AMUDARYoDA VATAN HIMOYaChILARI KUNI KOʻTARINKI RUHDA NIShONLANDI

Vatanimizning xavfsizligi, yurtimiz tinchligi, xalqimiz osoyishtaligi Qurolli Kuchlarimiz tomonidan ishonchli tarzda taʼminlanmoqda. Milliy armiyamizda xizmat qilish Oʻzbekiston fuqarolari uchun nafaqat konstitutsiyaviy burch, ayni paytda tom maʼnodagi shon-sharaf ishiga aylanganligi ham ayni haqiqat. Yurtimizda 14-yanvarda nishonlanadigan Vatan himoyachilari kuni esa chin maʼnoda umumxalq bayramiga aylangan. Bu bayramning mavqei, maʼno-mohiyati ulugʻ va yuqori boʻlib, ayni chogʻda butun xalqimizga, ayniqsa, oʻsib kelayotgan yosh avlodga birday taalluqlidir. Shu bois yosh avlod qalbida Qurollik kuchlarimiz, Milliy armiyamizga havas hamda iftixor tuygʻulari, fuqarolarimizning ong-u tafakkuriga Vatan himoyasi sharafli va muqaddas burch ekanligini, davlat xavfsizligini himoya qilish uchun masʼuliyat tuygʻusini chuqur singdirish maqsadida ushbu bayram munosabati bilan mamlakatimiz boʻylab turli tadbirlar oʻtkaziladi. Vatan himoyachilari kuni Amudaryo tumanida ham oʻzgacha ruhda nishonlandi.

14-yanvar kuni tumanda Oʻzbekiston Respublikasi Qurolli  Kuchlarining 29 yilligiga bagʻishlab “Kim Vatanga sodiq boʻlsa, mendirman oʻsha” nomli katta bayram tadbiri oʻtkazildi. Tumandagi 9-sonli musiqa va sanʼat maktabida tashkil etilgan ushbu bayram tadbirida dastlab harbiy texnikalar koʻrgazmasi namoyish etildi.

Maktabning tomoshalar zalida davom ettirilgan tadbirda tuman hokimi Sultonboy Yoʻldashev, tuman Mudofaa ishlari boʻlimi boshligʻi Azizbek Januzakov, DXX chegara qoʻshinlariga qarashli qismlar harbiy xizmatchilari hamda tuman  hokimligi masʼul hodimlari, faxriy jangchilar, tuman Mudofaa ishlari boʻlimi, huquqni muhofaza qiluvchi organlar vakillari, jamoat tashkilotlari rahbarlari, harbiy qismlarda namunali xizmat qilib qelayotgan askarlar qatnashdilar.

Bayram tadbirini tuman hokimi Sultonboy Yoʻldashev tabrik nutqi bilan ochib berdi. Tuman hokimi barchani bayram bilan qutlab, mamlakatimizda hukmron boʻlgan tinchlikning eng katta boylik ekanligini, Prezidentimiz rahnamoligida mamlakatimiz mudofaa tizimida amalga oshirilayotgan keng koʻlamli islohotlar yuksak samaralar berayotgani, harbiy xizmatga yoshlarimizning qiziqish va intilishi tobora ortib, Vatan himoyasi shon-sharaf ishiga aylanib borayotganini alohida taʼkidladi. Umrini Vatan himoyasiga baxshida qilgan, ona diyorimiz sarhadlarini, erk va ozodligimizni ishonchli qoʻriqlayotgan askar-zobitlar, jasur harbiylarimizning el-yurt osoyishtaligini saqlashdagi fidoyiligini hech narsa bilan qiyoslab boʻlmasligini aytib oʻtdi.

Bayram tadbirida soʻzga chiqqan tuman Mudofaa ishlari boʻlimi boshligʻi Azizbek Januzakov ham Oʻzbekistonimizni, Vatanimizni doimo qoʻriqlash har bir insonning muqaddas burchi ekanligini, yosh avlod qalbida yurtga cheksiz mehru-muhabbat, vatanparvarlik, burch va sadoqat tuygʻularini mustahkamlash dolzarb masalalardan biri ekanligini aytib oʻtdi. Amudaryo tumani hududidagi DXX chegara qoʻshinlariga qarashli 92-02 harbiy qism komandiri Elyor Jumaboyev ham tabrik nutqida Milliy Armiyamiz tinchlikdek ulugʻ neʼmatning ishonchli kafolati boʻlib xizmat qilayotganini alohida taʼkidladi.

Tadbirda nuroniy otaxon Bekman Allaberganov, ayni paytda harbiylik burchini sidqidildan ado etayotgan askar onasi Soliya Jumaboyeva, Yoshlar agentligi tuman boʻlimi faoli Nigora Saidmurodovalar ham sharafli kasb egalari boʻlgan harbiylarni va butun xalqimizni bayram bilan tabrikladi. Shundan soʻng, tuman Mudofaa ishlari boʻlimi xodimlariga va faxriy jangchilari tuman xokimligining qimmatbaho sovgʻalari topshirildi.

Tadbirda tuman Madaniyat boʻlimi tomonidan tayyorlangan “Kim Vatanga sodiq boʻlsa, mendirman oʻsha” nomli katta adabiy-musiqiy dastur namoyish etildi.

Dastur davomida ijro etilgan Vatanni madh etuvchi kuy va qoʻshiqlar, dilrabo raqslar, kompozitsion sahna koʻrinishlari tomoshabinlarga bayramona ruh, xush kayfiyat baxsh etdi.

Bayram tadbiri tugaganidan soʻng, tuman Mudofaa ishlari boʻlimi boshligʻi  Azizbek Januzakov, tuman hokimi oʻrinbosari Mahmud Shermetov hamda boshqa masʼullar uzoq yillar sohada xizmat qilgan faxriy harbiy xonadoniga tashrif buyurib, bayram bilan tabriklashdi va sovgʻalar berishdi.

Shuningdek, tuman hududidagi vafot etgan harbiylarning xonadonlariga ham borib, oilalari holidan xabar olindi. Ularning barchasi masʼullar tashrifidan, eʼtibor va gʻamxoʻrlikdan nihoyatda xursand boʻlib, minnatdorchiliklarini bildirdilar.

O. Xudoyberganova.