PREZIDENTIMIZ YoShLARNI “OʻZBEKISTONNING ENG KATTA BOYLIGI, BEBAHO XAZINASI”, DEB ATADILAR

Oʻzbekiston Respublikasi Prezidenti ishtirokida 2020-yil
25-dekabr kungi mamlakat yoshlari bilan videoselektor tarzida oʻtkazilgan “Oʻzbekiston yoshlari” forumi Respublikamizda ilk marotaba tashkil qilingan nufuzli anjuman sifatida yoshlar hayotida chuqur iz qoldirdi. Ayniqsa, Prezidentimizning: “Men har gal yoshlarimiz bilan uchrashganimda, sizlarning gʻayrat-shijoatingizdan kuch-quvvat olaman, koʻnglim togʻday koʻtariladi. Har biringiz jonajon Vatanimiz va xalqimizga sidqidildan xizmat qilish orzusi bilan yonib yashayotganingizni yaxshi bilaman. Sizlarni Oʻzbekistonning eng katta boyligi, bebaho xazinasi sifatida yuksak qadrlayman”, - degan soʻzlari biz yoshlarni ruhlantirib yubordi.

2020-yil 29-dekabr kuni esa Oliy Majlisga va xalqimizga yoʻllagan Murojaatnomasida 2021-yilga mamlakatimizda “Yoshlarni qoʻllab-quvvatlash va aholi salomatligini mustahkamlash yili”, deb nom berishni taklif etganlarida bizga yanada masuliyat va katta ishonch bildirilayotganini chin dildan his etdim.

2021-yilda mamlakatimizda 10 ta Prezident maktabi, kimyo-biologiya, matematika, axborot texnologiyalariga ixtisoslashgan 197 ta maktab oʻz faoliyatini boshlashining oʻzi yoshlar uchun juda katta imkoniyat eshiklari ochilayotganidan dalolatdir. Buning amaliy ijrosini tumanimizda oʻz faoliyatini boshlash arafasida turgan iqtidorli yoshlar maktabi misolida ham yaqqol koʻrish mumkin.

Bundan tashqari, yoshlar tadbirkorligi va bandligini taʼminlash uchun 100 million dollar mablagʻ ajratilishi koʻzda tutilayotgani yanada quvonarli. Xususan, “Har bir tadbirkor – yoshlarga madadkor” tamoyili asosida koʻngilli tadbirkorlarni jalb etgan holda, 1 nafar tadbirkorga 1 nafardan ishsiz yoshlarni biriktirish tashabbusi amalga oshiriladi. “Hunarli kishi xor boʻlmas”, gʻoyasi asosida hunarmand-ustalar qoʻlida ishsiz yoshlarga kasb-hunar oʻrgatish maqsadida hududlarda ustoz-shogird anʼanasi mutlaqo yangi koʻrinishda tashkil etiladi. Bunda, uch oy muddatda ustoz-shogird anʼanasiga jalb etiladigan hunarmand-ustalarni Bandlikka koʻmaklashish jamgʻarmasidan moddiy ragʻbatlantirish tizimini joriy etish rejalashtirishmoqda. Ushbu rejaga koʻra, tumanimizda ham “Yoshlar kichik sanoat zonalari” tashkil etiladi.

2021-yilda kasb-hunar va tadbirkorlikka oʻqib, sertifikat olgan yoshlarga imtiyozli foizlarda mikrokreditlar ajratiladi. Bunday kreditlarni 3-yil imtiyozli davri bilan 7-yil muddatga berish, bank tomonidan ushbu maqsadlar uchun  2021-yilda 45 million dollarlik mikrokreditlar ajratish koʻzda tutilgan.

Prezidentimiz oʻz Murojaatnomasida yoshlarni quvontiradigan yana bir gʻoyani ilgari surdilar. Yaʼni, har bir tuman va shahardan kamida 5 nafardan yoshlarni madaniyat va sanʼat oliygohlarida mahalliy byudjet hisobidan oʻqitish boʻyicha dastur ishlab chiqilib, amalga oshiriladi. 2021-yildan boshlab har yili har bir tuman va shahar hokimlari tomonidan 10-15 nafar isteʼdodli yoshlarni saralab, ularni har tomonlama tarbiyalash va muntazam ragʻbatlantirish tizimi yoʻlga qoʻyiladi.

Yoshlarning xalqaro “IT” sertifikatlarini olish xarajatlarining
50 foizgacha boʻlgan qismini byudjetdan qoplab berish tartibi ishlab chiqilib, joriy etiladi. “Bir million dasturchi” loyihasi doirasida 2021-2022-yillarda 300 ming nafar yoshlarni kompyuter dasturlash asoslariga bepul oʻqitiladi. “Kamalak yulduzlari”, “Yilning eng faol yoshlar yetakchisi”, “Yil sardori”, “Talabalar festivali”, “Intellektual oʻyinlar” haftaligi, “Yil talabasi” singari koʻrik-tanlov va musobaqalar tashkil etiladi. Oliy taʼlim muassasalariga kirish imtihonlarida eng yuqori ball toʻplagan 200 nafar yoshlar uchun “Prezident granti” joriy etiladi.

Ikki va undan ortiq farzandi oliy oʻquv yurtida shartnoma asosida oʻqiyotgan oilalarga imtiyozli taʼlim krediti berish tartibi joriy qilinib, bunda, kreditni oʻqish davri tugab, yoshlar ishga joylashgandan soʻng qaytarish nazarda tutilgan.

 Osiyo oʻyinlari dasturiga kiritilgan sport turlari boʻyicha tuman, shahar, viloyat va respublika chempionatlari, “Hokim kubogi” musobaqalari tashkil etiladi. Har bir hudud va soha kesimida “Vatanparvar” tashkiloti bazasida yoshlar mehnat bozorida ehtiyoj yuqori boʻlgan kasblarga oʻqitiladi. Alisher Navoiy, Berdaq, Ibroyim Yusupov, Kunxoʻja, Ajiniyoz Qosiboy oʻgʻli, Toʻlepbergen Qaipbergenov kabi ulugʻ adiblar xotirasiga Nukus shahrida “Adiblar hiyoboni” barpo etiladi.

Bularning barchasi yoshlarni har tomonlama qoʻllab-quvvatlash, qobiliyat va iqtidorlarini namoyon etishlari, jismonan yetuk, maʼnan barkamol inson sifatida shakllanishlari uchun zarur shart-sharoitlar yaratish, yoshlarni har tomonlama tarbiyalash, yutuqlarini ragʻbatlantirib borish orqali, Prezidentimiz taʼbiri bilan aytganda, har  bir yoshni “Oʻzbekistonning eng katta boyligi, bebaho xazinasi”ga aylantirishga qaratilgan. Demak,  Prezidentimizning yuksak ishonchiga munosib yashash, oʻqish, mehnat qilish, ona Vatan taraqqiyotiga oʻz hissamizni qoʻshish har birimizning zimmamizdagi burchimizdir.

Jasur DAVLETOV, Yoshlar ishlari Agentligi tuman boʻlimi boshligʻi.