Adabiyot 01.07.2014 👁 2,897

“Sogʻlom bola yili” yangiliklari

* Tumanimiz pillakorlari joriy yilgi mavsumda 243,5 tonna oʻrniga 267 tonna pilla topshirib, davlat shartnomasini Qoraqalpogʻiston Respublikasida birinchi boʻlib ortigʻi bilan bajardilar. Muhimi, yetishtirilgan pillaning 100 foizi tumanimizda - "Asia silk" shoʻʼba korxonasida qayta ishlanadi.

* Yangidan ishga tushirilayotgan MChJ shaklidagi "Amudaryotex" xorijiy korxonasi paxtadan yuqori sifatli eksportbop toʻqimachilik va trikotaj sanoati uchun yiliga 6000 tonna yigirilgan kalava-ip ishlab chiqaradi va 250 ta yangi ish oʻrni yaratiladi.

Ishlab chiqarilgan mahsulotning 80 foizini eksport qilish rejalashtirilmoqda.

* Bu yil tumanimiz gʻallakorlari 3 ming gektar yerga bugʻdoy ekib, moʻl hosil yetishtirishga erishdilar. Gʻallakorlarimiz yalpi xirmonni 11 ming 100 tonnaga yetkazib, shundan 5530 tonna gʻalla xosilini shartnoma boʻyicha davlat xazinasiga topshirishni rejalashtirmoqdalar.

* Shu yilning 23-iyunida "Eng namunali fuqarolarning oʻzini-oʻzi boshqarish organi" koʻrik-tanlovining tuman bosqichi boʻlib oʻtdi.

Koʻrik-tanlovda "Kuyukkoʻpir" ovul fuqarolar yigʻini (oqsoqoli R.Erlapasov) birinchi oʻringa, "Oʻrta qalʼa" ovul fuqarolar yigʻini (oqsoqoli I.Toʻrayev) ikkinchi oʻringa, Beruniy MFY (oqsoqoli A.Saʼdullayev) uchinchi oʻringa loyiq, deb topildilar.

Shuningdek, 11 ta nominatsiya boʻyicha ham gʻoliblar aniqlandi.

* Yaqinda Nukus shahrida "Orasta qizlar davrasi" koʻrik-tanlovining Qoraqalpogʻiston Respublikasi bosqichi boʻlib oʻtdi. Mazkur tanlovning tuman bosqichi gʻolibi, Mangʻit shahrining "Olmazor" mahallasi "Orasta qizlari" Respublikamizda ham birinchi oʻrinni egalladilar.

* Yaqinda "Salomatlik-3” loyihasi boʻyicha tuman tibbiyot birlashmasiga qarashli koʻptarmoqli markaziy poliklinikaga zamonaviy rusumdagi "Londvint” firmasi mahsuloti boʻlgan rangli dopler sistemali ultratovush skaner apparati berildi.

Bu yangi zamonaviy apparat "3D” oʻlchamli, koʻp funktsiyali kompyuter sistemasi bilan jihozlangan. Uning afzalligi - (ichki har bir aʼzoni koʻrish tiniqligi aniq) datchiklari oʻz-oʻzidan kompyuter orqali kerakli chastota bilan taʼminlanadi.

* Zamonaviy, raqamli, kompyuterlashtirilgan 2 ta rentgen apparaturasi keltirilganligi tuman tibbiyot birlashmasida statsionar, ambulator davolanuvchilarga aniq tashxis qoʻyish imkonini yanada oshirdi. Apparatning birini koʻptarmoqli markaziy poliklinikaga, yana birini kasalxonaga oʻrnatish rejalashtirilmoqda.

* 22-iyunda "Ayollar sport festivali”ning tuman bosqichi boʻlib oʻtdi. Sportning 6 ta turi boʻyicha oʻtkazilgan musobaqalarda gʻoliblar aniqlanib, ular respublika bosqichiga yoʻllanma oldilar. Mazkur sport festivalining Qoraqalpogʻiston Respublikasi bosqichida tumanimizdan 19 nafar sportchi ayol-qizlar qatnashadilar.

* Tumanimizdagi 2-sonli BOʻSM direktori, Xalqaro toifadagi hakam Chorsham Tojimurodov yaqinda Namangan shahrida 1995-96-yillarda tugʻilgan oʻsmirlar va qizlar oʻrtasida sportning kurash turi boʻyicha oʻtkazilgan Oʻzbekiston chempionatida bosh hakam vazifasini bajardi.

Bu chempionatda gʻoliblikni qoʻlga kiritgan yosh sportchilar jahon birinchiligida Oʻzbekiston sport sharafini himoya qiladilar.

* Ayni kunlar tumanimizda faoliyat yuritayotgan barcha umumtaʼlim va boshlangʻich taʼlim maktablarida bolalar yozgi taʼtilda boʻlsalar-da qizgʻin mehnat davom etmoqda. Maktablarda kelgusi oʻquv yiliga tayyorgarlik ishlari, shu jumladan joriy va kapital taʼmirlash ishlari olib borilmoqda. Maktab binolarini yangi oʻquv yiliga shay qilib qoʻyish borasida belgilangan ishlarning shu kungacha 80 foizdan ziyodi bajarildi.

* Keyingi yillarda oʻqituvchilar ijodkorligiga, oʻz ustlarida ishlashlariga katta eʼtibor qaratilayotganligi oʻz samarasini berayotir. Tugallangan oʻquv yilida 4 nafar fan oʻqituvchilari - 40-umumtaʼlim maktabidan Karomat Xudoyberganova, 5-umumtaʼlim maktabidan Barno Saidova, 33-umumtaʼlim maktabidan Jangaboy Gulmonov, 30-umumtaʼlim maktabidan Otabek Tajiyevlar "Yilning eng yaxshi fan oʻqituvchisi” koʻrik-tanlovining Qoraqalpogʻiston bosqichida gʻolib boʻlib, Oʻzbekiston Respublikasi bosqichida ham muvaffaqiyatli qatnashdilar.

* Tugallangan oʻquv yilida tumanimiz umumtaʼlim maktablari oʻquvchilarining 5 nafari fan olimpiadalarining Qoraqalpogʻiston Respublikasi bosqichida birinchi oʻrinlarni egalladilar.

Mamlakat miqyosida oʻtkazilgan "Bilimlar bellashuvi”da 3 nafar oʻquvchi muvaffaqiyatli ishtirok etishdi.

* 2013-2014 oʻquv yilida tumanimiz umumtaʼlim maktablarining 9-sinfini tugatgan 2920 nafar oʻquvchi-yoshlar taʼlimning keyingi bosqichi - akademik litsey va kasb-hunar kollejlariga toʻliq qamrab olindi.

* Joriy oʻquv yilida tumanimizdagi 8 ta kasb-hunar kollejlarini oʻzlari tanlagan mutaxassisliklar boʻyicha tugatgan 2652 nafar yigit-qizlarga mutaxassislik diplomlarini tantanali ravishda topshirish marosimlari boʻlib oʻtmoqda.

* Joriy yilda tumanimizda qurilish sohasida ham qator ishlar amalga oshirilmoqda. Qishloq joylarida 70 ta namunaviy loyihalar asosidagi uy-joylar, shuningdek, 60 oʻquvchi oʻringa moʻljallangan Maishiy xizmat koʻrsatish kasb-hunar kolleji ustaxonasi, Amudaryo qishloq xoʻjalik kasb-hunar kolleji binosini kapital taʼmirlash ishlari, Amir Temur nomli ovul hududidagi 4-sonli maktabni rekonstruktsiya qilish, Qilichboy ovuli hududidagi 15-sonli maktabni kapital taʼmirlash ishlari amalga oshirilmoqda. Shuningdek, bir necha taʼlim muassasalarida kapital taʼmirlash va rekonstruktsiya ishlari amalga oshirilmoqda.

* Tumanimiz hududida 5 ta futbol maydonchalari qurilayotgani va yaqinda qurilishi boshlangan "Kamolot shaharchasi” ham yosh avlod kelajagi yoʻlida amalga oshirilayotgan xayrli ishlarning namunasidir.