Mahalla — jamiyat tayanchi, inson qadrining mezoni

Amudaryo tumanida joriy yilning 22-mart kuni «Mahalla tizimi xodimlari kuni» munosabati tantanali bayram kechasi tashkil etildi. Ushbu tadbir yurtimizda mahalla institutiga qaratilayotgan yuksak eʼtiborning yana bir yorqin ifodasiga aylandi. Tumandagi “Diamond” restoranida tashkil etilgan ushbu tadbir nafaqat bayramona kayfiyat, balki eʼtirof va ehtirom uygʻunligi bilan ajralib turdi.

Tadbirda tuman hokimi Sobir Xoʻjametov, tuman prokurori Bahram Masharipov, hokim oʻrinbosarlari, boʻlim va tashkilotlar rahbarlari ishtirok etib, mahalla tizimi xodimlarini samimiy qutladilar. Ularning fidokorona mehnati, xalq bilan bir nafasda yashab, muammolarni joyida hal etishga intilayotgan saʼy-harakatlari alohida eʼtirof etildi.

Darhaqiqat, keyingi yillarda mamlakatimizda mahalla institutini rivojlantirish davlat siyosatining ustuvor yoʻnalishlaridan biriga aylandi. Hurmatli Prezidentimiz rahnamoligida amalga oshirilayotgan islohotlar natijasida mahalla tizimi tom maʼnoda jamiyat va davlat oʻrtasidagi mustahkam koʻprikka aylanish yoʻlida izchil rivojlanib bormoqda. Kam taʼminlangan oilalarni qoʻllab-quvvatlash, ijtimoiy muammolarni aniqlash va tezkor bartaraf etish, yoshlar va xotin-qizlar bilan manzilli ishlash — bularning barchasi bugungi mahalla faoliyatining ajralmas qismiga aylandi.

Soʻnggi yillarda qabul qilingan qonun, farmon va qarorlar mahalla tizimini tubdan yangilash, uning vakolat va imkoniyatlarini kengaytirishga xizmat qilmoqda. Bu esa oʻz navbatida mahallani aholining ishonchli suyanchi, dardiga malham boʻladigan maskanga aylantirishga zamin yaratmoqda.

Joriy yilning “Mahallani rivojlantirish va jamiyatni yuksaltirish yili” deb eʼlon qilinishi bu boradagi islohotlarning mantiqiy davomi boʻldi. Bu tashabbus mahalla institutini yanada mustahkamlash, uning jamiyat hayotidagi oʻrnini kuchaytirish, eng muhimi, inson qadrini ulugʻlashga xizmat qiladi. Zero, mahalla — bu nafaqat hududiy birlik, balki mehr-oqibat, hamjihatlik va insoniy qadriyatlar mujassam boʻlgan maskandir.

“Mahallani rivojlantirish va jamiyatni yuksaltirish yili” doirasida amalga oshirilayotgan ishlar orqali aholining ijtimoiy himoyasini kuchaytirish, bandlikni taʼminlash, muammolarni joyida hal etish tizimi yanada takomillashtirilmoqda. Eng chekka hududlargacha kirib borayotgan eʼtibor va gʻamxoʻrlik esa davlat siyosatining markazida inson manfaatlari turganining yaqqol dalilidir.

Bugungi kunda mahalla tizimi xodimlari zimmasiga yuklangan vazifalar nihoyatda masʼuliyatli va sharaflidir. Ular har bir xonadonga kirib borib, odamlarning quvonchu tashvishlariga sherik boʻlmoqda, muammolarni yechishda koʻmakchi boʻlmoqda. Shu bois ularning mehnati har qancha eʼtirofga loyiq.

Tantanali tadbir davomida oʻzining fidoyiligi, tashabbuskorligi va samarali faoliyati bilan ajralib turgan bir guruh xodimlar tuman hokimining tashakkurnomalari va esdalik sovgʻalari bilan taqdirlandi. Bu esa soha vakillariga berilgan yuksak baho, ularning mehnatiga koʻrsatilgan ehtirom ifodasi boʻldi.

Bayram kechasi sanʼat va madaniyat xodimlari tomonidan tayyorlangan kontsert dasturi bilan davom etib, ishtirokchilarga koʻtarinki kayfiyat ulashdi.

Mahalla — bu jamiyatning yuragi. Uning rivoji — yurt taraqqiyoti, uning obodligi — xalq farovonligidir.  Uning mustahkamligi, avvalo, unda faoliyat olib borayotgan insonlarning fidoyiligi, halolligi va masʼuliyatiga bogʻliq.

Charos Arslonova, tuman hokimligining Axborot xizmati rahbari.