Jayxun ilhomlari

Yangi yil ORZULARi

Oʻzgacha shukuhda, oʻzgacha zavqda,

Koʻnglimni toʻldirib ulugʻ maqsadga.

Orzu-armonlarim gulga kirmoqda,

Yangi yil, kelaver, seni sogʻindim.

 

Biram goʻzal bugun bu xiyobonlar,

Koʻngilga xush yoqar shod-xurram onlar.

Derazamni chertar Ayozbobo ham,

Yangi yil, kelaver, seni sogʻindim.

 

Xayr eski yilim, sendan roziman,

Omad olib kelding oʻgʻil-qizimga.

Kim uchun baxt-iqbol, yo dil rozisan,

Sinovlarda boʻlding bir tarozi sen.

 

Shoshib oqib ketgan soy boʻlding, yilim,

Mashaqqatlar chekib, yoy boʻlding, yilim.

Har bitta yurakka berib qanoat,

Yuksalding, dillarda misli matonat...

 

Tarix zarvaragʻi oldimda, oppoq,

Hali yozilmagan sahifalari.

Yangi yil, xalqimga baxt bergin porloq,

Salomatlik boʻlsin daqiqalari.

Zuhra AHMEDOVA.

VATANGA QASAMYoD

Jannatmakon yurtim, jon Oʻzbekiston,

Vatansan begʻubor, musaffo bahor.

Himoyangda turar mard, jasur oʻgʻlon,

Harbiy xizmat erur faxr-u iftixor.

 

Oʻgʻlingman, men senga qalqon, himoya,

Sobitman qolguncha to soʻnggi nafas.

Yovlar oʻtolmaydi bor metin qoya,

Oʻzbek oʻgʻloniga oy qilar havas.

 

“Oʻgʻlim, otlanibsan, ezgulik yoʻling,

Mard boʻlgin, oʻktam boʻl, el boʻlsin rozi.

Ajdodlar ruhidan kuch olsin qoʻling,

Yurtimda yangrasin toʻylar ovozi”.

 

Deya duo qilar mehribon onam,

Ovozi beradi fikrimda jarang.

Bergan oq sutingiz oqlayin har dam,

Siz bois yetishdim shu kunga, qarang!

 

Bugun qabul qildim harbiy qasamyod,

Vatan bayrogʻini tiz choʻkib oʻpib.

Shu ontimga sodiq qolgum umrbod,

Asl farzand boʻlay shonli yoʻl oʻtib.

 

Harbiy qasamyodni qabul qilgan on.

Yodimga keladi shunday bir xayol:

Yigit hayotida yagona imkon –

Sen Vatan oʻgʻlisan, jangchi boʻl halol!

 

Ushbu qasamyodni dilimga joylab,

Yurakda pinhona soʻzdek asrayman.

Tuprogʻing koʻzimga toʻtiyo aylab,

Bepoyon sarhading koʻzdek asrayman.

 

Xalqim, Yurtboshimga jism-u jon bilan,

Ajdodlar ruhlari – buyuk shon bilan,

Vatan sevgisi-yu, chin iymon bilan,

Qasamyod qildim men,

                    Qasamyod qilarman,

                                  Qilgum qasamyod!!!

Alisher AHMEDOV,

22-sonli maktab oʻqituvchisi.

Yangi yil tongida

Bilim bogʻlaridan gul tergansizlar,

Ilm chashmasidan suv bergansizlar.

Hayot sirlarini bir-bir oʻrgatib,

Aql-u shuurimiz charxlagansizlar.

 

Gerodot ilmidan xabardor qilib,

Tarixni biz bilan birga kezdingiz.

Maʼnaviyat oltin bitiklaridan,

Qalblarga nur ila ziyo berdingiz.

 

Jahon tillariga mehr uygʻotib,

Moʻʼjizalar tomon ravon yoʻl ochib.

Oʻz ona tilimiz qadr-qimmatin,

Koʻrsatib jahonda tengsiz qudratin.

 

Yuraklarda mehr uygʻotgan Ustoz –

Bizga tiladingiz eng baland parvoz.

Yangi yil tongida muhabbat bilan,

Baxt-iqbol tilayman Sizga sarafroz!

Yorqinoy KENJABOYeVA,

11-sonli maktab oʻquvchisi.

MARD OʻGʻLONLAR

QOʻRQMAYDI

Mard yigitlar koʻnglida,

Vatan degan tuygʻu bor.

Toʻsiq chiqsa yoʻlida

Kuchi bor, qudrati bor.

Tuprogʻin toptasa kim,

Qalqon boʻlar koʻkragi.

Yengolmas uni hech kim,

Yer koʻrmagan kuragi.

Qalbida ezgu niyat,

Kecha-kunduz postdadir.

Soʻzi bir, har ishda mard,

Yomonlikka qasddadir.

Oiladan koʻngli toʻq,

Mard oʻgʻlonlar safdadir.

Dilimda hech armon yoʻq,

Akam ham xizmatdadir.

Akam, ukam – bir safda,

Vatanni qoʻriqlaydi.

Mard oʻgʻlonlar, albatta,

Yurtga qalqon, qoʻrqmaydi.

D.Abdurahmonov, Xolimbeg ovuli.

BAGʻIShLOV

Sizlar baxt ulashuvchi,

Vatan chun kurashuvchi.

Tunni ham tun demasdan,

Tengsiz boʻlib turuvchi.

Ey yurtim oʻgʻlonlari,

Fidoyi insonlari.

Joningiz omon boʻlsin,

Siz tinchlik qalqonlari.

Yurtda tinchlik barhayot,

katta kichik bari shod.

Joni fido askarlar,

yurakda mangu hayot.

Askarlarga havasda,

Turgim keladi safda.

Boshlari omon boʻlsin,

Doim jonlari xavfda

Dildora RAJABOVA.

Vatanim

El aro hurmati oshgan,

Boyliklari toʻlib-toshgan.

Gullarga kon hur makonim –

Vatanim – Oʻzbekistonim!

 

Betakrordir gulbogʻlari,

Obod, soʻlim chorbogʻlari.

Yuragimda nur – irfonim –

Vatanim – Oʻzbekistonim!

 

Yayrab yashar barcha millat,

Ahil, totuv el-u elat.

Noz-neʼmatga boy xirmonim –

Jonajon Oʻzbekistonim!

 

Postda sobit oʻgʻlonlari,

Ular tinchlik qalqonlari.

Bagʻri obod yurt – qoʻrgʻonim –

Farovon Oʻzbekistonim!

Qunduz ALIBOYeVA,

3-sonli maktab oʻquvchisi.

askarlar

Himoya qilib yurtni,

Sergak doim askarlar.

Jon tikib asrar bizni,

Doim botir askarlar.

 

Chegarada turasiz,

Yoz-u qish va bahorda.

Kunni tunga ulaysiz,

Shom-u sahar, nahorda.

Shahzoda Joʻlliboyeva, 3-sonli maktab oʻquvchisi.

Yangi yil tilaklari

Yangi yilni barchamiz,

Kutamiz shod, baxtiyor.

Uy toʻrida archamiz,

Dilda orzular bisyor.

 

Davra ezgu tilaklarga,

Toʻlib-toshar ushbu dam.

Shijoatli yuraklarga,

Yoʻlamagay aslo gʻam.

 

Kulib, yayrab oʻynaymiz,

Qorboboni kutamiz.

Qoʻl ushlashib shod-xurram,

Yangi yilni kutamiz.

 

Doʻst-u yoron jam boʻlib,

Yaxshilarni eslaymiz.

Ahil-u birdam boʻlib,

Tinchlik kuyin kuylaymiz.

Zulfizar Oʻrozboyeva,

16-sonli maktab oʻquvchisi.