Shoir dahosiga ehtirom

2013-yilning 27-dekabr kuni Oʻzbekiston Respublikasi Prezidenti I.A.Karimovning "Oʻzbekiston xalq shoiri Muhammad Yusuf tavalludining 60-yilligini nishonlash toʻgʻrisida”gi qarori qabul qilindi. Shu munosabat bilan butun mamlakatimiz boʻylab shoir xotirasiga bagʻishlangan adabiy-ilmiy anjumanlar, musiqiy tadbirlar oʻtkazilmoqda. Shoirini sevgan, shoirini sogʻingan xalq millatning ulugʻ, vatanparvar oʻgʻliga chuqur ehtirom koʻrsatib, bir necha oydan beri shoirning yodi bilan yashamoqda.

Tumanimizda ham Muhammad Yusuf ijodini oʻrganish, uning oʻlmas sheʼriyatini yoshlar orasida keng targʻib qilish maqsadida barcha oʻquv muassasalarida, mahallalar va mehnat jamoalarida shoir xotirasiga bagʻishlangan davra suhbatlari, adabiy-musiqiy tadbirlar oʻtkazildi. Tuman madaniyat va sport ishlari boʻlimi tomonidan maxsus tayyorlangan ana shunday adabiy-musiqiy tadbirlardan biri yaqinda 3-sonli Amudaryo akademik litseyida ham boʻlib oʻtdi. Musiqiy tadbirni iqtidorli suxandon va rejissyor Oybek Begimov mahorat bilan olib bordi.

Ushbu teatrlashtirilgan musiqiy tadbirda tumanimizda yashab, ijod etayotgan bir guruh ijodkorlar ham ishtirok etishib, oʻzlarining M.Yusuf xotirasiga bagʻishlangan sheʼrlaridan oʻqib berdilar. Qoraqalpogʻistonda xizmat koʻrsatgan jurnalist, M.Yusufning shogirdi va doʻstlaridan biri Robiya Yoʻldoshevaning xotiralari tadbir ishtirokchilarida katta taassurot qoldirdi.

Shuningdek, ijodkor yoshlardan Oʻlmasbek Xoʻjayev, Aziza Madrahimova, shoir Ahmad Nafas, Tursunboy Abdullayev, Farhod Avezov, Zulfiya Olloyorova, Bahodir Jumumurodov va Tojiboy Doʻsonovlarning dil soʻzlaridan kechaga fayz kirdi.

Adabiy-musiqiy tadbirda tumanimizning taniqli sanʼatkorlari Anvarjon Xudoyberganov va Murodjon Ibragimovlar M.Yusuf sheʼrlari bilan aytiladigan Vatan, yor, muhabbat mavzularidagi qoʻshiqlarni mahorat bilan ijro etdilar. Nihoyatda samimiy, Vatanga yor tuygʻular ogʻushida oʻtgan adabiy-musiqiy tadbir tumanimiz xalqining Muhammad Yusuf dahosiga cheksiz ehtiromi ifodasi boʻldi.