Har bir oila baxtiyor yashasin

"Doʻrman” ovuli tumanimizning eng chekka hududi boʻlib, 448 xonadonda 2453 nafardan ziyod turli millat vakillari ahil-inoq yashashmoqda.

Hududda obodonlashtirish, koʻkalamzorlashtirish, hayotimiz manbai boʻlgan yashil daraxtlarni koʻpaytirishga alohida eʼtibor berilayapti.

Ovulning har bir xonadoni oila iqtisodi tayanchi boʻlgan tomorqa yerlarga ega va undan yil sayin samarali foydalanishga erishmoqda.

Shuningdek, yoʻl boʻylariga, ariqlar chetlariga turli manzarali daraxtlar, gullar ekib parvarishlab, ovulimiz fayziga-fayz qoʻshishga harakat qilayapmiz.

Ovul yoshlarining davr talabiga mos voyaga yetishlari, oilalarning tinch-xotirjam yashashlari, ovuldoshlar orasida oʻzaro hurmat, mehr-oqibat hukmron boʻlishi va baxtiyor, tinch-xotirjam yashashlariga erishish bizning eng muhim vazifalarimizdandir. Bularga erishish uchun ovul fuqarolar yigʻinimizda tashkil etilgan komissiyalar aʼzolari bilan birgalikda tinimsiz ish olib borayapmiz. Xususan, hududimizdagi maktab, kollej va boshqa korxona-tashkilotlarda yoshlarning turli zararli oqimlarga kirib ketishining oldini olishga, oʻzbekona odob-axloqni targʻib etishga, ularni milliy qadriyatlarimiz, anʼanalarimiz ruhida tarbiyalashga oid turli madaniy-maʼrifiy kechalar, suhbatlar oʻtkazayapmiz. Tadbirlarimiz taʼsirchanligini oshirish uchun ularni bevositayoshlarning oʻzlari ishtirokida tayyorlashga harakat qilayapmiz.

Bunda bizga hududimizda istiqomat qiluvchi tibbiyot xodimlari, oʻqituvchilar yaqindan yordam berishayapti.

Toʻy-maʼrakalarni, turli marosimlarni ixcham, ortiqcha isrofgarchiliklarsiz oʻtkazishga intilishimizni butun aholimiz qoʻllab-quvvatlayotir.

Hayotda har bir inson baxtli, emin-erkin, farovon yashashga haqli.

Mamlakatimizda ana shunday turmush darajasiga erishish uchun barcha sharoitlar muhayyo. Va shu imkoniyatlardan foydalanishda amal qilishimiz lozim boʻlgan mamlakatimiz qonun hujjatlari mavjud. Bu haqda aholi orasida keng tushuntirishlar olib borayapmiz.

Maqsadimiz har bir xonadon farovon, baxtiyor turmush kechirishiga erishishdir.

Murod Qurbonboyev,

"Doʻrman” ovul fuqarolar yigʻini raisi.