АМУДАРЁДА ВАТАН ҲИМОЯЧИЛАРИ КУНИ КЎТАРИНКИ РУҲДА НИШОНЛАНДИ

Ватанимизнинг хавфсизлиги, юртимиз тинчлиги, халқимиз осойишталиги Қуролли Кучларимиз томонидан ишончли тарзда таъминланмоқда. Миллий армиямизда хизмат қилиш Ўзбекистон фуқаролари учун нафақат конституциявий бурч, айни пайтда том маънодаги шон-шараф ишига айланганлиги ҳам айни ҳақиқат. Юртимизда 14 январда нишонланадиган Ватан ҳимоячилари куни эса чин маънода умумхалқ байрамига айланган. Бу байрамнинг мавқеи, маъно-моҳияти улуғ ва юқори бўлиб, айни чоғда бутун халқимизга, айниқса, ўсиб келаётган ёш авлодга бирдай тааллуқлидир. Шу боис ёш авлод қалбида Қуроллик кучларимиз, Миллий армиямизга ҳавас ҳамда ифтихор туйғулари, фуқароларимизнинг онг-у тафаккурига Ватан ҳимояси шарафли ва муқаддас бурч эканлигини, давлат хавфсизлигини ҳимоя қилиш учун масъулият туйғусини чуқур сингдириш мақсадида ушбу байрам муносабати билан мамлакатимиз бўйлаб турли тадбирлар ўтказилади. Ватан ҳимоячилари куни Амударё туманида ҳам ўзгача руҳда нишонланди.

14 январь куни туманда Ўзбекистон Республикаси Қуролли  Кучларининг 29 йиллигига бағишлаб “Ким Ватанга содиқ бўлса, мендирман ўша” номли катта байрам тадбири ўтказилди. Тумандаги 9-сонли мусиқа ва санъат мактабида ташкил этилган ушбу байрам тадбирида дастлаб ҳарбий техникалар кўргазмаси намойиш этилди.

Мактабнинг томошалар залида давом эттирилган тадбирда туман ҳокими Султонбой Йўлдашев, туман Мудофаа ишлари бўлими бошлиғи Азизбек Жанузаков, ДХХ чегара қўшинларига қарашли қисмлар ҳарбий хизматчилари ҳамда туман  ҳокимлиги масъул ҳодимлари, фахрий жангчилар, туман Мудофаа ишлари бўлими, ҳуқуқни муҳофаза қилувчи органлар вакиллари, жамоат ташкилотлари раҳбарлари, ҳарбий қисмларда намунали хизмат қилиб қелаётган аскарлар қатнашдилар.

Байрам тадбирини туман ҳокими Султонбой Йўлдашев табрик нутқи билан очиб берди. Туман ҳокими барчани байрам билан қутлаб, мамлакатимизда ҳукмрон бўлган тинчликнинг энг катта бойлик эканлигини, Президентимиз раҳнамолигида мамлакатимиз мудофаа тизимида амалга оширилаётган кенг кўламли ислоҳотлар юксак самаралар бераётгани, ҳарбий хизматга ёшларимизнинг қизиқиш ва интилиши тобора ортиб, Ватан ҳимояси шон-шараф ишига айланиб бораётганини алоҳида таъкидлади. Умрини Ватан ҳимоясига бахшида қилган, она диёримиз сарҳадларини, эрк ва озодлигимизни ишончли қўриқлаётган аскар-зобитлар, жасур ҳарбийларимизнинг эл-юрт осойишталигини сақлашдаги фидойилигини ҳеч нарса билан қиёслаб бўлмаслигини айтиб ўтди.

Байрам тадбирида сўзга чиққан туман Мудофаа ишлари бўлими бошлиғи Азизбек Жанузаков ҳам Ўзбекистонимизни, Ватанимизни доимо қўриқлаш ҳар бир инсоннинг муқаддас бурчи эканлигини, ёш авлод қалбида юртга чексиз меҳру-муҳаббат, ватанпарварлик, бурч ва садоқат туйғуларини мустаҳкамлаш долзарб масалалардан бири эканлигини айтиб ўтди. Амударё тумани ҳудудидаги ДХХ чегара қўшинларига қарашли 92-02 ҳарбий қисм командири Элёр Жумабоев ҳам табрик нутқида Миллий Армиямиз тинчликдек улуғ неъматнинг ишончли кафолати бўлиб хизмат қилаётганини алоҳида таъкидлади.

Тадбирда нуроний отахон Бекман Аллаберганов, айни пайтда ҳарбийлик бурчини сидқидилдан адо этаётган аскар онаси Солия Жумабоева, Ёшлар агентлиги туман бўлими фаоли Нигора Саидмуродовалар ҳам шарафли касб эгалари бўлган ҳарбийларни ва бутун халқимизни байрам билан табриклади. Шундан сўнг, туман Мудофаа ишлари бўлими ходимларига ва фахрий жангчилари туман хокимлигининг қимматбаҳо совғалари топширилди.

Тадбирда туман Маданият бўлими томонидан тайёрланган “Ким Ватанга содиқ бўлса, мендирман ўша” номли катта адабий-мусиқий дастур намойиш этилди.

Дастур давомида ижро этилган Ватанни мадҳ этувчи куй ва қўшиқлар, дилрабо рақслар, композицион саҳна кўринишлари томошабинларга байрамона руҳ, хуш кайфият бахш этди.

Байрам тадбири тугаганидан сўнг, туман Мудофаа ишлари бўлими бошлиғи  Азизбек Жанузаков, туман ҳокими ўринбосари Маҳмуд Шерметов ҳамда бошқа масъуллар узоқ йиллар соҳада хизмат қилган фахрий ҳарбий хонадонига ташриф буюриб, байрам билан табриклашди ва совғалар беришди.

Шунингдек, туман ҳудудидаги вафот этган ҳарбийларнинг хонадонларига ҳам бориб, оилалари ҳолидан хабар олинди. Уларнинг барчаси масъуллар ташрифидан, эътибор ва ғамхўрликдан ниҳоятда хурсанд бўлиб, миннатдорчиликларини билдирдилар.

О. Худойберганова.