SAHNADA GOʻZALLIKLAR YaRATGAN AYoL

Yurtimizda bayramlar koʻp. Ayniqsa, bahor fasli bayramlar bilan boshlanib, el-yurtni fayzga toʻldiradi. Butun xalqqa koʻtarinki ruh bagʻishlab, shodiyonalar shodiyonalarga ulanadi. Bayramlar arafasida barcha hududlardagi Madaniyat markazlari tomonidan katta tayyorgarlik koʻriladi. Ommaviy  bayram  tadbirlari  chuqur  gʻoyaviy mazmun bilan boyitilib, aholining maʼnaviy-madaniy hordiq chiqarishiga imkoniyat yaratiladi.

Katta shodiyonalar, qutlugʻ ayyomlar munosabati bilan tumanimizdagi Madaniyat boʻlimi tomonidan ham bayram dasturlari tayyorlanib, namoyish etiladi va aholiga koʻtarinki kayfiyat ulashiladi. Ayniqsa, yuksak mahorat bilan bezatilgan sahna, turli dekoratsiyalar, ijrochilarning did bilan tanlangan liboslari ruhiyatni yanada koʻtaradi. Barchaga bayramona ruh baxsh etib, atrofga ham oʻzgacha fayz kiritadi.

Bayramlarda aholiga taqdim etib kelinayotgan turli dasturlar, tadbirlarning chiroyli, mazmunli chiqishiga, yuqori saviyada oʻtkazilishiga boʻlimning har bir xodimi qatorida liboslar boʻyicha mutaxassis, sahna bezakchisi Mehribon Yoʻldosheva ham fidoyilik bilan oʻz hissasini qoʻshib kelmoqda. Har bir tadbirda oʻz mahoratini namoyish etib, yangi gʻoyalar topishga, sahnani bekamu-koʻst bezashga, liboslarga oʻzgartirishlar kiritib, bayramlarga mos andozalar yaratishga harakat qiladigan mutaxassis fidoyi xodim sifatida barchaga oʻrnak boʻlib kelmoqda. 

Mehribon Yoʻldosheva sohada 11-yildan buyon faoliyat koʻrsatmoqda. U liboschi boʻlish bilan birga “Ofarin” folklor-etnografik xalq jamoasi aʼzosi hamdir. Respublika, tuman miqyosidagi folklor chiqishlarda oʻz isteʼdodini, mahoratini namoyish etib, el eʼtirofiga sazovor boʻlmoqda. Xalq sayllari, Navroʻz va Mustaqillik bayramlarida, folklor yoʻnalishdagi koʻrik-tanlovlarda jamoa chiqishlarining mazmunan boyishiga oʻz hissasini qoʻshmoqda.

Oʻzining mehnat faoliyati davomida tuman ijtimoiy hayotida faol ishtirok qilib kelayotgan bu fidoyi ayol  kasbdoshlariga gʻamxoʻr, xushmuomala, halol va kamtar inson, namunali oila bekasi, 4 nafar farzandi bor. Oʻz farzandlarini el-yurt manfaatiga yaraydigan,  munosib insonlar etib voyaga yetkazmoqda.

U bayram arafasida tuman hokimining Faxriy yorligʻi bilan taqdirlandi. Elda va kasbdoshlari orasida oʻz masʼuliyatliligi bilan eʼtibor qozongan, sahnalarni bayramona bezatib, goʻzalliklar yaratib kelayotgan fidoyi ayolni bu kabi ragʻbatlar yanada koʻproq mehnat qilishga undaydi. 

O.Xudoyberganova.