MUSIQA VA SANʼAT MAKTABIDA USTOZ SANʼATKOR BILAN UChRAShUV OʻTKAZILDI

Sanʼat odamlarning estetik talablarini qondirish bilan birga, oʻz taraqqiyotining turli davrlarida jamiyat aʼzolarini aqliy va hissiy jihatdan rivojlantirish vositasi boʻlib kelgan. Sanʼat odamlarning moddiy va maʼnaviy faoliyatidagi bilimi, tajribasi, mahorati va qobiliyatini namoyon etuvchi badiiy ijodiyot mahsulidir.

Inson zoti borki, musiqa va sanʼat asarlaridan bahra oladi, goh sokin, goh joʻshqin, goh dardli kuy-qoʻshiqlarni tinglab, orom oladi, dunyoni, oʻzini, oʻzligini anglashga, tiriklik, hayot mazmun-mohiyatini teranroq anglashga intilaveradi. Shu barobarida elga manzur qoʻshiqlar ijro etgan sanʼatkorlarga hurmat-eʼtibori ortaveradi.

Tumanimizda sanʼat sohasida oʻziga xos maktab yaratgan, yoshlarning sevimli murabbiysi, dilga yaqin qoʻshiqlari bilan nafaqat tumanda, hatto mamlakatimizda, xorijda ham oʻz ijrosi bilan tinglovchilar qalbini zabt etgan Qoraqalpogʻistonda xizmat koʻrsatgan madaniyat xodimi Gulmurza Nurmatov ham ana shunday hofizlarning biri desak, adashmagan boʻlamiz.

U uzoq yillar tumandagi Bolalar musiqa va sanʼat maktabida direktor, tuman Madaniyat boʻlimi mudiri lavozimlarida sidqidildan mehnat qildi. Oʻzining ijrochilik mahorati, ijodkorligi bilan, sanʼatga fidoyiligi bilan shogirdlarining yuksak hurmat-eʼtiborini qozongan Gulmurza Nurmatov bu yil hayotining tabarruk saksoninchi bahorini qarshi oldi.

Shu munosabat bilan joriy yilning 29-martida tuman Bolalar musiqa va sanʼat maktabida otaxon hofiz bilan maktab oʻquvchilarining uchrashuvi boʻlib oʻtdi. Tuman madaniyat boʻlimi, maktab rahbariyati hamkorligida tashkil etilgan kechaga oʻquvchilar, oʻqituvchilar, Gulmurza Nurmatovning sanʼat sohasida faoliyat yuritayotgan shogirdlari ishtirok etdilar.

Tadbirni tuman Madaniyat boʻlimi xodimi, suxandon Oybek Begimov boshqarib bordi. Soʻzga chiqqan tuman Bolalar musiqa va sanʼat maktabi direktori Yoʻldosh Abdalov ustoz sanʼatkorni 80 yillik yubileyi bilan qizgʻin qutldi. Ustozning bosib oʻtgan hayot va ijodiy yoʻli, sermahsul faoliyati haqida berilgan maʼlumotlar oʻquvchilarda katta taassurotlar qoldirdi.

Gulmirza Nurmatov ham sanʼat yoʻlini tanlagan yoshlarni mashaqqatlardan choʻchimay, ijodiy barkamollik sari dadil intilishga, xalqimizga manzur boʻladigan kuy-qoʻshiqlar yaratib, maromiga yetkazib ijro etishga daʼvat etdi. Oʻz navbatida umtoz ijodkor oʻziga koʻrsatilayotgan hurmat-eʼtibor uchun Bolalar musiqa va sanʼat maktabi rahbariyatiga minnatdorchilik bildirdi.

Tadbirda ishtirok etgan maktab oʻqituvchilari, oʻquvchilari Gulmurza Nurmatovga ijodiy faoliyatiga doir oʻzlarini qiziqtirgan savollarni berib, batafsil javoblar oldilar.

Tadbir soʻngida Bolalar musiqa va sanʼat maktabi oʻquvchilari ijrosida kontsert dasturi namoyish etildi. Bolaligidan Usmon Ahmedov, Nazir Rahimov, Rajabboy Bobojonov kabi sanʼat dargʻalari nazariga tushib, ulardan ulkan saboqlar olib, birga ijod qilgan ustoz ijodkor bugun tabarruk yoshga yetdi. Yoshligidan elimizning suyukli sanʼatkorlari bilan sahnalarda birga kontsert dasturlarda qatnashib, ularning sanʼatidan, el xizmati yoʻlidagi fidoyiliklaridan oʻrnak olib kelgan Gulmirza Nurmatov hayoti davomida ustozlarining yoʻlini sharaf bilan davom ettirdi. Sakson yoshida ham ovozidagi joʻshqinlik, kuylash ishtiyoqi soʻnmagan ustoz sanʼatkorning hayotidan, faoliyatidan barcha ibrat olsa arziydi.

Oygul RAJABOVA.