faxriysi.