RAVON YOʻLLAR obod manzillarga eltadi

Tumanimizda joylashgan umum-foydalanuvdagi avtomobil yoʻllari 1979-yilda asfalt qilingan. Oʻshanda yoʻllarning asosi tayyorlanmasdan, asfalt yotqizish ishlari olib borilgani uchun ishlar sifatsiz bajarilgan.

Respublikamiz mustaqillikka erishgandan soʻng, 1991-yildan shu kungacha eski tuproq yoʻllar va buzilgan, taʼmirga muhtoj yoʻllarga shagal qoplama, qora qoplama va asfalt yotqizilib, umumfoydalanuvdagi yoʻllarning qariyb 50 foizi, xoʻjaliklararo ichki yoʻllarning 80 foizi qaytadan taʼmirlandi.

Ayni kunda tumanimiz hududida 340 kilometr umumfoydalanuvdagi, 710 kilometr xoʻjaliklararo ichki yoʻllar mavjud boʻlib, bu yoʻllarning 200 km. qismini asfalt qoplama, 298 km. qismini qora qoplama va 319 km. qismini esa shagʻal qoplama tashkil etadi.

Ayniqsa, istiqloldan keyin taraqqiyotimizning boshqa sohalari kabi yoʻl qurilishi sohasiga ham hukumatimiz tomonidan eʼtibor kuchaytirilib, yangidan yoʻllar qurilishiga, mavjud yoʻllarni taʼmirlash va saqlash ishlariga katta mablagʻlar ajratilmoqda.

Buning natijasida tumanimizda soʻnggi 7-yil ichida (2007-2013-yillar) jami 123 kilometr yoʻllar taʼmirlandi, shundan 32 kilometr umumfoydalanuvdagi, 81 kilometr xoʻjaliklararo va 10 kilometr namunaviy uy-joy mavzelari yoʻllariga asfalt, qora qoplama va shagʻal tosh yotqizilib, 16,2 mlrd. soʻm mablagʻ oʻzlashtirildi.

Sobiq ittifoq davrida korxonamiz yillik ish hajmi solishtirma bahoda 500 mln. soʻmni tashkil qilgan boʻlsa, hozirgi kunga kelib bu koʻrsatkich 10 baravarga oshdi.

Yoʻl qurilishi va yoʻllarni taʼmirlash ishlaridan olingan daromaddan 2 ta ogʻir yuk koʻtaruvchi samosval, 2 ta transport traktori, 2 ta yuklagich va boshqa texnikalar xarid qilinib, korxonaning moddiy texnika bazasi yanada mustahkamlandi.

Istiqlol tufayli yurtimizda yoʻl qurilish sohasiga katta eʼtibor qaratilib, nafaqat shahar markazlari, chekka qishloqlarda ham zamon talablari darajasiga javob beradigan ravon yoʻllar qurilayotganligi turmushimizni yanada obod qilib, aholiga qulaylik yaratmoqda.

Olimboy ABDULLAYeV,

TYXPTFK direktori.