FIDOYI ShIFOKOR

«Nabiy sollallohu alayhi vasallam insoniyatga iymondan keyin salomatlikdan koʻra yaxshirok neʼmat berilmagan» degan ekanlar. Ana shunday bebaho boylik el – sogʻligʻini saqlash yoʻlida kurashuvchi kasb egalari, shubhasiz tibbiyot xodimlaridir.
Toʻlqinlik, el orasida Oʻrinboy doʻxtir nomi bilan tanilgan, bir umr feldisher boʻlib ishlagan Oʻrinboy Xidirboyevning 6 nafar farzandning 4 nafari shifokor boʻlib yetishib, ana shunday mashaqqatli kasbda mehnat qilishayapti.
Qipchoq ovulidagi 1-sonli qishloq oilaviy poliklinikasi mudiri Rustam Xidirboyev  uning shifokor oʻgʻillaridan biri. Bu kasbga mehr unga otameros. Bolaligidan u bemor odamlarning dardiga malham boʻlib, sogʻayib oyoqqa turib ketishiga yordam berishni istardi.
Asli mutaxassisligi bolalar shifokori boʻlgan bu yigit oʻz kasbiy faoliyatini 1988-yilda boshladi. Mangʻitdagi ftiziatriya laboratoriyasida, Bolalar poliklinikasida ishladi, uchastka pediatri boʻldi. 1991-yildan 2017-yilgacha Qipchoq qishloq vrachlik ambulatoriyasida, 2017-yildan beri esa 1-sonli qishloq oilaviy poliklinikasida mudir vazifasini masʼuliyat bilan ado etib kelmoqda.
Ushbu tibbiyot muassasasi bugungi kunda Qipchoq shaharcha, Qipchoq, Toʻlqin, Choykoʻl, Beshtom, Uyshin, Daryo boʻyi kabi ovul va mahallalarda istiqomat qiluvchi 30 mingdan ziyod aholiga xizmat koʻrsatadi. Shuning oʻziyoq muassasa rahbari zimmasidagi vazifa nechogʻlik zalvorli ekanligini anglatadi.
Qishloq oilaviy poliklinikasining 18 nafar shifokorlari va oʻrta tibbiyot xodimlari talabchan va kasbiga fidoyi Rustam Xidirboyev boshchiligida butun dunyo xalqlari boshiga ogʻir sinovlarni solgan koronavirus pandemiyasi davrida ham  aholi sogʻligʻini muntazam nazorat qilib, ularga kasallikka qarshi kurash, sanitariya-gigiyena qoidalariga amal qilish, tibbiy madaniyatni yuksaltirish borasida targʻibot olib borish bilan birga, kasallikka chalinganlarni samarali davolash yoʻlida vaqt bilan hisoblashmay mehnat qildilar. Shu boisdan ayni kunda hududda ahvol barqarorlashmoqda.
Qaysiki jamoada xodimlarga munosib mehnat sharoitlari yaratilsa, mehnatlari baholansa, ijtimoiy adolat tamoyillariga rioya etilsa, albatta, shu yerda yutuqlar koʻp boʻladi. Tibbiyot maskanida hudud aholisiga bolalar shifokori, jarroh, ayollar shifokori, stomatolog, terapevt va ultratovush tekshiruvi mutaxassislari xizmat koʻrsatadi. Yiliga bir marta chuqurlashtirilgan tibbiy koʻrik ham tashkillashtirilib, aniqlangan bemorlarning salomatligi tiklanishida yordam koʻrsatiladi. Ushbu muassasada yoʻlga qoʻyilgan tibbiy xizmatlardan aholi juda mamnun.
Qipchoq ovulidagi 1-sonli Qishloq oilaviy poliklinikasiga sogʻligʻida muammolar bilan murojaat qiluvchi aholiga kasbiga fidoyi shifokor Rustam Xidirboyev boshchiligidagi tibbiyot xodimlari tomonidan namunali tibbiy xizmat koʻrsatilayapti. Kasalligi stantsionar sharoitda davolanuvchi bemorlar uchun 8-oʻrinli kunduzgi davolash boʻlimi ham tashkil etilgan. Dardlariga shifo topib, minnatdor boʻlib kelayotganlar esa koʻpchilikni tashkil etadi.
Rustam Xidirboyev ahil va baxtli oila sohibi ham. Uning ayoli Erkinoy Murodboyeva ovuldagi maktabda oʻquvchi-yoshlarga taʼlim-tarbiya berib, pensiyaga chiqdi. Oʻgʻli Islombek Oʻrinboyev boʻlgʻusi shifokor, tibbiyot oliygohi 2-bosqich talabasi.
Har yili noyabr oyining ikkinchi yakshanbasi tibbiyot xodimlarining bayrami sifatida nishonlanadi. El sogʻligʻini saqlashdek sharafli kasbda sidqidildan mehnat qilib kelayotgan Rustam Xidirboyev kabi fidoyi shifokorlarga kasb bayramlari qutlugʻ boʻlsin.

Oygul RAJABOVA.