Dunyoda eng ulkan boylik salomatlikdir

Koʻklam! Garchi hududimizda hamon qish ob-havosi hukmronlik qilayotgan boʻlsa-da, fasllar almashinuvini quvonib qarshi oldik. Shunday damlarda uzoq davom etgan qishdan soʻng bahorni sogʻinganimizni his qilamiz. Qalbimizga joʻshqinlik kirib keladi. Ona tabiatimizning fusunkor fasli bayramlar, quvonchli kunlar koʻpligi bilan ham aziz. Ayniqsa, 8-mart – Xalqaro xotin-qizlar kuni muhtarama onaxonlarimiz, opa-singillarimiz uchun unutilmas taassurotlar hadya etadi. Bu avvalo jamiyatimizda ayol-qizlarga gʻamxoʻrlik tobora kuchayayotgani, ayollik, onalik maqomi yuksak tutilib, ularning sogʻligʻi muhofaza qilinayotganining ifodasidir.

Men oʻrta maktabni tugatgach, Toshkent Davlat Tibbiyot oliygohida oʻqidim. 1985-yilda oliygohni akusher-ginekolog mutaxassisligi boʻyicha tugatib, Nukus shahridagi Respublika tugʻruqxonasida internatura oʻtadim. 1986-yildan beri Amudaryo tuman Tibbiyot birlashmasi tugʻruq kompleksida  akusher-ginekolog boʻlib ishlab kelayapman.

Shifokorlik faoliyatimni boshlaganimga  bu yil 37-yil toʻlayapti.

Momolarimiz koʻzi yoriyotgan ayolni “ikki dunyo oraligʻida” deb bejiz aytishmaydi. Mehnat faoliyatim davomida necha-necha yuzlab ayollarning koʻzi  yorishida tibbiy koʻmak berganimdan, ham tugʻruq asoratlarsiz kechishiga,  ona-bola sogʻligʻiga putur yetmasligiga erishganimdan, necha-necha ayollarni davolab, farzandli boʻlishlariga sababchi  boʻlganimdan doimo faxrlanib yashayman. Homiladorlikka monelik qiluvchi kasalliklari davolanib, ona boʻlishga umid uygʻonib, koʻzlari chaqnab turgan ayolni koʻrish ham shifokor uchun bir baxt. Bu – uning mehnati samarasi.

Mamlakatimizda onalik va bolalik muhofazasiga, sogʻlom onadan sogʻlom farzandlar dunyoga kelishiga erishishga ulkan eʼtibor berilayotgani biz shifokorlarni juda quvontiradi. Bu yoʻlda tugʻruq  yoshidagi ayollar har yili chuqurlashtirilgan tibbiy koʻriklardan oʻtkazilib, zarur hollarda davo muolajalari olib borilayapti. Homilador ayollar muntazam tibbiy nazoratga olinib, ona va homila holati kuzatib boriladi.

Oʻtgan yili tuman boʻyicha 5169 nafar homilador ayollarning 4750 nafari homiladorlikning 14 haftasigacha hisobga olingan. Ularning 3902 nafari tumanda UTT apparatida, 848 nafari Respublika Skrining markazida skrining tekshiruvidan oʻtkazilgan. Akusherlik patologiyasi boʻlgan 170 nafar ayolning homiladorligi toʻxtatilgan.

Bizning maqsadimiz – oila bekasi, farishtasi boʻlgan ayollarning va hayotimiz davomchilari boʻlgan bolalarning sogʻlom va baxtiyor yashashidir. Ha, dunyoda eng katta boylik – sogʻliqdir.

Dinora ABDURAIMOVA,

tuman TTB bosh akusher-ginekologi.