Mustaqillik bergan imkon
Bugungi hayotimizda roʻy berayotgan mislsiz oʻzgarishlarni, xalqimiz turmush tarzidagi farovonlikni, ayniqsa, bozorlarimizdagi toʻkinchilikni koʻrib, bundayin dorilomon kunlarga yetganimizga shukronalar aytaman. Axir oʻtgan asrning 1980-1991-yillarida gʻoyat ogʻir kunlarni boshimizdan kechirganmiz. Oʻsha yillarda sobiq ittifoq qonunchiligiga koʻra biron bir kishining boyib ketishi, xususiy mulk egasi boʻlishi aslo mumkin emasdi. Biz faqat oʻzimiz yashaydigan uyimizga, nari borsa bitta mototsikl yoki mashinamizga egalik qila olardik. Ikkita avtomobili bor odam albatta shubha ostiga olinib, daromadi tekshirilardi. Xususiy oshxona, hozirgiday hashamatli toʻyxona, yirik yer egasi, fermer yoki mulkdor boʻlish oʻzbek xalqining yetti uxlab tushiga ham kirmagan orzu edi, xolos. Hatto oʻzimizning Xiva gilamlarini Moskvaga sayohatga borgan kishilar oʻsha tomonlardan sotib olib kelishardi.
Oʻzbekiston Mustaqillikka erishgach, avvalgi sobiq ittifoq qonunchiligiga tamoman zid boʻlgan tushunchalar hayotimizga kirib keldi – xususiy mulk, tadbirkorlik faoliyati, aktsiya, aktsiyadorlik jamiyati kabi.
Ming shukurki, endilikda davlat mulki, jamoa mulki bilan bir qatorda biz tadbirkorlarga daromad olish imkonini beruvchi xususiy mulkning ham amalda mavjud boʻlishi mustaqil davlatimiz qonunlarida toʻliq kafolatlandi. Shu bois, biz oʻz xususiy mulkimiz (oshxona, toʻyxona, savdo-sanoat firmasi) mulkchilik shakli qanday boʻlishidan qatʼiy nazar, amaldagi qonunchiligimizga mos ravishda uning xizmat koʻrsatish hududini kengaytirish, hatto oʻz mahsulotlarimiz bilan dunyo bozorlariga chiqishimiz uchun barcha imkoniyatlar yaratilgan.
Men tadbirkor sifatida har tong oʻz ish faoliyatimni boshlarkanman, qalbim faxr va iftixorga toʻladi:
- Kecha men kim edim? – deyman oʻzimga-oʻzim.
- Oʻzi istagan ezgu ishni qila olmaydigan erksiz odam edim-ku, axir! Endi-chi! Endi bankda oʻz hisobi, muhri va tamgʻasiga, oʻz mulkiga ega tadbirkorman!
Tadbirkorlik tufayli oʻgʻil-qizlarimni, yurtdoshlarimni ish bilan taʼminladim, farzandlarimni uyli, mashinali qildim. Endi nevaralarimga namunaviy loyiha asosida qurilayotgan uylarga buyurtma berdim.
Mustaqillik bergan imkon tufayli obroʻ-eʼtibor topdim, mulk egasi boʻldim. Ana shunday buyuk imkoniyatlar eshigini lang ochgan ona Oʻzbekiston – Mustaqil Vatanimiz omon boʻlsin!
TursunboyAhmedov,
tadbirkor.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
