KONSTITUTsIYaMIZ – BARChAMIZ UChUN ASOSIY MEZON

“Konstitutsiya” soʻzi turli davrlarda, turli maʼnolarda qoʻllanilgan boʻlsa-da, bugungi kunda u oliy yuridik kuchga ega boʻlgan, amaldagi qonun va meʼyoriy hujjatlar poydevorini tashkil etadigan, oʻzgartirish va qoʻshimchalar kiritish qatʼiy nazorat qilinadigan Asosiy Qonunni anglatadi.

Mamlakatimiz Konstitutsiyasida yurtdoshlarimizning kelajak avlodlarga ozod va obod Vatan qoldirish, ularning baxt-u kamolini koʻrishdek orzu-havaslari oʻz ifodasini topganligi bilan birga, davlatimiz rahbari taʼkidlaganlaridek, unda jamiki dunyoviy neʼmatlar orasida eng ulugʻi – Inson degan fikr ilgari surilgan. Shu asosda fuqaro – jamiyat – davlat oʻrtasidagi oʻzaro munosabatning oqilona huquqiy yechimi belgilab berilgan. Asosiy Qonunimizda davlatimizning, jamiyatimizning va har bir fuqaroning huquq va burchlari bir-biriga uygʻunlashtirilgan va muvofiqlashtirilgan.

 Umuman, Konstitutsiyamizda koʻp yillik milliy davlatchiligimiz anʼanalari inobatga olinishi bilan birga, jahon konstitutsiyalarining tajribalaridan ham keng foydalanilgan. Shu yoʻl bilan uning eng insonparvar, demokratik va adolatli Qomuslardan biri boʻlishiga erishilgan. Yillar oʻtgan sayin Konstitutsiyamizning hayotimiz, taraqqiyotimiz uchun ahamiyati qanchalik katta va tanlagan yoʻlimiz nihoyatda toʻgʻri ekanligiga qayta-qayta ishonch hosil qilaveramiz.

Mamlakatimiz ijtimoiy-siyosiy hayotidagi eng muhim sanalardan biri – Konstitutsiya qabul qilinganligining 28-yilligi arafasida shuni alohida eʼtirof etish lozimki, Konstitutsiyamiz vaqt oʻtgan sari oʻz nufuzini, xalqaro miqyosdagi obroʻ-eʼtiborini mustahkamlab bormoqda. Bizning maqsadimiz esa uning jamiyatdagi nufuzi va ahamiyatini, mazmun va mohiyatini fuqarolarning, ayniqsa, yosh avlodning ong-idrokiga chuqurroq singdirishdir.

 Bir soʻz bilan aytganda, Konstitutsiyamiz barchamiz uchun asosiy mezon boʻlishi, uning qoidalari hayotimizning asosiy qoidalari va maqsadlariga aylanishi darkor.

 Zamira Otajonova, 36-sonli maktab oʻqituvchisi.