OʻZBEKISTON RESPUBLIKASIDA AHOLINI ROʻYXATGA OLISh MUDDATI 2022-YILDAN 2023-YILGA KOʻChIRILDI

Bugungi kunda dunyoda kuzatilayotgan koronavirus pandemiyasi sababli koʻpgina davlatlar aholini roʻyxatga olishni oʻtkazish muddatlarini keyingi yillarga koʻchirish choralarini koʻrmoqda. Jumladan, 2020-yilda Rossiya Federatsiyasi, Qozogʻiston va Armaniston Respublikalarida oʻtkazilishi rejalashtirilgan aholini roʻyxatga olish tadbirlari 2021-yilga koʻchirildi.

Maʼlumki, Oʻzbekiston Respublikasi Prezidentining 2019-yil 5-fevraldagi PF-5655-son Farmoniga muvofiq, Oʻzbekiston Respublikasida aholini roʻyxatga olish 2022-yilda oʻtkazilishi belgilangan edi. Aholini roʻyxatga olish tadbiri keng koʻlamli, koʻp vaqt va katta mablagʻ talab etadigan tadbir boʻlib, uni oʻtkazish uchun 2-3-yil davomida tayyorgarlik ishlarini olib borish lozim.

Respublikamizda mustaqillik yillarida aholini roʻyxatga olish tadbiri ilk bor oʻtkazilayotganligini inobatga olib, tadbirga puxta tayyorgarlik koʻrish va uni sifatli oʻtkazish maqsadida, Oʻzbekiston Respublikasi Vazirlar Mahkamasining 2020-yil 11-noyabrdagi “Oʻzbekiston Respublikasida 2023-yilda aholini roʻyxatga olishga tayyorgarlik koʻrish va uni oʻtkazish chora-tadbirlari toʻgʻrisida”gi 710-son qarori bilan respublikamizda aholini roʻyxatga olish tadbiri 2023-yilda oʻtkazilishi belgilandi.

Qaror bilan Oʻzbekistonda 2023-yilda aholini roʻyxatga olish tartibi boʻyicha nizom tasdiqlandi.

Unga koʻra, 2021-yil 1-25-noyabrda Andijon viloyati Xoʻjaobod tumani, Toshkent viloyati Yuqori Chirchiq tumani, Xiva shahri hamda Toshkent shahri Yashnobod tumanlarida dastlab aholi sinov tariqasida roʻyxatga olinadi.
Mamlakat darajasida aholini roʻyxatga olish esa 2023-yil 1-25-noyabrda amalga oshiriladi.

Qaror bilan aholini roʻyxatga olish jarayonlariga jalb etiladigan shaxslarga haq toʻlash tartibi va miqdorlari tasdiqlandi.

Butun aholini roʻyxatga olish esa 2023-yil 1-25-noyabrda quyidagicha amalga oshiriladi:

1-5-noyabrda aholi internet tarmogʻi orqali roʻyxatga olinadi;
6-10-noyabrda internet orqali roʻyxatga olingan respondentlar va ularning uy manzillari roʻyxati shakllantiriladi;
11-22-noyabrda aholini roʻyxatga olish varagʻi shakllari asosida uyma-uy yurib aholi roʻyxatga olinadi;
23-25-noyabrda har bir uchastkadagi uy-joy manzillarining 10 foizi tanlanma ravishda nazorat kuzatuvi asosida oʻrganiladi.

Qaror bilan aholini roʻyxatga olish jarayonlariga jalb yetiladigan shaxslarga haq toʻlash tartibi va miqdorlari tasdiqlandi.

H.HAYTIMBETOV, Amudaryo tumani Statistika boʻlimi boshligʻi.